8/11/22

 8/11/22     TUE     RAIN& WIND

今日都係如常咁返工返學, 好在返放學時都冇落雨, 不過就好大風囉! 今日Bella返到嚟心情唔多好, 基本上每堂都冇上, 分別在於連課室都唔肯入定都叫做肯入課室坐吓啫! 只係一返去嗰堂入到課室躲咗喺枱底, 我話出去行佢先肯出返嚟, 但佢又走入AL1, 又打自己咁, 好在我問佢去找輔導主任好唔好佢都肯, 去到個輔導主任同佢講嘢都唔出聲, 淨係點頭搖頭, 但玩咗幾盤過三關, 主任有嘢走要佢走啦佢又肯喎! 咁咪繼續上堂囉, 但小息到PE堂又唔肯上, 仲坐咗喺更衣室門口地下, 好在我話去圖書館睇書佢又肯, 好過喺出面吹風! 之後到我放飯我話你要入課室架啦, 咁佢都肯聽, 等我好好放完個飯返去! 不過今日我唔記得帶書返嚟睇, 所以放飯後半段就有啲悶囉! 捱到放工接仲, 本來諗住入學校接佢, 但都係唔好, 啱啱落完大雨肯定周圍都浸, 所以都係喺車站接就算! 回家後等子元回來就去買餸, 夠鐘就揍德, 都唔算好忙啦! 兩個今晚都踢波, 所以又食碟頭飯!