31/1/18

31/1/18   WED   VERY COLD 6度

今朝仲爺醒咗又喺到扭要落去, 唔好玩啦凍到咁仲落去! 今朝仲要煮飯比笨元帶, 真係夠哂忙! 食埋早餐返工, 今日都唔算忙, 不過都有啲嘢做咁啦, 午飯後睇吓電視, 大老闆娘返嚟時電視都差不多做完, 都好冇阻住! 下午都有公事做呀, 都好GE唔洗咁無聊! 放工就去接笨元, 佢今日話劇嘛, 接佢時咁啱又撞到SO SIR, 買埋餸返去煮飯啦, 今晚都好簡單, 7點幾煮起有得食啦, 不過仲爺就唔多合作囉, 散到一屋都係嘢之餘又係咁搞住哥哥溫默書, 真係好想中佢一身! 飯後睇住平安谷嚟做嘢係慢好多, 10點前K.O.咗仲仲就執嘢, 沖埋涼都10點幾, 笨元仲比DADDY捉住嚟做緊肌肉訓練, 我沖完涼都要做! 最後都係邊摺衫邊睇電視再打吓機先瞓, 因為老公已經入咗房, 佢都等到12點架啦, 不過我睇住電視嚟摺衫係慢啲! 咁我就等自己最眼瞓時先去瞓就唔怕鼻寒聲!

30/1/18

30/1/18   TUE   VERY COLD

今日都係如常咁返工返學啦, 都係食凍冰冰的脆片咋, 揍咗仲仲返學就買早餐返工啦, 食個豐富少少的早餐咁啦, 天氣凍嘛要補充吓! Hea吓又到午飯啦, 食吓睇吓電視咁, 差不多2點大老闆娘返啦, 佢個孫真係似足老闆, 格衰衰咁! 下午佢地喺到時都要做吓嘢GE, 夠鐘咪放工返去接子元囉, 返去換好衫等老公嚟車我地, 因為嫲嫲話今晚想去打邊爐, 就去試吓天悅上次食過幾好食嗰間大煲皇, 原來大包都嚟食, 好在book咗5位啫, 仲爺就瞓足全程, 都好GE唔洗煩住哂可以慢慢食! 呢個邊爐都好好食, 樣樣味道都唔錯, 食到差不多9點先返去, 送嫲嫲返去後都要運路走, 因為南橋下午架油車反咗仲未搞掂, 返到去就快手沖涼啦, 煮咗少少粉比仲爺食咗先瞓, 老公沖完涼都瞓佢話好攰喎! 咁我就冇理佢啦, 沖完涼打陣機12點幾真係攰先瞓啦!

29/1/18

29/1/18   MON   COLD+

今日真係好凍, 其實琴晚都開始凍架啦, 今朝起身真係feel到凍啫, 揍咗子元上校車就快手返去搞掂隻細啦, 食啲嘢出門口, 都8:40先返到去呀! 返到公司都係做自己嘢啦, 難得又唔洗開會嘛, 上星期揍到大獎的同事買咗幾件蛋糕請我地食, 咁我梗係放雪櫃先啦, 留番tea先食! 午飯去咗買譚仔暖吓身, 食完都係睇吓電視啦, 下午老細返哂嚟, 都冇咩嚟煩我地GE, 同佢啲愛將開會緊要啲, 跟住到tea time就過去攞蛋糕食啦….竟然得番一件….明明有半打喺到架喎, 原來係老細佢地食哂, 咁點解會問都唔明就食人地啲嘢呢, 又係大咪姐囉, 佢唔講鬼知雪櫃有咩, 做人做到咁真係幾無品囉, 不過佢都唔會理架啦, 刷鞋刷到都唔覺自己有問題! 放工快手去接子元, 今晚唔洗買餸, 因為嫲嫲包咗雲吞, 咁真係咩都唔洗買, 直接返到去可以吸咗塵抺咗地先, 老公回來先煮雲吞, 食完都係睇功課等等, 今晚好攰, 沖完涼摺埋衫, 10點幾就瞓!

28/1/18

28/1/18   SUN   COOL*

朝早唔洗畫班, 以為可以瞓晏啲, 但7點幾就比佢地嘈醒, 個人真係會好燥底! 最終拖到9點就起身, 慢慢梳洗完出門口, 先去食個早餐再揍子元去打鼓, 今日打一個鐘, 我地就喺AEON行吓, 接番子元之後就入東涌, 因為要去公司交換番架車, 順手就遊吓東涌啦, 不過就先去咗欣澳先, 真係去咗遊秘景呀, 其實都係老公公司附近, 有條小徑行入去, 可以行到去一條水漲就過唔到去的小壩到, 掟吓石頭影吓相, 呼吸吓新鮮空氣咁! 就係幾舒服! 睇完又行番出去啦, 沿途見到有共享單車, 老公就試咗開鎖, 不過踩平路OK囉, 舒少少已經好難行! 睇完就入東涌, 入之前仲去睇咗一個叫「時光隧道」的東西, 原來係條好大的水管到有人噴咗呢4隻字, 又幾無聊喎! 入到東涌泊好車, 真係只去咗玩公園, 今日真係戶外活動日, 不過人少少咁真係舒服! 佢兩個都玩得好開心, 玩到4點先去食嘢, 都真係有啲餓啦, 食完又趕番出去游水啦! 返到去諗住邊摺衫邊睇劇, 但未有得摺就hea住咁睇, 點仲爺都早瞓醒又出嚟搞搞震! 差不多7點去接子元啦, 去長沙灣食個粥就返屋企啦, K.O.咗佢地真係邊摺衫邊睇劇, 近來煲緊套新劇河伯的新娘, 幾好笑!

27/1/18

27/1/18   SAT   COOL

今日要返工, 老公就揍子元去踢波, 帶埋仲爺一齊去, 仲早過我出門口, 咁我咪自己買埋早餐返去慢慢食囉! 返到去都係做吓自己嘢啦, 收工就過馬鞍山找佢地, 睇住劇咁過去啦, 明明叉夠電都得番一半, 咁去到先食咗嘢先啦, 食咗間牛什好好食喎, 返番過球場仲爺又拉埋個波友細佬一齊去咗遊樂場玩, 玩到咁上吓就返球場啦, 今日子元好神勇入咗兩球, 雖然係執雞, 但執雞都要識企位先掂, 等抽埋禮物頒埋獎就可以閃, 本來諗住去沙田, 但老公入錯線去咗大老山隧道咁就出咗東九, 於是咪唯有去mega box囉, 差不多5點, 咁就喺IKEA食啲嘢先, 就喺諗住用手機影相時突然黑哂畫面, 堅係驚囉, 比老公睇吓時似係冇電, 咁又冇叉電嘢喺到, 唯有回家先算囉, 但真係勁不安囉! 行到7點幾都返去啦, 老公9點又要去踢波, 返去快D搞掂佢地先! 沖好涼做功課玩一陣仲爺都瞓覺啦, 子元又要睇呢樣整嗰樣, daddy踢完返嚟佢都未瞓! 我就等老公沖埋涼一齊食宵夜!

26/1/18

26/1/18   FRI   COLD

今朝要去瑪嘉烈睇內科, 所以琴晚都執齊嘢架啦! 我地架cube喺老公公司, 所以今朝又要痴車坐, 返到學校咪影吓相囉, 今日係生日會嘛! 揍咗佢入學校就過醫院首診, 盲中中一心諗住係去瑪喜烈, 幾經辛苦上到去排埋到櫃位先話係下葵涌喎, 好在我早去到, 仲有時間轉場, 馬上飛的落去再排囉, 都仲有時間, 又要度高磅重量血壓, 最得人驚嗰part啦, 我自己都驚到唔想睇, 不過都係因為要面對問題先嚟GE啫, 又見護士又見醫生, 又話我有發燒, 又問好多間題, 真係搞到我愈來愈驚囉, 最終諗到點解會低燒, 因為星期二跌到隻手臂瘀到咁, 撞傷肌肉都係會發燒GE! 叫做睇完就去攞藥約下次個期等等, 差不多11點先走得, 我都直接請咗半日假, 就返屋企做吓嘢先, 咪又係做吓家務咁! 老公今日請咗下午假, 咁就一齊食埋飯我先返工, 返到去都係hea吓啫, 4點幾又準備出門口去入屯門, 今晚要食公司飯, 其實咁早入到去都唔知為咩, 又唔喺商場行吓得個坐字! 終於人齊坐好等到7點幾先慢慢開飯, 真係餓爆! 咁食吓吹吓水又咩都唔洗負責原來都幾輕鬆, 今年抽獎叫做得12份現金要抽啫, 都冇諗有冇機會中, 60人抽12份其實有1/5機會中架都算大架, 咁又比我抽到$900, 不過呢D嘢左手嚟右手去架, 咁又要預錢去私家照腎, 仲唔係抽得嚟洗得去, 不過總好過冇GE! 食完都10點幾, 等老公嚟車我返得屋企都11點幾, 仲爺瞓左就抬佢返去啦, 笨元就要自己行啦! 返去執好嘢沖好涼打吓機咁啦, 都1點幾先瞓啦!

25/1/18

25/1/18   THU   COLD

今日都係如常咁返工返學啦, 朝早都係揍佢兩個返學, 買埋早餐返去食, 今日想食吓粥清清地, 跟住都係做吓自己嘢, 冇咩特別, 午飯食沙律通粉, 所以唔係好夠飽兼且好凍, 冬天真係唔適合食凍嘢! 下午老細不在, 佢要去拍片嘛, 搞到artist咁巴閉! 放工後去美孚同阿媽會合, 因為今日佢揍哂兩隻豬, 子元又要補英文喎, 所以仲爺就一齊出嚟囉, 去街市買埋餸阿媽就走啦, 我就同仲爺喺美孚行, 原來一個鐘都好快, 又去麥當勞食吓嘢咁, 我堅係肚餓囉! 跟住又要去郵局幫老公寄信, 行返去接子元都差不多! 行返屋企都7:15啦, 不久老公都返到, 佢幫手整嘢打邊爐, 今日都好簡單咋, 不過打邊爐好長時間, 食得嚟都9點幾! 仲爺食咗麥樂雞一啲都唔餓, 所以都食到好衰, 但最終都食哂, 就同佢沖涼瞓覺, 我先再洗碗抺地, 子元的功課都係望吓有冇做就算! 沖好涼趕得切睇三流人生啦, 但老公又話眼瞓想瞓先….今次到我扭計要佢等埋我…於是佢就入房等囉, 因為我真係仲要摺埋d衫嘛!