30/6/22 THU COOL
今日揍咗仲仲返學校就可以閃, 因為有同學仔都好早返到, 不過返到工都係坐, 首先喺Reception坐, 等到9點幾Bella都未到, 都估到佢有機會今日唔返, 咁第二堂咪去佢課室跟吓囉, 放Break時就再去check番佢真係冇返, 本來諗住繼續跟佢時間表上就算, 點知又話有另一個學生要跟, 咁都冇所謂啦照做啦, 上咗兩個鐘英文, 仲要係英國文學, 但又唔可以咩都唔做, 咪攞張紙出嚟抄吓寫吓, 比個學生睇吓, 咁自己啲時間又易過啲! 好就好在放飯可以放足45分鐘, 返去再上Science, 但因為佢地教哂書, 就去咗電腦室玩遊戲, 時間仲易過, 又可以快啲放工, 去接咗仲仲就回家, 因為想落雨就冇玩公園快啲返去, 可以抖耐啲先接德仔, 條友又流鼻水好鬼驚呀! 食完飯睇吓電視咁又休息!
29/6/22. WED. COOL
今日本來唔係跟Bella，但最終都係要跟，唔緊要啦，邊個都係咁做！順利揍咗仲爺返學就返去開工，始終逃唔過英文堂，妙之保持住最冇情緒嘅情緒去上就得，雖然時間都好難過，但總會過！本來我今日係跟Aisha，但總之人事調動，我又要返番Bella！都好唔洗行嚟行去！不過之後兩堂法文，都知道唔易過，總之佢唔衝出課室，我就話知佢咁多，放返嗰半個鐘又係課堂時間，其實都賺咗！食完去返佢落腳點邊睇書邊睇住佢，夠鐘要返去上堂，佢又變返正常啦喎，順利捱到放學！睇吓波記得3：15跟個NHS appointment ，點知我同佢都login唔到入去，但係NHS係咁打電話嚟，真係好難做，算啦都應該冇特別嘢嘅由得佢啦！返到屋企又要攞支結他就出門口過去接仲仲，抽完佢放學結他又要幫佢推翻架車返嚟然後又去接佢同埋湊德德，星期三其實都好忙！不過老公喺度又好少少，起碼佢會煮咗半餐飯，同埋可以早啲食飯早啲沖涼休息！
28/6/22 TUE COOL
今朝仲仲出門口時發現單車軚漏氣, 但點都要頂住先架啦, 即刻同佢打咗氣先頂咗返學校, 放學先再去補啦! 返學後有啲疑惑, 因為寫咗話去foyer到collect但Bella都未返即係點, 行均全間學校都未見佢返, 就去門口等, 再check多次email時Bella突然出現, 嚇鬼死我, 不過可見佢今日係心情好! 原來今日應該係有特別活動, 咁我又唔知喎答佢唔到, 咁啱數學堂另一個LSA知道話埋我知, 重點唔係佢參加咩活動, 而係今日兩堂英文基本上唔洗上, 真係令人最興奮! 11:30放完飯返去唔見人, 就話佢地去咗打HPV針, 本來諗住行過去搵佢, 點知Harriat突然返來, Bella怒氣沖沖, 應該係佢唔想打針, 咁佢就走咗去操場坐咗一輪, 早知由佢坐耐啲, 連返去比條麻煩老師講多兩句的機會都冇! 佢又叫Bella午飯後嗰堂可以繼續寫文, 我話佢嗰班要玩Quidditch, 佢竟然問Bella你都唔想玩架啦, 我心諗你唔好搞事呀, 幾難得避開你嗰堂呀! lunch break尾段佢去咗library幫手, 我又可以坐吓, 夠鐘就去草地集合, 其實我唔在意佢玩成點, 佢唔玩最多咪去樹底睇書, 我又陪佢一齊睇就得, 幾好! 本來以為最尾嗰堂都完全唔洗上, 但去hall 頒完獎又要返去上堂, 好在只係Geog, 個miss都係打份工嗰隻, 大家準時收工! 先返屋企放低架單車再去公園揍仲仲去整單車, 咁又冇咗10磅, 回家後食啲嘢覆埋啲電郵又要出去揍德, 本來都冇咩, 但原來佢冇帶奶咀過來, 德德喊咗一輪, 不過我地都冇人理佢, 我只係負責煮好飯佢食就得, 對住我佢冇咩可以扭! 晚上分兩轉食飯所以又食頽飯!
27/6/22. MON. COOL
今日都係照常個星期一要返工返學啦，湊咗仲仲返去，等咗一陣先見佢啲同學！跟住我就可以照常返學啦，因為喺屋企開唔到個時間表，所以返咗去先算，大概都估到我講邊個㗎啦，不過都要證實下咁，但周圍都見唔到同事，見到上司就梗係逃走啦，好在喺Reception見到一個同事，佢開咗時間表俾我睇，一如所料都係跟Bella，咁我咪同同事一齊喺Reception度等囉，原來佢都唔鍾意麻煩訊息呀，佢仲話之前有個老師就係因為麻煩上司所以辭咗職走咗，可想而知做得野嘅人通常都會走，唔做得野嘅人通常都會留喺度，因為佢哋去第二度就死火！我同佢講返上次麻煩上司又叫我去課室睇住啲學生又叫我要喺reception等Bella，跟住佢同我講你睇住啦下次佢又會叫返你返課室等㗎啦，日頭唔好講人，轉個頭佢就出現，真係叫我去課室等，我幾想同佢講當初係你叫我嚟reception等個喎！佢果然係白癡！最終我同個同事一齊去咗搵另一個負責老師，因為係麻煩老師叫我哋咁做㗎嘛，佢搵完個老師都係叫我哋返課室等，但係我冇聽佢講，因為我去Reception同佢哋講見到Bella通知我嘅時候佢哋話佢哋未必見到，所以你最好都係喺度等，咁老實我都寧願等，因為只係坐喺度就得啦！終於等到佢嚟上第二堂，不過佢都係一個課室度發夢，總之今日大致上佢都冇咩大問題，佢又安全放學我又安全放工，快快手手去學校接細佬，因為今日Mandy幫我湊㗎嘛！返到屋企休息吓，又要出去買餸同埋揍德德！順利餵完德德食飯又到我煮飯，等佢哋踢完波回來食飯沖涼瞓覺！
25/6/22. SAT. COOL
星期六都係例牌活動啦，早辷仲仲去踢波，老公揍佢出去，我就幫佢pack好咗個手袋等佢回來去寄，然後就到哥哥幫習，食唔切午餐啦，買份三文治算！抽咗佢去補習，我哋就喺附近食午餐，試咗間類似all day breakfast，都幾好味，跟住就先返屋企攞定啲麻雀枱，然後就去咗Lidi行個圈，跟住就去咗broadway買衫，因為啲返工衫冇咩夏天款，所以要入返貨！買完都差不多時間去接返哥哥，然後就去炮哥屋企BBQ，依家10點先天黑，就可以夜啲先開始，今日仲有Loletta個細佬，咁仲仲就有啲細個啲嘅小朋友陪佢玩囉！我哋大人都係一路食一路傾吓計咁啦， 10點幾十一點就返去打牌，因為喺出邊怕嘈親人地！最終都打唔晒四圈，已經12點幾，一定要返屋企啦！
24/6/22 FRI. COOL
今日都算係happy Friday，揍咗仲仲返學就返工啦，知道今日Bella返嘅機會都好低，喺reception等到10:30佢家長先打嚟，本來照平時咁就繼續跟佢地嘅時間表，但咁啱Ola今日冇返冇人跟Daisy，有個同事就叫跟Daisy就可以，咁我咪照做囉，反正就係輕鬆嘅一日，重點係唔使上麻煩老師嘅兩堂英文，就已經最開心！小息之後去上英文，可以食飯啦，不過今日又係例牌fish and chip，我真係唔多想食，都係要咗沙律同埋漢堡包就算！返到去接更又到佢哋lunch time，去咗大房隔離間房食，同佢哋傾吓計咁其實都幾好，不過之後麻煩老師嘅麻煩學生就轉咗過嚟呢邊食飯，佢哋真係好嘈，講嘢又大聲，又唔知佢哋講乜，總之就煩住晒！上多堂英文同埋History就放學啦，我從來唔知道Y8上英文堂係可以咁有系統，因為之前跟麻煩老師，啲學生發癲多個上堂，根本就唔知做乜！放學即閃返屋企，仲要去打籃球，我去超市買埋餸返屋企整好野，就去接德仔！今日佢又唔得閒食飯，鬧完佢又喺度喊，話知佢啦，嗰個係佢咋嘛又唔係我！之後喺梳化仲要喺度玩口水，搞到我成日都同佢抹咗啦手抹梳化，之後仲要消毒！佢走咗我又要開始煮晚飯啦，而家星期五通常都食肉醬意粉就算快靚正！食完之後細佬又話要食湯圓，咁就叫老公整埋芝麻湯圓，好滿足！
23/6/22. THU. RAIN SUN
今日真係唔多好，因為今日跟Bella囉，琴日佢都麻麻地架啦，見到今日個時間表加上佢個面口都知出事！佢差不多10點先返嚟，我幾想佢今日唔返！第一堂西班牙文一定唔上㗎啦，第二堂PE，佢冇帶衫加上兩班迫埋喺old. Gym，根本唔可能上！小息佢只係坐咗喺地下，又唔傾偈又唔睇書，我就知道嚟緊嘅時間都唔好過！果然上到班房門口，佢可能見到係代課老師，即刻坐咗喺課室門口唔肯入去，仲諗緊點算嘅時候，就有人嚟cover我嘅lunch，叫做逃過先啦！食完lunch返去，佢雖然返返入課室，但係只係坐咗喺度唔郁，叫做順利過完呢半個鐘！放飯是佢去到平時嘅地方，唔攞午餐出嚟食喎，之後佢喺度行圈，行吓行吓佢去咗AL1，結果就入咗去唔肯出返嚟，咁我就慘啦又要對住啲上司，又要處理佢！其實佢個要求就係佢想返屋企，不過都冇可能㗎喇，因為只有阿上司打電話比佢阿媽先會放行，但佢完全冇諗住打，可能佢覺得個學生話佢想返屋企姐，點解要俾佢返！跟住又係咁同佢講要佢離開呢個房，因為佢其實唔應該留喺度，之後仲叫咗我出去同我講吓，下次若果佢想入嚟就引到佢去第二度，唔好俾佢入嚟！我估到時若果佢唔入嚟喺出邊又發癲嘅話，佢又話點解我唔帶佢入嚟，不如叫佢試吓跟佢一個禮拜囉，佢就可能明白其實我對啲下屬係點做嘢，唔係佢哋啲上司咁望住佢講兩句走開咁就算！總之最後佢就喺間房度哦到3:15放學囉，總之今日就係好唔開心啦搵個人俾我殺啦最好！
22/6/22 WED HOT
今日照常揍咗仲仲返學就返工啦, 都唔知今日要做啲咩架, 學生早放喎, 頭一個鐘佢地喺草地嗰邊做啲運動嘢, 重點係我都唔知佢地喺嗰到, 先上咗T12行餐死, 不過都喺上面執到Dasiy, 咪同佢一齊落番去囉! 咁就去草地嗰邊曬咗大半個鐘! 然後去上第2堂, 今日跟Aisha, 走唔甩要上英文, 但見到cover teacher, 我都開心埋! 因為唔洗上堂嘛, 有學生話想繼續睇上次套卡通, 咁Celia又冇交代要做咩, 又找到套卡通, 大家咩都唔洗做去睇卡通就最好, 我就同個同事吹吓水咁! 差不多落堂前5分鐘, Celia突然走入嚟, 又自己喺到講一輪, 又話叫佢地去做埋個英文writing, 又叫我地去攞個file, 個代課老師同學生想話佢知其實仲有5分鐘落堂, 佢就淨係叫人地收聲等佢講埋先, 好啦咁人地等你講埋先話你知其實落堂架啦, 你咪冇面囉自己低能咗, 佢就話咁大家當冇見過佢, 堅係醜怪囉! 跟住就去上Science啦, 我原來完全未跟過Aisha上Science, 好在都跟到吓同埋呢個Ms都幾好, 放完Break返課室時因為有個學生應該喺Japanese Garden跟親, 搞到要全部學生只限行外圍, 咁明明已經行到去S Block都要行個大圈! 捱埋堂Science同Maths就可以放飯, 因為今日學生早放, 我地仲要喺到留兩個鐘, 好在Celia已經走咗, 冇佢係到嘈住哂大家都可以好好食飯同做嘢, 我仲問埋關於學生暑假後我地training的事, 原來今日個個都問佢呢樣嘢, 梗係啦得番3星期咋喎, 人地都要安排架嘛! 完成之後出去幫大家手做吓嘢, 又係啲無謂filing, 其實佢地做嘢真係好冇程序, 我都冇咁好氣, 做到幾多咪做囉, 夠鐘就走, 返去屋企抖抖就要出去接仲仲, 今日結他要用zoom上, 咁我又行少啲, 只係去接德仔就得, 因為仲仲帶埋個水樽出去, 德仔見到又要飲唔比佢又喊, 我就由得佢喊, 喊就得到咪成日喊! 返嚟都係玩吓食吓, 有人幫手揍住我可以快啲煮飯, 食完睇埋電視, 因為有大結局做, 睇完老公要佢地去練的波, 子元梗係黑面啦, 但都要去, 我就可以好好沖完涼hea吓!
21/6/22 TUE. WARM
今朝都係收唔到更表，咁咪返去再問囉，順手話埋比負責人知我收唔到，咁啱今日火車罷工有同事冇返，所以佢都更改中，咁我今日就變咗做大cover，全日跟3個唔同人，咁跟唔同人，就要唔同嘅時間表㗎啦，我去print都好正常姐，咁啱麻煩上司入嚟見到我，就話你一返到嚟學校就應該即刻去跟啲學生，我心諗我連我跟邊個都唔知呀咁我點跟呀，但個麻煩上司應該係冇腦嘅，因為佢講晒自己想講嘅嘢就算，佢哋呢啲人都唔識實際做嘢嘅時候係點行動，真係一講起佢就火滾！最終我攞咗時間表去到課室，都未開始上堂，因為老師都未去課室！頭兩堂係數學同埋History，數學堂我簡直係助教能手咁，係咁解釋比佢哋聽點做，其實我係year8嗰班咁耐都教緊呢一個題目，都唔明點解上到year9又係做呢啲，重點係佢哋都唔識！History堂冇咩幫到手，係跟一跟應該負責嗰個學生，因為佢反應都好慢，又唔知自己應該要點做！終於放小息，咪返去大房休息吓囉， 11:30去cover另一個同事嘅lunch break， 12點就去頂更令一個早走嘅同事！捱到1:15先至到我食飯，真係好肚餓！不過喺Staff Room同老師呀同事呀傾吓計咁都幾好！最好笑係聽日應該有早放，但係好似冇人通知過咁！食完飯諗住返去接返更啦，個體育館啲門全部鎖晒，我都唔知點入去！所以到兩點佢哋差不多房嘅時候先至開門，我先入得返去！最後嗰堂音樂堂，又係代課老師，但呢個代課老師又係冇帶腦返工，首先佢搞唔掂個Projector，又搞唔掂啲學生，佢唔好彩預正依班咁曳嘅，我已經嘗試幫佢控制場面，其實佢唔開住個projector，又唔係咩都唔可以做嘅，音樂堂聽聲咋嘛使鬼有樣咩！最終去隔籬房叫咗Mr Morgan過嚟幫手，咁咪講咗film Music嘅嘢囉，其實呢一科我已經上晒，完全知道講咩，不過個代課咁鍾意自己嚟我就決定咩都唔幫佢，放學直接走人，反正個學生都想走大家互相利用啫！接咗細佬返屋企休息一陣就要出去買餸同埋湊都得，老公返到嚟直接車晒佢哋兩個去踢波，又得返我同德德兩個你眼望我眼，佢今日食飯又要同政府同佢爭先至肯食，真係俾佢激死！等佢走咗我又要煮飯啦，今日分兩個時段用膳，所以食碟頭飯！
20/6/22 MON. WARM
今日又要返工返學啦，不過老公就請咗假，因為Jeep要去換車頭玻璃，但由於放學趕唔切接番我哋，所以都係要自己踩單車！今日真係收唔到更表個email唯有返到去再問，冇驚喜之下都係跟返Bella，等到9:15就返到，真係少有！好在今日啲堂都算輕鬆，兩堂RE係悶啲，同埋諗起派卷嘅時候， Bella唔知係咪唔想面對自己嘅成績，所以話要出去行吓！小休時間，同同事吹吓水啦，跟住返去上Science，提早左右lunch break，仲收到個好消息，間屋嘅業主已經搵到樓，所以又可以進行下一步，希望mortgage嗰度快啲完成，我相信吸引力法則㗎，只要你去相信，件事就會成真！食完飯返去又係睇住Bella放飯啦，本來諗住睇吓書就算，有個同事過嚟吹水就一齊吹下啦！之後果堂Science都係咁做吓嘢，又同Letty佢哋傾吓計！最後捱埋堂數學就收工！馬上飛車返去接細佬，返到屋企時老公啱啱都返到，所以佢可以車我出去接德仔同埋買餸，跟住佢哋兩個去晒踢波，冇人同德德爭飯食，一叫佢問佢食飯佢就準備喊，所以我就用咗另一個方法，見到跳跳虎喺沙發，我就用跳跳虎引佢過去，扮餵飯俾條條虎食，結果跳跳一啖佢一啖咁就食晒喇！跟住齊齊喺梳化睇電視，佢又圈住左我，真係好搞笑，差不多七點佢爸爸先來接佢，咁我就煮晚飯啦！
19/6/22. SUN. COOL
今日係父親節，老公話想去戲院睇侏羅紀，所以琴晚買好飛，今朝睇10:45嗰一場，以免唔識路同埋搵唔到，我哋9:45就出門口，泊好車上返商場，搵到戲院又話要去買嘢食，夠鐘就入場，今次選咗最後一行座位好似高咗少少，下次知道點買飛！原來呢度睇戲有好多廣告同片頭，都等咗一輪先開始，第一次冇任何字幕之下睇兩個幾鐘頭戲，原來我都可以明到八成，加上本身對套戲都有啲了解，所以大致上睇晒完全冇問題，都有啲驚喜！係得仲爺咩都唔明囉！散場嘅時候已經一點幾，喺商場行咗陣，用咗好多時間去搵返個停車場入口，因為嚟嘅時候商場仲未開，冇為意啲商舖喺邊度，幾經辛苦搵到入口可以攞返架車離開，跟住去咗Broadway搵嘢食，最終去咗意大利餐廳食，因為我唔想再食all day breakfast，食完就返屋企啦，我仲要做家務，細佬仲要做功課！八點幾先至食晚餐，老公喺馬莎買咗啲炒麵嘅材料，但係賣晒啲材料都係啱鬼佬多啲，要食炒麵我都係用返中國人材料好啲！聽日又要返工返學！加油！
17/6/22. FRI. VERT HOT
今日真係超級熱，我都要短褲背心咁返學！抽咗重重返去我就返學喎，知道今日係跟Bella但係估到佢會唔番，因為佢琴日都病病地！果然如我所料，等到九點幾佢家長就打返嚟，咁我今日就可以過一個happy Friday ！今日啲堂其實都算已過，音樂體育同數學！而且放飯時間仲可以放足45分鐘，都真係幾開心！不過今日真係好熱好彩有帶風扇返去，經常要五花茶都大埋，排到去最尾嗰堂先至再加水，原來有啲老師都唔知2樓教員室部水機好凍，佢哋可能都係同啲學生一樣喺嗰幾個位加水，搞到今日啲水機好似排井水咁，好長龍！放學返嚟，轉個頭又要湊佢哋出去搭巴士去打籃球，跟住再去買埋晚飯材料，實在太熱唔係好想食同埋唔係好想煮，所以諗住整肉醬意粉就算！返嚟整好晒啲飯餸就去揍德，今日熱到大家都唔想郁，除咗我哋食飯，我哋兩個都係坐喺梳化發吽豆！等佢醒咗我就煮晚餐，之後都係洗碗沖涼同休息，又真係好熱呀！
16/6/22. THU. VERY HOT
今日真係熱到痴晒線，所以著晒短袖同埋鬆身褲，湊完仲仲返學返到學校已經出晒汗，不過都要照常開工！我以為今日係跟Aisha，點知唔係喎，個時間表根本就冇send到比我，又話send咗，都唔明呢度啲人點做嘢，最終搵到個人forward返個email俾我，一睇根本就冇喎，我點會知發生咩事啫！終於知道今日係跟返Bella，但我一睇個時間表就知今日出事，西班牙文法文，再加上烹飪堂，佢全部都唔想上，真係強烈建議佢今日唔好返學唔好曬大家時間！不過居然做緊佢啦佢有佢行我有我坐喺烹飪堂試係麻煩啲，因為個老師唔會俾佢喺課室，第一堂都好啲去咗樓下坐住睇書，咁佢有佢睇我有冇睇！午飯之後佢走咗去AL1，重點係佢唔肯走，喺度瞓，好彩今日啲上司都唔喺度咁啲同事都會大家一齊試吓要求佢去第二度坐唔可以瞓覺，最終都叫做肯郁，喺返個房度將啲嘢分類，佢最鍾意就係做分類！Art堂佢都係去坐，完全唔畫嘢，好在Harriet嚟關心吓佢情況，另外就順手叫我可以去SIMS mark返低個情況，佢話可以幫我睇一陣等我去買廁所做嘢先返嚟，放工去公園接細佬，但佢又唔肯走，我又要去GP攞藥，好在Mandy話可以幫我睇住先，由得佢去公園玩，攞完藥先返嚟接佢！返到屋企就準備今晚去食日本放題，老公返到嚟都5:15 ，又要搵泊車位又要塞住車咁過去，差不多成個鐘先去到，不過有少少期望越大失望越大，佢啲嘢食又唔係唔好食，但係又唔係特別好食，所以都唔會特別推介！食完去買埋珍珠奶茶就回程啦，返到嚟已經九點幾大家都好攰早啲休息！
15/6/22 WED HOT
今日見到要上3堂英文就唔開心, 但返到去發現原來今日係好多學生去三日兩夜trip, 重點係麻煩上司都閃, 諗起唔洗上嗰幾堂佢喺到的英文就開心! 不過呢個日冇咩學生又成日代課, 都係冇咩做的日子就開心! 就好似今日咁, 5堂有3堂都係代課, 有兩堂都係睇戲, 完全係無聊! 放飯時本來押咗條友去飯堂就OK, 佢又話要去打電話又話張卡冇增值, 但又唔記得阿媽電話, 完全唔明佢想點, 叫佢攞飯卡去食咗飯先佢又唔肯, 咁唔理啦, 我要開飯! 下午嗰堂返去product design完history又係cover, 但電腦又開唔到, 搞咗一輪都差不多放學! 我都快啲押埋個學生出去就閃人, 返屋企抖抖又出去接仲仲, 因為又要去學結他, 又要揍德德, 今日真係行夠路啦! 最終德仔今日要用絕招, 找仲仲爭飯食佢就快手食完啦! 然後我地都係煮飯食睇電視沖涼休息啦!
14/6/22 TUE. HOT
今朝都算早湊左細佬返去，佢同我講佢可以自己睇住自己，我覺得呢句好好笑，我見有色嘅人差不多到就由得佢睇住自己然後就先！返到學校，知道今日唔係跟時間表上堂，其實已經好開心，跟邊個又好，做乜嘢都好，總之唔使上嗰兩堂英文我就好開心！去大房攞齊野，攞埋year 8個時間表，就去reception等Bella，佢見到我個樣都算啦開心，我就知今日應該好過！頭兩堂係hall玩分組遊戲，好在個主持人肯比Bella同佢朋友一組，咁呢兩個鐘都算過得愉快！放break之後就到我放lunch，所以都唔知佢哋做緊咩啊！午飯時睇埋本書最尾嗰幾part，跟住又返上去啦，跟住喺個好熱嘅班房，好在我有把風扇，先至捱到呢兩個鐘，幫學生2:45就放學，但我哋仲要吽多半個鐘， 3:15我先有得走！去接咗仲仲就即刻返屋企喇，可以休息到四點幾先至出去買餸再接德，今日德仔非常唔合作，總之就冇咩食到飯，有得佢囉啱同我嗰個都係佢唔關我事，佢再激我就中佢！佢兩個去咗踢波，因為今晚又要分兩場食，所以轉左蘿蔔牛腩！
13/6/22 MON. HOT
又要返工返學啦，不過老公今晚請咗假，佢要揍笨元去照x光，但我地都係如常咁返學，今日我跟另一個學生，唔係跟Bella，點知Bear今日無返喎，蝕咗添！不過跟呢個都好嘅，起碼方法可以幫到啲，同埋其實佢都冇乜嘢，反而佢隔離嗰邊就麻煩啲成日喺度搞屎棍！想完一堂放break我可以自由，不過都唔知可以去邊，其實都係無所事事！然後返去上Art，又係畫野，識畫嗰啲都好快手，唔識畫嗰啲叫佢哋畫幾條線；將畫分好都好似難度咁，真係有咁難咩！午飯覆咗一陣WhatsApp，原來Stella佢哋八月尾就會過嚟，所以問吓嘢，跟住都係點食飯邊睇機！捱多堂美術，上埋堂數學，基本上都可以準時閃人，快速去仲仲學校接埋佢，然後就返屋企，老公佢哋已經返咗嚟，佢話照X光真係照一陣就完，仲蝕咗兩個鐘頭停車場錢！可以係屋企Hea下，差不多五點先去接德仔，仲可以叫我老公車我哋過去，完全唔使行！跟住返嚟老公就湊細佬去踢波，整完隻腳會好返啦，喺屋企陪下佢，煮好飯唔係有得食埋，等佢老竇接埋佢，我又要煮飯，不過啲餸等老公返嚟先搞，所以差不多九點先開飯！
12/6/22 SUN WARM**
今日冇出街呀, 只係出去超市買啲嘢同買午餐咋! 朝早仲爺醒咗就喺樓下踢波, 搞到我醒咗, 可惡, 好在都已經8點多啦, 所以只係輕輕鬧吓佢算, hea到9點幾起身, 食完早餐睇埋卡通就要仲爺做功課, 但都係激心啦, 有時都要子元幫手分擔吓先掂! 跟住就要做清潔啦, 然後再同阿媽傾一輪電話, 仲有就係出去買午餐, 只係買咗個pizza咋, 但就去超市買吓呢樣嗰樣咁啦! 食飽的起心肝大清咗個廁所, 啲倒汗水搞到個廁所發哂毛, 唔抺唔得好似細菌房咁, 幾經辛苦總算變番白色, 到新屋時都要好好處理好個廁所呀, 防水好緊要! 跟住同佢地打咗陣機就開飯, 好快食完啦! 洗完碗洗白白又係時候休息!
11/6/22. SAT. HOT
今日瞓到八點幾九點先起身，仲仲要踢波，所以食完早餐就車佢過去練波，睇咗佢個幾鐘頭，好彩仲可以去買下咖啡睇吓手機，時間易過啲！返屋企等佢沖完涼，老公去買嘢食，食完就到子元去補習啦，送咗佢去補習，我嘅泊好車，就搭火車出去Central London，都幾經辛苦先至搭到出去，落咗車又要好似野外定向咁睇住地圖，先去咗睇電動滑板車，其實老公喺網上睇過晒資料，只係想再睇吓真身，等到時搬定左屋先至再決定買邊㗎啦！然後就去幫老公個朋友買名牌手袋，我咁大個人真係好似冇試過入去呢啲名店，老公攞住幅圖，問佢有冇呢個貨，有就買，所以個sales應該好開心，我哋呢啲客多幾個佢應該仲開心，唔使服侍咁滯！等嘅期間，仲會有飲品招呼，我哋要水就算啦，仲唔中就要咗可樂，人哋仲送咗支Lollipop俾佢，只Lollipop個樣仲要係牌子個logo，呢啲時候梗係影相打卡啦，有幾何再入返去名店買嘢！完成晒就去買珍珠奶茶，不過都行幾遠，同埋杯珍珠奶茶都唔係幾好飲，好普通！邊行邊飲去返搭Underground返去West Acton，差不多時間接返哥哥啦，然後返屋企休息吓，覺得肚餓發覺已經七點幾，所以快啲叫老公煮飯，食完飯都仲鍾意埋-足球同繩梯，佢沖咗涼我哋先至可以沖涼因為要整頭髮所以11點幾先至自由。
10/6/22 FRI WARM
終於到星期五, 照常咁返學返工啦, 睇住書咁等Bella嚟到, 不過第一堂佢又唔肯上, 我都交足戲, 引埋個老師出嚟, 大家都勸佢唔掂架, 我唔係冇盡力! 不過我問番佢原因係因為課室入面好多人佢唔識所以佢唔想入去喎! 第二堂Music又係代課, 大家鬥hea啦! 小息後要上英文囉, 真係勁唔想上, 唯有抱住見步行步的做法, 佢叫做咩我就人咩, 唔好有太多嘢講太多反應! 捱到有cover嚟可以閃人食個飯先, 下半堂可以去用電腦, 唔洗比人點嚟點去, 叫做好少少, 最搞笑係平時成日搞搞震嗰兩個學生, 唔知佢講笑定講真啦, 佢話我係佢最鍾意的TA喎, 可能因為我成日縱容佢地掛! 終於捱完呢堂, 仲可以早10分鐘閃出去, 睇咗陣書先去上history, 點知又係代課, 要佢地整咩鬼poster, 幾難捱到放學即閃去學校接仲仲, 買埋50P雪條就快手回來換衫去球場, 我就去買餸返嚟整好就去接德! 返到嚟德仔食完飯架啦, 有條鄰居物體攞開我啲膠箱話佢要泊呢到, 話我地咁做人地會唔鐘意, 咁佢架車惡過我個人可以點呢, 佢仲話泊住兩個位先, 你要泊時嚟knock門我郁番個位比你! 我冇得反抗, 但對面屋睇住佢咁做就覺得佢唔啱, 因為大家都知我要叉電嘛, 都會留個位比我, 仲話叫我打去council問吓可唔可以申請做叉電位! 好在最終佢地都走咗冇再泊, 咁我照放番啲膠箱出去, 對面屋仲比thumb up手勢我添!
9/6/22 THU. WARM
今朝都係照常咁返學，攞咗本書返去睇，諗住都睇唔得晒啦，點知我由9:00到Bella等到11點，先收到通知話佢唔返，其實本書已經一早睇晒，嚟緊可能要攞啲厚啲嘅先得！佢唔返都有唔返嚟好，因為唔使湊住佢其實就輕鬆好多，只係跟住佢嗰班出出入入咁就算啦！小息嘅時候我又可以去休息室坐下，幾舒服啊！午飯時候就可以食足45分鐘飯，幾耐未試過啊！上埋最尾嗰堂就可以準時收工，最好笑係，最尾嗰堂一齊個同事，佢話今日你唔使同Bella一齊輕鬆好多啦，佢試過跟Bella一日咁多，都覺得好辛苦，佢話都唔知我咁多日點捱，跟住我同佢講，其實跟住Bella問題唔大，反而係想Mrs Rice嘅堂先至煩，因為琴日佢都在場，佢話佢都唔知Miss Rice想做咩！放學去公園仲仲玩到四點多就返屋企喇，抖一陣又要去湊德德，返到嚟差不多都要即刻煮飯，不過今日佢係都要自己食，搞到周圍都係，但道高一尺魔高一丈，佢有佢自己食，我有我好快手餵！之後都係等老公煮好飯食飯，睇吓電視咁樣最舒服！
8/6/22. WED. WARM
今朝如常起身，不過就冇咩聽收音機，因為要幫子元打電話去G P約睇佢隻腳，好在出門口之前已經預約到，如果唔係又要喺條街度搞就麻煩！最終約咗今日去睇，但因為個時間我揍唔到佢，所以要即刻通知老公請早少少放工車佢過去睇！揍咗細佬返學我就返工，返到去都係如常咁開工啦，我諗我有一段日子都只係跟Bella 㗎啦，不過熟習咗佢有時都冇咩所謂，只要唔係想麻煩老師果糖就得啦，咁麻煩老師真係好麻煩，呢頭叫你整理啲簿，嗰頭又叫返你返去睇住Bella，人哋好地地喺個位你就唔好搞佢啦，我覺得最應該係佢跟Bella一個星期，了解吓個學生係咩人先出聲！加埋同場有個講嘢一嚿嚿，又唔識聽英文嘅日本妹，真係令人狂爪！小息之後上Science，差不多大半堂都喺度整嗰張poster，咁個老師基本上都唔使做，因為同Letty一班，所以我又忍唔住好積極咁過去吹水，因為真係幾開心！期間放咗個飯，食飽飽繼續開工，佢哋午飯時我就搵個兩位坐好睇吓書，又同另一啲學生吹吓水，搵到個方法喺度自處，感覺上比之前開心咗！返去再繼續上science，但係我都忍唔住睇咗陣書，因為真係冇咩好做！捱埋堂數學可以放學啦，先返屋企放低架車攞定啲餸出嚟解凍，同子元講睇GP點樣做，跟住就去接返重重，湊佢去學音樂，幫佢攞返㗎單車返嚟，去超市買啲餸，行去接返佢，再去接德德，撞啱個時間好多人知，等咗足足三個字，所以返到嚟要快快手手煮埋個飯俾佢食，咁我就可以休息吓，老公煮埋飯就早啲食飯，不過而家差不多九點幾十點先天黑，真係好奇怪！
7/6/22 TUE WARM
今朝冇睇天氣就換衫, 結果熱咗成日, 可惡! 朝早如揍咗仲仲返學就返工啦, 而家基本我係日日跟Bella架啦, 都冇咩太大壓力, 習慣咗佢個模式其實都係大同小異, 不過佢今日遲咗返到就知心情唔好, 去到課室撞正代課, 學生已經嘈, 佢又自動關機喎, 初頭連櫈都唔肯坐, 我就用我帶返嚟本中文書引佢先肯咋, 後來有另一個老師入嚟鬧咗一輪都差不多落堂, 咁數學堂都冇咩, 派卷啫, 點知有個平時都失失地控的, 突然間發顛衝咗出課室, 我堅係覺得琴日個同事講得啱, 佢真係喺到學Bella, 咁佢就可以有好多特權! 不過我唔理咁多啦, 揍好我嗰件就算, 跟住兩堂PE, 我叫做有半個鐘可以去咗食飯休息吓, 因為真係好熱呀, 係咁曬住太陽所以今日覺得好攰, 最後history叫做可以坐吓, 但個課室又熱, 佢地又上完PE焗哂喺個房到, 幾難頂! 終於放學啦, 去接咗仲仲就回家, 本來子元要揍仲爺去球場, 但因為老公又話佢唔洗OT, 可以回來車佢地, 咁就唔洗趕啦, 我到咁上吓先去揍德仔, 回來hea吓煮飯等等, 佢今日又秒食咗個飯, 然後齊齊吽啦等佢爸爸嚟接我又可以煮飯啦, 因為今日要分兩輪食飯所以又煮頽飯, 不過最終都係我要洗埋啲碗, 所以又係要好遲先沖涼, 仲仲又係瞓咗等唔唔切我講故事!
6/6/22 MON. COLD
終於又要返工返學喇，回復正常一早起身，照常湊咗仲仲返學就返工，今日都係跟Bella，估唔到佢記得我放假前仲病緊，今日就問我好返未，真係有我心！頭兩堂R E都係照樣跟吓嘢，係第二堂測驗時我可以肆無忌憚咁睇書，睇書冇嘢捉到掛，以後都係帶本小說返去好啲，咩時候都可以睇吓，唔係我就嚟可以見到有冥想能力㗎啦！放飯時候另一個同事同我一齊喺2樓食飯傾吓計，都好嘅唔使成日獨家村咁！跟住返去照上堂，到佢哋午飯時我仲邊睇書邊睇住佢哋， Bella帶咗cupcake 返嚟，仲請我食咗一個！第二堂衰人去咗complota Room搵資料我，我同letty同埋Holly又肆無忌憚咁用廣東話講嘢，完全當其他人冇到，都幾好笑！上埋堂數學就放工啦，好在醒起今日係星期一，應該係我要接仲，咁就要打電話安排返，因為我同仲講咗今日係 Mandy接佢！快手去到學校接完佢就返屋企，休息吓四點幾又要出外買餸同接德德，老公揍晒佢哋兩個去踢波，我就同德仔單打獨鬥，好在今日佢都好乖，食飯就好快，之後就陪我一齊睇吓電視打下機等佢阿爸嚟，不過臨尾疴多篤屎我嘆！等佢走咗我又要開始煮飯食，佢哋返咗嚟沖涼老公就煮埋下半場，食完飯都九點多，都未沖得切涼，仲仲等唔切我講故事就瞓咗！
2/6/22 THU. WARM
今日比平時返工仲早起身，因為約咗大家一齊去睇女王登基70周年慶典！因為喺Central London，所以大家都唔揸車，搭火車過去！不過搭火車過去都唔係容易嘅事，轉咗兩次車先至去到，出閘之後跟住大隊行，終於去到St James Park，嘗試過去路邊位置睇吓攝唔攝到位，但發覺都係冇可能，咁就去大螢幕前面嘅草地搵地方落腳，Settle down之後先食早餐，然後老公去買咖啡我就想試吓去影吓相，留返出post用！原來要等到10:00先開始，不過傾吓計吹下水周圍行吓，時間都過得好快，因為人太多上唔到網，連電話都打唔到，哥哥唯有玩啲平時唔會玩嘅嘢，就係同Lettie佢哋玩扭計骰，細佬就同細個班小朋友一齊，大人就吹吓水！終於開始巡遊，不過我哋只可以透過大螢幕去睇，但都好勁因為官方鏡頭算係好清晰，開頭一大半都冇聲，所以大家都係睇吓有傾吓計咁！到咗後來終於有返音樂同現場聲音，氣氛即刻唔同晒！見到事頭婆一家，喺個陽台上面揮手結尾，仲有最精彩嘅空中飛機表演，睇到大家熱血沸騰！不過疏散嘅路有排行，出得嚟Central London，咁係再去吓唔同嘅地方，終於近佢嚟去到鐘樓睇大笨鐘，再去埋唐寧街10號首相府，最後行埋去唐人街搵地方食午飯，大家都行到筋疲力盡！好好食完餐飯就搭火車各自返屋企啦！返番Ealing即刻覺得條街好少人，因為今日實在見得太多人啦！去超市買啲即食嘅嘢，返屋企休息到咁上下八點幾先開始慢慢整嘢食，然後沖涼休息，今日真係玩夠！
