30/9/22 FRI COLD RAIN
今朝都係有老公揍仲爺返學, 下星期佢要返工, 就要回復正常! 工作上今日都係咁上吓啦, 冇咩特別, Bella間中又發吓顛咁啦, 但都算無驚無險咁啦! 放飯時間趕啲囉, 因為今日個飯唔多, 唯有去買多個沙律襯吓! 放工返屋企, 竟然係第一個, 因為老公接完仲仲去買埋餸買埋嘢食先返, 不一會又趕住出去, 兩個豬仔要踢波打波嘛, 星期五係塞車, 但都未至於由子元踢波嗰到去番仲爺嗰到要兩個鐘, 結果又搞到炮哥, 要佢同教練嗰到聯絡要佢等埋老公去接, 最終因為太遲要罸10磅, 咁都要比, 不過下個月唔會打啦, 揍唔到兩個! 最終去揍埋哥哥差不多8點幾9點先返到, 剛好摺哂衫又煮咗粉, 因為淨係食漢堡唔夠! 食飯時老公話安博已經出咗姜B套戲, 於是一睇就睇到11點幾先沖涼, 但之後仲係唔多願瞓覺!
29/9/22 THU COLD
今日都係老公揍仔返學, 我就自己嚟! 返到去都係如常等開工, 今日Bella準時返呀, 但就冇咩表情咁囉, 開頭都有啲難服侍, 慢慢上咗兩堂又好少少, 到第三堂英文又係代課, 咁啱我又收律師樓電話等等, 有機會可以出去聽電話, 總之就係準備黃昏去收key啦! 12點幾有得食午飯, 邊食邊同同事吹吓水咁, 好快又夠鐘! 今日餘下時間都唔錯, 無驚無險放工返屋企! 本來諗住子元返埋嚟就出門口去收Key, 點知老公又話要我同佢睇新工份文件, 子元又話要蒸飯, 但已經3:45啦, 係咪應該出門啦呢! 加上又塞車喎, 結果差不多4點3先去到estate agent到攞Key, 又要再去開箱嘛, 最終4點半先去到, 終於可以入屋啦, 雖然間屋冇哂傢俬但又好似冇之前睇咁大, 不過都係要咁住架啦! 先係拍片啦, 跟住就開始度吓尺, 諗吓啲嘢點擺, 搞到5點多先走, 仲要趕返去揍德, 加上又塞車啦, 真係幾經辛苦先返到去, 仲要快手煮飯比德食, 跟住又開始度嘢, 食完飯再繼續, 沖完洗K.O.埋仲爺又要覆電郵, 今日都夠哂啦, 嚟緊要努力為搬屋啦!
28/9/22 WED COLD
今日早番啲起身都冇咁趕, 同樣唔洗揍細佬直接返學係慳時間啲, 返到去如常去等Bella, 等到9點半唔見人就去上英文, 都係代課老師所以我都係幫頭幫尾咁啦, 然後PE堂就去企吓算啦, 都唔明呢到啲學生, 老師話佢分好隊佢地去踢足球, 但有幾個一向麻煩的學生又唔肯跟, 低能到一個點! 放Break時去confirm咗Bella唔返就睇吓分配咩工作比我啦, 總括今日都係輕鬆的, 第三堂陪Samia等佢上完堂同佢出去撘uber就得, 跟住放個長飯, 然後就去Year 7 的food technology整apple crumble, 又學到樣新食物, 最後一堂本來要揍個好嘈的學生, 但佢因為去咗有meeting, 最終我坐咗喺staff room夠鐘就走, 幾開心! 放學返去攞埋結他接細佬, 老公咁啱返咗嚟就車我過去, 仲爺學緊時就去超市買餸, 揍埋德就返嚟, 忙亂時老公又有電話打嚟, 今日啱啱見嗰份工請咗佢, 快到呢, 都見完冇幾個鐘, 咁又要覆文件等等, 雖然係會遠少少忙少少, 但人工又高好多喎, 又大公司又係佢嗰行啱哂! 總之一切天父都安排好, 我地只要盡心盡力去做就得! 吸引力法則嘛! 快手一齊食咗啲都唔知TEA定午餐, 老公又要揍子元去踢波, 咁我就揍住德囉, 仲仲又掛住睇機! 等佢一走又要幫老公覆電郵又要煮飯, 好忙! 食完洗碗沖涼後又要KO仲爺又要幫老公出email覆番本身下星期一要返嗰份工而家唔返啦! 10點幾先自由!
27/9/22. TUE. COLD
今日真係凍咗好多！朝早set遲咗15分鐘起身，諗住老公車佢哋可以唔使咁早，但原來有一堆嘢要做其實都係七點起身穩陣啲！返到學校都係如常咁開工啊，等咗兩堂Bella都未返，問清楚話佢今日唔番㗎啦，咁咪卸下行裝去佢會上堂嘅班房繼續工作，點知差不多1:30就嚟放飯嘅時候，有個同事去咗課室搵我，話Bella返咗嚟，我心諗有冇搞錯返嚟放飯然之後上一堂，係咪玩嘢啊！不過我最怕就係麻煩老師陣間又話我冇帶住個對講機，冇聽到Bella返嚟，但其實佢一早話咗唔番，我放低部對講機都合情合理，不過唔理得咁多啦，佢再講先算啦，呢啲都係我自己諗嘅啫！最慘係我本身諗住佢放飯嘅時間我食飯，點知佢返咗嚟，我要喺飢寒交迫嘅情況之下到2:15，送咗佢去課室，同另外一個同事交帶左我先至再去食飯，已經餓死我！過埋最尾嗰堂，放學就返屋企啦，啱啱返到去老公又湊左細佬返嚟！今日冇得揍德，因為佢打完針好似好唔舒服，所以佢哋自己湊番！咁我咪輕鬆咁過一日囉，佢兩個輪流去踢波，老公又煮好晒飯，我只係負責焗返熱佢就得啦！不過都有好多衫要接，所以開埋套電視劇一路睇一路摺！
26/9/22. MON. COLD
今日又要返工返學啦，不過老公今個禮拜都唔使返工，下星期先至開始返新工，所以佢可以湊晒兩個返學，我自己就繼續踩單車！返到去都係見到麻煩老師，諗住可以避開佢唔想同佢講野，去到reception等嘅時候， Bella都好快返嚟，不過老公話佢唔記得帶鎖匙，所以我唯有settle左Bella之後再攞條鎖匙出去俾佢！今日上堂佢都算合作，總之佢肯入課室坐低，話知佢聽唔聽算啦！小息之後要去打針，佢都真係驚打針，我見應該要嘗試幫吓手，個工作人員叫佢捉住我隻手，咁就順利打到針啦，可見其實佢都真係幾信任我！放飯嘅時候都係邊食邊同阿Joe吹吓水，跟住冇幾耐又到啲學生放飯，咁我咪睇吓書囉，期間又準備落大雨，好在有瓦遮頭！上埋最尾嗰堂數學可以放工啦，返屋企食咗嘢先，再準備吓五點幾就出門口，因為今日要去Wembley Stadium睇英國對德國，揸車過去真係勁塞車，我估因為好多車都會拍喺嗰度附近！拍好車再行過去，都已經六點幾七點，所以行得上看台坐好等多半個鐘都已經開場，初頭都有啲悶，下半場就好多波入，最終三比三打喎！今次老公帶咗好多紙去摺飛機飛落去，都幾好玩！睇完唔商場又要行返去落車，又要塞一輪車先至出到公路，10一點幾返到嚟，仲要快手煮麵俾大家食，再沖涼休息已經12點幾！
25/9/22 SUN. COOL
今日真係好忙碌！朝早八點幾起身就要準備出門口，因為兩位少爺都要踢波，首先9:30車咗哥哥去球場，然後我哋去食咗個早餐，再揍仲仲去比賽，遲咗少少，不過比賽都遲開始，冇所謂啦！場比賽最終5-5，但係開始嘅時候係佢哋領先，係咁俾人追番上嚟真係可惜！睇到12點幾，要等老公嚟車返我哋，因為子元去練完波又要去補習，佢都遲咗先去補習，蝕咗！接咗我哋就返屋企，食咗個飯團，但係都唔多夠飽，等仲爺沖完涼我哋同阿媽傾完電話就出去超市買嘢，返到嚟係咁椅掃咗個地同埋清潔咗個廁所，就要摺埋啲衫，老公去接番子元放補習，未夠五點事頭佢哋就嚟㗎啦，開頭都係吹吓水囉，同埋預備下今晚韓燒啲材料，啲細路最終都係開咗遊戲機嚟㗎，我都想好多人一齊玩Overcooked呀！七點幾開始燒肉，其實最終食完都係差不多九點，今日要早啲瞓啦大家明天都要返工返學，洗好嘢執埋野就沖涼休息！
24/9/22 SAT WARM
今朝老公要揍子元去比賽, 我就要揍仲爺去練波, 咁可以點揍呢, 梗係踩單車啦, 都算順利! 去程上斜回程就可以滑梯咁啦! 返嚟等仲爺沖埋涼, 老公佢地買咗炸魚薯條燒雞返嚟做午餐, 食完就叫仲爺快啲做功課, 我就上網做吓嘢, 因為舅母打嚟話stamp duty應該可以claim到退番, 因為昨天剛update咗, 我29號先complete, 咁就搵吓資料email比律師問吓! 之後子元話打機, 咁基本上就打到晚飯, 仲爺淨係抄生字同解釋都搞咗好耐, 等佢嗰時就打overcook, 佢終於做完先玩party囉! 晚飯後洗埋碗沖涼都10點幾囉, 明天又要出去踢波補習等等, 好忙!
23/9/22 FRI. COOL
終於到星期五，今朝有少少趕，去到門口一陣已經入得學校，所以我都可以快啲返工！返到去都係如常咁攞齊晒嘢等Bella，佢今日都算準時，課堂上面一般合作啦，係有一堂突然之間斷線唔肯入課室尤其唔穩，好彩有個學生經過，我叫佢即刻攞張凳俾我等我可以俾Bella坐，如果唔係都唔知點扶住佢咁耐！放午飯嘅時候直程去咗香港人同事個office入面食飯，方便吹水嘛！又要返去開工，不過都係喺操場幾下，本來仲有啲肚餓但得來今日整咗chocolate brownie，咁食埋就夠飽囉！數學堂又係代課老師，不過Bella都好合作做晒啲數，如果唔識嘅就問我等我教佢，總算圓滿結束今日嘅課堂！返屋企等阿哥湊埋細佬返嚟，收拾好就出去等巴士，都等咗一陣先有車，跟住我就去超市買埋嘢返屋企，快手食啲嘢唞一唞又要出去揍德！今日得我同佢，唯有開卡通俾佢睇，咁我啲時間先至高啲！佢阿爸阿媽差不多七點有多先來接佢，我先至可以去準備晚餐，所以你細佬返嚟沖完涼都未有得食飯住！所以根本嘅時候煮完就打返嚟，因為佢提過要開始行去巴士站自己搭車，因為老公約咗人踢波，就要個仔自己搭巴士返嚟！雖然有啲甩漏但總算安全返到嚟，跟住佢就食晚餐，老公差不多10點先返到，真係誇張！
22/9/22 THU COOL
今朝如常咁起身梳洗返學，喺學校門口見到識嘅家長，就可以早啲放低細佬早啲返到學校唔使咁趕！今日都算幾順氣，等咗一陣Bella 就返到，然後佢今日心情都幾好，個個課室都肯入去上堂！不過其他人好似就冇我咁好彩，又要跟啲唔熟悉嘅學生，一係就好亂！等到一點先至有飯開，又去同個香港人同事吹吓水咁，真係好開心！下午啲時間都好快過，我終於睇晒本步步驚心，原來結局係有啲補充，同電視劇唔同，所以最尾睇嘅時候可以當新書睇！放工接完細佬，俾佢喺公園玩咗一陣，所以返屋企之後又要趕落去買餸又要食啲嘢先至再去接德德，基本上都冇乜休息過，返到嚟又要煮晚飯又要餵德，等佢走咗又要開始煮飯食完飯又要洗碗，真係要等佢哋瞓晒我先有自由時間，但係仲要接衫好攰呀！
21/9/22 WED. COOL
今朝都係趕頭趕命出門口啦，所以連咖啡都唔記行帶，諗住返到去上staff room沖咖啡就算啦，點知又撞到個麻煩老師，又話你已經夠鐘㗎啦唔應該喺度嘆咖啡，我心諗你唔好去死，飲杯咖啡我只係用1分鐘時間，況且Bella都未返，使唔使咁急啊，算啦個個都唔鍾意佢，係佢自己唔知！九點幾Bella返到嚟，但估都佢唔會去上geog堂，如果佢喺門口坐咗一堂，我又冇咩所謂嘅，反正入課室都係坐咁解！之後英文堂要作文但係佢都冇作，所以我都勸唔到幾多，我都悶到喺度畫公仔！放完break之後上佢最鍾意嘅Science，所以就好合作，加上我放咗半個鐘頭返去吹吓水，然後返去一陣又到佢哋放break ！本來諗住繼續睇書，點知有個香港人學生過嚟同我傾偈，差不多傾到放完break， Letty佢哋過嚟先至完結對話返去上堂！最後只係數學堂，好似個學生多啲，好努力咁做數！放學去埋個廁所先走，接完細佬快啲返嚟又要準備出去學結他，因為太攰啦我唔想再行，所以坐喺琴行等到夠鐘，咁啱老公返到嚟可以接我哋，先去湊埋德德再返屋企，等我唔使行咁遠！跟住哥哥去練波，我哋就喺屋企，揍完德然後準備晚飯，等老公返嚟就煮飯，摺埋衫沖完涼10點幾又係時候休息啦！
20/9/22. TUE. COOL
今日煮係如常咁返工返學啦，照樣去等Bella啦，但等到9:30都未見人就去佢課室，到第二堂去check咗一次都係未返，咁就去上英文，我都好俾心機咁差嘅生字，如果唔係冇咩好做時間都好難過，因為又係代課老師！想想下嘅時候二姐嚟到話Bella今日唔返叫我跟另外的學生，咁放完break我就去跟另外的學生上PE堂，不過因為好快就要接受跟另一個，所以只係其中半個鐘就算！跟住去咗今個year 12，基本上都冇咩做，只係跟佢出出入入！自己安排時間放飯，可以食耐啲輕鬆啲，好耐未試過輕鬆得咁緊要！到佢食飯嘅時候去咗sixth form食飯嘅休息室，就係見到有另一個香港人學生，同佢傾咗一輪，之後都係睇吓手機啦，這個堂基本上都係唔使上因為係自修，咁佢都有做嘢我咪繼續喺隔離睇吓機！好準時可以放學，好快湊左細佬就返屋企，因為又要出去買餸整嘢，基本上都冇乜休息過又要出去湊德！之後佢兩個輪流出去踢波，揍完德又要煮飯啦，今日啲時間都過得好快轉個頭已經10點幾要瞓覺！
18/9/22 SUN. COLD
今日子元又補習又踢兩場波，所以基本上全日都係車佢出出入入，我同細佬主力都係只可以留喺屋企！朝早老公早啲起身同梓瑤食埋早餐出門口先，我就同細佬喺屋企，等到公車就煮完去補習，就返嚟接我，因為我free咗個細佬嘅衣櫃，咁就要去攞，唔算太遠，唯有獨留仲爺在家，快啲攞完就返嚟，然後老公又要去接子元放補習再去踢波，因為重賢已經做晒功課，我哋又唔識開機打Switch，所以都幾悶，追咗幾集劇集，六點幾的起心肝去煮飯先，佢哋差不多七點幾先返到嚟，食咗飯洗碗沖埋涼，都已經九點幾十點，細佬仲話要繼續打Switch，咁明天唔使返工返學，就俾佢打一日啦，差不多11點一定要收機，聽日流流長再慢慢打！
17/9/22. SAT. COLD
今朝睇天氣報告，得五度，真係凍咗好多，食完早餐仲仲要去踢波，子元又要踢波，所以老公車咗我同仲仲去球場，佢就再揍子元，變咗我要喺球場等，又凍又大風，一時之間都未習慣返咁凍！終於等到老公帶埋杯咖啡嚟搵我，不過杯咖啡都變咗暖！佢車咗我哋返屋企，然後再去接子元，呢個球會真係好勤力係咁加操，所以佢哋兩點幾先返到嚟，我同細佬都忍唔住焗咗個Pizza食咗一半先！整完自己換衫再去另一個球場練波，我哋就要去買嘢啦，太耐冇入貨咩都冇，先去榮業行食咗個午飯，跟住再行超市，不過其實龍鳳行有嘅嘢佢都有，反而佢連牛肉味嘅丁麵都冇真失敗，但我都買咗七十幾磅！然後就去Costco，呢度又買咗百幾磅，冇辦法啦有肉有其他嘢咁！去球場接埋子元先至返屋企都已經六點幾，好彩擺完啲貨入屋之後泊咗我哋個位架車終於肯走，咁就可以差啲喇！放好晒啲嘢pack埋啲肉，就叫老公快啲煮飯因為已經八點幾，食完飯快啲洗埋碗沖涼休息！
16/9/22 FRI COOL
終於到星期五啦, 今個星期好似過得好慢咁! 朝早忙忙亂亂咁搞掂出門口返學, 都遲咗少少架啦, 去到仲爺學校都開咗門啦! 我返去就慢慢都唔遲, 因為今日學生late start, 所以冇咁早有人, 喺大房無所事事, 去個袋攞嘢時先發現銀包電話都唔記得帶, 應該琴日去買完嘢冇放番好! 於是乘機叫個同事還錢比我! 夠鐘就去開工, 今日明明學生上堂時間係短咗, 但點解堂堂都咁耐先完, 因為啲課目唔吸引囉! 11點幾就要去食午飯, 都未餓! 捱到佢地放飯時咪睇吓書囉, 見到另外兩個投契的同事喺到就去吹吓水, 其中一個今日last day啦, 佢要返去讀埋個大學, 因為之前大咗肚冇讀完所以而家再讀番, 真係有心有力! 幾經辛苦捱到放學, 同個同事say goodbye埋就回家, 好在子元有帶key, 返到去仲諗緊點安排揍出揍入的問題, 點知德仔唔洗我揍, 子元唔去踢波, 炮哥可以嚟幫手接仲仲, 咁老公放工可以直接回來, 我又唔洗趕, 可以去超市慢慢買嘢, 仲返嚟同子元打吓新game! 只係6點幾老公話要幫佢手睇文件覆email, 就冇得玩住, 一睇就睇咗好耐啦, 食完飯又要繼續, 睇到我眼都矇埋! 終於可以洗碗沖涼休息!
14/9/22 WED. WARM
今朝見到更表跟Daisy，都算係輕鬆！照常抽咗重點返學就返工，輕鬆工作有時又會覺得眼瞓，真係好矛盾！總之照腸跟住佢出出入入其實都問題不大，同埋其實佢成日都走堂，所以有時唔使上堂可以做吓自己野都幾開心！午飯時又係同香港同事吹吓水，佢話收到Loletta申請L S呢份表，不過佢都係負責收資料，見人都應該唔關佢事！最尾嗰堂真係好眼瞓，如果唔係可以睇吓幾我諗我一早瞓咗， Daisy又想早走，正合我心意，快啲攞埋單車一齊出去reception等收工！去公園接埋細佬就返屋企，因為要去學結他，踩埋單車出去順手去超市買埋野先再去接佢，時間啱啱好！ Cheung Wai都得就返屋企煮飯俾佢食，哥哥就去踢波！晚飯食炸髀同埋羅馬生菜夾燒肉，好正！
13/9/22. TUE. COOL
今日老公請咗假見工，所以成朝都喺度，咁就可以收咗件貨，明明之前日日都10點幾就送偏偏今日手2點幾先送。總之最後都收到啦！另外就係律師樓打嚟話落實到29/9收鎖匙，終於完成咗一大步，跟住就開始要預搬屋啲嘢！返到學校準備開工，點知喺大房見到個同事好唔舒服，最終call咗白車呀，希望佢冇事啦！另外今日只係等咗兩堂， Bella個媽媽就打電話返嚟話佢唔翻，咁我就同咗啲相熟同事一齊跟Rami，大家可以吹吓水咁幾開心！點知第三堂跟跟吓嘅時候，有人嚟搵我話叫我去大房跟一跟嗰個疑似成日扮Bella嘅同學，咁反正都係跟啫，同邊個一齊其實冇乜所謂！但係諗住可以食個long lunch嘅時候，阿二姐搵我話Bella個阿媽打返嚟話佢20分鐘之後返，所以叫我即刻放飯，佢會搵人接咗Bella我再去同佢會合！冇所謂啦都係返多一堂啫，仲要出奇地果糖佢好合作上都好開心，所以今日基本上我都係好輕鬆！放學快手去接咗仲仲返屋企，就開始拆箱喇，嫲嫲真係咩都送多幾倍過嚟，所以真係好大箱！有好多食物、海味、衫，同潔手酒精，應該有排用！拆箱又要覆電郵等等，攰到我都唔知咩感覺，老公見完工返嚟，差不多又要湊佢哋去練波，因為之前係咁落雨我都出唔到去買餸，所以叫老公車咗我出去買餸，買完摺埋啦得就返屋企！返到嚟佢都好乖咁自己睇電視，咁我就可以整埋個蘿蔔牛腩！維園佢食飯咪休息吓囉，因為等佢走咗又要煮飯準備細佬返嚟開飯等等！最後等哥哥都踢完波返嚟食完飯洗埋碗我就可以沖涼休息！
12/9/22. MON. WARM
今日都冇咩特別，可能只係特別攰！早上如常出門口返工返學，今日Bella好準時到，不過情緒一般，加上第一堂又係代課老師，唔好話Bella，我都唔想理佢，所以我哋兩個坐咗喺後邊齊齊睇書就算！第二第三堂佢都係肯入課室係好好上堂，只係睇書，不過起碼肯入課室已經好好！放飯時又同個香港人HR傾咗陣，之後到啲學生放lunch，我做咗網店睇吓書，因為Anna嗰度未有同佢傾吓計咁，時間都好快過！最尾嗰堂上埋數學就可以放工！今日收到律師電話，話已經收到我哋啲錢，定係月尾29或者30號收鎖匙，而家睇大家邊一日可以！揍咗仲叫我返到屋企，本來應該有食物，但我又忍唔住去投訴個包裹同埋問佢究竟佢哋會點安排送來，因為老公聽日請咗假見工，朝早佢會喺屋企！咁希望佢聽日再送多次嚟屋企啦！之後就出去就得，最後返到嚟一陣就瞓鬼咗，搞到我煮飯都唔知點叫佢食好，我都叫醒佢之後又喺度扭眼瞓，最終都食咗九成㗎啦，咁佢走咗我就煮咗飯先差不多時間先整餸，用嘢喺房做功課足足做咗三個鐘，我都唔知佢喺度做乜，又喺度激到我火都嚟埋，食飯夾餸嘅時候又跌落地，真係冇停過咁去激你！之後我都好攰頭好痛只係想快啲休息但仲要洗碗摺衫倒垃圾！
10/9/22. SAT. COOL
今朝8點點就去到銀行門口，因為要過數比律師樓，以防人多，點都早啲去，點知最終都係幾丁友，但我可以第一個做囉，咁啱又係上次接待我嗰個職員負責，比哂資料佢處理，順利完成，等律師樓下星期安排埋completion date就正式收key！搞掂就去食個早餐啦，見broadway開咗間新嘢就試吓，有少少貴但都好食嘅！最後行吓買埋嘢今日party就回家，好忙碌要清潔，不過差不多兩點幾佢地先到，最早到係Holly家，跟住係Mandy同Letty，三佬佢地都好遲，不過喺屋企玩就有樣好，玩住等！基本上小童有小童玩，中童有中童玩，大人咪吹水打牌咁，到齊人就開始食嘢，都係食個tea咁解！晚飯都遇咗一齊食，可惜Holly佢地晚上約咗人，6點就要走啦！我地食埋嘢玩到9點幾影埋大合照就散！我仲要執屋快清潔一轉先沖涼休息！
9/9/22 FRI COOL
終於到星期五啦, 今朝事頭話因為女皇走咗若果我地聽日喺公眾地方慶中秋, 好似唔係咁好, 就話不如取消歐聚會, 但其實我又唔係好想, 中秋節始終係應該多啲人慶祝好! 所以最後提出, 若果佢地唔介意可以嚟我到, 反正我地做開party場地! 講番今日工作, Bella終於準時返學, 雖然第一堂唔肯入去, 但之後四堂都算正常, 已經好好! 最搞笑有3堂都係代課, 仲要係同一個代課老師, 可以吹吓水, 仲有係可以同Letty吹水, 因為其中一堂同Letty一齊呢! 食飯時喺staff洗碗時, 有個Asian員工嚟相認, 佢都係香港人, 可惜唔可以詳談因為我要趕返去接更啦! 所以傾咗陣就交換埋電話, 有機會可以再傾! 順利上埋幾堂就放工, 因為唔記得提哥哥接仲, 所以都係去學校一轉, 好在喺公園路口撞到, 唔係錯失咗就煩! 咁一齊返去換好衫執好嘢就出門口, 子元先揍仲仲去籃球場, 老公去會合再揍子元去踢波然後再來來回回接哂佢地先返嚟! 我就送咗佢地去巴士站買餸再返去預備, 然後接德! 今日冇哥哥玩, 唯有吽吓囉! 等佢閃咗我先hea吓等煮晚餐, 星期五晚都係肉醬意粉, 不過佢地返得嚟都9點多先食, 好夜啦!
8/9/22. THU. COOL
今朝瞓醒又係時候要開工啊，忙忙碌碌咁準備出門口，揍咗仲早返學我就返工，今日揍Bella，不過我要小心翼翼知佢係幾時返，因為等到9:30都未見人，咪又要去佢啲課堂度咁囉，第一堂geo又見到Letty，之後啲堂都開大個Walkie Talkie以防聽漏，不過今日佢最終都係無返，總之我就平安無事過咗一日啦！放學馬上去銀行，睇吓book唔book到過錢去律師樓，點知最後一個皮啱啱俾人攞咗，個職員同我講話星期六都可以過到錢，叫我一早喺銀行未開門之前嚟排隊，咁唯有咁做啦，我唔想請假去做呢件事！返到屋企食啲嘢休息吓，夠鐘就要出去湊德！老公今日北上睇曼聯，所以我哋三個食自己，等我揼死咗就煮飯，邊睇波邊食，老公就現場睇巴閉啦佢！明明已經好早食飯，但做得嘢嚟其實又已經10點幾先知瞓得，因為要接埋啲衫都搞咗成個鐘！
7/9/22 WED RAIN
今朝都係如常咁揍仔返學再返工, 但老細又冇email更表比我, 同事又冇print比我, 完全唔知玩咩, 總之問到又係跟日本妹就算! 不過第一堂food technology係勁混亂囉, 人又多又要煮又要洗, 又唔夠洗手盤咁, 總之就亂啦, 本身我都唔like個Ms 架啦, 所以佢講咩都算, 我自己盡咗力就算! 今日最好笑係science又係代課老師, 不過竟然係個香港人嚟代課, 一聽佢啲英文就知, 我覺得我好過佢呀! 基本上冇咩特別嘢要做, 同琴日一樣抄寫吓, 所以我今日都有啲hea! 另外就係放飯時, 咁啱都有好幾個老師放飯咪吹吓水, 得番我同數學Ms時, 講開住邊等等, 就話我係踩單車返工, 另一個office lady嚟到又吹開話我要揍咗仔返學先踩車返嚟, 佢問我個仔幾大, 我話一個14一個差不多9 , 佢地係完全唔信, 忍唔住問我幾多歲時我話41, 佢地都係完全唔信, 老實我都唔信Ms 先至29歲, 唔同種族係估唔到囉! 最好笑係佢已為我同佢咁上吓大, 真係開心! 跟住佢仲講笑話睇嚟佢都要踩單車返工先得! 順利放學接咗仲爺返去, 今日要學結他, 而我又忙住打電話去處理個郵件, 個人已經燥底, 又要行嚟行去喎, 今日冇得揍德, 條友唔肯返學係咩玩法! 最終佢話要下星期三先有得去郵局攞, 搞到我仲係好擔心囉, 明明星期一送到架嘛, 叫咗佢點做又唔跟喎, 真係好想講粗口! 然後好攰咁又要繼續搞電腦嘢, 然後仲爺食杯麵又未食就打瀉哂, 真係火到頂點! 係之後老公去煮飯先叫做好啲, 今日真係好攰, 但仲要幫老公改番哂申請份工啲嘢, 好攰!
6/9/22. TUE. RAIN
今朝早咗啲起身，所以唔使咁趕出門口，返到學校照常開工，今日跟日本妹，所以係輕鬆嘅，加上升咗級之後啲細路好似乖咗，或者係啱啱開學仲未熟絡去嘈囉！放break嘅時候因為唔使跟住佢哋，就過咗去同Letty佢哋吹水，然後咪繼續上堂啦，得閒就同佢做吓翻譯，今次我醒啊攞定子同不，可以寫低比佢哋睇！差唔多午飯前見有時間就check吓電郵，原來麻煩上司琴日有send email講關於我喺Walkie Talkie聽唔到接Bella，老實啦佢差不多12點先返學，邊有人估到佢仲返姐，其實係咪應該考慮吓同佢家長傾吓，佢返唔返學係咪應該通知學校一聲，而唔係學校喺度等佢啦，不過算啦麻煩嘅上司係唔會有腦，佢哋只係有權力，而我哋呢啲冇權力嘅人其實係最有腦，如果唔係點應酬啲老屎忽！午飯時經常先睇手機，都係最享受嘅時間，上埋最後一堂就放學，臨放學之前竟然狂風暴雨，好在真係走嘅時候只係好細雨，但重點係條街浸晒，係浸到單車經過都會濕到腳，我隻腳已經冇跌落地下，又要避開汽車嘅大浪，真係幾經辛苦先接埋仲仲返屋企！幫佢清理下預備埋晚餐啲嘢其實都唔頭一陣又要出去就得啦，不過唔緊要啦佢米飯班主，湊住佢有錢收有乜所謂！今日兩個都要踢波，老公就做司機，我就負責煮頹飯，食完洗埋碗沖埋涼差不多10點幾先至噯仲瞓覺！
5/9/22. MON. WARM
今朝子元唔使返咁早，所以我7:15先起身，不過唔係會好趕，同埋佢哋賴床都係一個問題，聽日都係7:00起身穩陣啲！匆匆忙忙之間仲記得影張返學相算係咁，揍咗仲仲去學校等佢開咗門先至出發，都有少少趕，因為返到去又要擺飯俠又要泊車又要搵時間表，十成我都係得Bella 㗎，所以攞齊嘢就去等佢，等到9:30都未見人就跟佢時間表上堂，放埋break都已經11:30 ，佢都仲係未返，諗住佢都唔會返啦，點知差不多12點有個同事嚟我課室，話佢竟然返咗嚟，咁咪出去接佢囉！英文堂其實都係講吓今年課程，叫佢哋抄下野，我都唔知Bella喊咩，不過佢唔嘈就算啦！然後到數學堂佢又唔肯入課室，最終我同老師講佢可唔可以喺課室度睇書佢先至肯入去！終於到我放飯啦，又要處理個郵件，明明叫咗佢放喺鄰居度，但條友又冇咁做搞到我要再諗辦法點處理！放完飯返去差不多又到佢哋放飯，撞正落雨我就企埋一邊睇咗大半個鐘頭書，都係好事！上埋最尾嗰堂RE就放學，今日我有兩堂都同Letty一班，可以係咁吹水都係好事！順利放學返去接仲仲，因為德仔仲未好返今日唔使湊佢咁就俾仲嘢喺公園玩到四點幾先至走，當我返到嚟嗰陣又係時候出去買餸，因為唔趕時間，可以慢慢行吓超市，缺點就係你買多咗嘢！我未返到老公已經返咗嚟屋企，七點幾煮飯食，可以早啲休息，琴晚俾啲雨嘈醒差不多三點先瞓得返好慘！
4/9/22. SUN. WARM
今日冇咩嘢午，所以都係hea！差不多8點已經醒咗，但個胃都仲係唔係好舒服，所以老公整咗多士同炒蛋我食就算，食完早餐第一時間吸塵抹地先，但吸吸下層個吸塵機冇電，諗住去叉電啦，點知差唔到喎，老公話應該個火牛壞咗，咁都要買嗰個㗎啦，雖然有啲貴！最後用最原始嘅方法掃咗個地，拖埋佢就可以抖一陣，因為仲係唔係好舒服，所以都係唔好出街，子元又話打機咁就一齊打多陣啦，結果都打到差不多三點實在太過分！因為主人要去踢波所以先至停，午餐好求其咁我都唔知食咗啲乜嘢，不過我又唔係好肚餓，所以都去食咗啲零食同埋塊多士就算！老公出咗去秋子元，以為佢有睇佢踢埋先至返，點知佢好快就返嚟，因為要睇阿仙奴對曼聯，但個電視又好唔生性，開頭成日都load唔到，好在10幾廿分鐘之後終於load到可以睇！之後到我想睇返琴日喺Facebook錄到嗰條片個劇集嘅結尾，好在我記得套劇叫咩名先至可以搵得到嚟睇！老公返嚟就煮晚餐，佢話想食炒飯，所以一早煮好飯攤凍咗可以炒，然後仲要整鴨胸同埋腸仔等等，因為要逐個飯炒所以都幾嘥時間！八點幾九點就沖好涼，因為聽日兩位少爺都開學啦，所以今日都係早啲瞓啦！
2/9/22. FRI. COOL
今日真係好攰！朝早又早醒，返去又要跟Bella，佢琴日已經唔多好，今日都遇咗係架啦！果然接咗佢見佢都冇反應，頭兩堂都唔肯入課室，一係喺走廊坐足一個鐘，一係周圍亂撞，話點解啲嘢全部消失哂，其實都係好慘！捱到小息見番啲朋友佢又冇嘢喎，但之後double lesson science又嚟，肯入課室啦但又喊，帶咗佢出課室，咁啱我放飯，唔理啦等人接手，我要休息呀！放完飯佢都返到課室變番正常，lunch break後都好好，相對地的！Pong Cheung，突然之間又要帶仲去打籃球，咁啱今日德仔仲病緊唔想湊佢就帶佢過去啦，點知塞車塞到九彩，五點幾先至過到去！老公就要揍子元去踢波再過嚟接番我哋，再去接返笨，今日已經八點幾所以就喺附近book咗間意大利餐廳食嘢，雖然好好食但係真係好貴
1/9/22 THU. COOL
今日終於係有學生之後正式開工，算係一個輕鬆日！因為啲學生返9:30 ，所以返到去其實都唔使趕，攞齊晒嘢再去操場搵返自己嗰班，同埋同啲close啲嘅學生擁抱，排隊Bella見到我，好興奮咁叫我埋去然後好肉緊咁攬實我，問我暑假過成點生日過成點，真係好窩心，不過今日我唔係跟佢冇辦法詳談，今日係跟日本妹嗰班，同另一個麻煩學生，不過佢無返，所以其實我全日都好輕鬆！放break之前都係喺課室同埋hall聽下野，放筆嘅時候我都可以休息吓，連帶放飯時間一齊，咁就不如食埋個飯先啦！係飯後果個半鐘慘啲啦喺個課室無所事事，又冇嘢可以做，我悶到喺本簿度畫公仔！終於捱到佢哋放飯，我又冇學生要跟，又唔想返去大房嗰度變相開工，又覺得有啲肚餓咁不如去買咗個沙律去staff room慢慢食，本來以為食完飯要悶埋嗰一個鐘，點知我係要幫手做treasure hunt checkpoint，其實咪就係企係一個點有學生嚟到搵到個字呢就比張紙佢囉，都幾好玩只要唔係坐喺課室無所事事可以講吓嘢就得啦！主力都係俾啲新入學嘅year 7玩，就係咁見到今年都嚟咗好幾個香港人，有一個好醒目唔知點解覺得我會講廣東話，就問我係咪識講，於是我哋就用廣東話對答啦！玩完差不多係時候放工，我就執埋嘢去個廁所走人！今日都係老公來接我，仲有順手還返啲麻雀被炮哥，還麻雀嘅時候我哋好似毒品交收咁喺架車快手交收，好好笑！老公話行broadway買嘢，就過咗去泊車然後行左個幾鐘先返去，所以仲仲就叫哥哥打電話俾我哋問我哋去咗邊呀！因為德德今日病咗唔使湊佢所以趁機會行吓先！返到屋企老公就喺度整千層麵，我咪Hea吓囉難得有一日可以hea！晚飯時間佢哋又睇波，所以我都可以食完飯快啲洗好碗沖涼，再做吓電腦嘢！
