30/11/14

30/11/14   SUN   WARM*

今日柏仲7點先醒, 已經好比面, 比佢上床就搗亂! 起身後就出去食早餐, 順手去銀行, 返到屋企老公K.O.咗柏仲, 我就同子元溫書, 本來想襯今日預先同柏仲慶生日, 因為2號又冇請假, 子元又要返學, 好難唔理佢同柏仲去玩! 但真係找唔到合適地方, 所以去咗海運影吓相, 睇吓玩具算咋, 佢兩個都應該開心, 去city super買埋晚餐材料返去, 都6點幾啦, 應承咗子元比佢去踏單車, 咪帶埋柏仲落去等老公可以prepare晚餐, 返上去洗哂白白可以自家牛涮鍋! 柏仲好自由咁周屋行, 咪求奇餵咗D烏冬佢食囉, 洗埋嘢又要K.O.柏仲, 子元就第二輪, 都10點前瞓咗, 我地就可以睇電視打機等等, 睇埋ten先瞓, 大結局嘛, 睇到2點幾囉!

<樣衰衰飲水!>

 <海運聖誕裝飾!>

 <齊齊踏單車!>

29/11/14

29/11/14   SAT   WARM

今日都係醒早比柏仲嘈醒啦, 想瞓到8點都唔得, 起身梳洗餵埋奶返工, hea到放工啦, 老公差不多放工先過到嚟, 玩咗一陣就走啦, 過去食大快活後就送咗笨元學乒乓球, 然後我地就自己食tea, 跟住咪撘巴士返去囉, 柏仲瞓覺, 我就turbo手做家務, 諗住留15分鐘過去接笨元夠哂時間啦, 最終都係唔夠, 仲搞到校務處打嚟, 返得到屋企就5點幾, 佢地仲瞓緊, 咪要笨元做埋D功課咁囉, 因為今晚要出去食飯, 阿婆生日飯嘛, 去到都真係食餐飯啫, 雖則好多唔識的人, 係D大陸親戚喎! 食到差不多9點老公先閃, 踢波喎, 咁我9點幾都閃了, 柏仲要瞓, 我仲要返去同兩隻嘢沖涼等等, 10點半先K.O.到柏仲, 子元就11點先搞掂, 攰到顛! 老公都11點幾返嚟囉, hea陣都瞓啦!

<齊齊等西鐵!>

 <坐得子粗魯!>

28/11/14

28/11/14   FRI   WARM

今日預咗下午出去做工展D嘢, 所以朝早都盡量做好自己嘢先, 朝早如常啦, 但等42等到差不多9點先入到去, 下次都係唔等, 想比吓機會佢都唔得! 返到去都係做吓自己嘢, 然後prepare吓下午做證要做GE嘢, 食埋午飯就出去啦, 先去旺角鋪頭嗰邊做一做嘢, 再去廠商會做證, 因為有額外證, 又要貼貼寫寫咁, 好在我做好哂準備功夫, 都算快搞掂架啦, 又要再過商會攞信紙, 深哥又叫我寫吓呢樣嗰樣咁, 都4點幾先走, 返得美孚都5點幾, 去買咗餸返屋企先, 執好笨元游水D嘢, 然後再整一整D餸, 又要出門口去小童揍佢地游水, 返屋企再煮飯, 全部人都未返, 我可以好靜咁煮吓抖吓, 差不多8點老公先返到, 咁我就落去揍佢地囉, 程生都遲, 喺巴士站先meet佢地, 返上去沖涼的沖涼, 煮飯的煮飯, 嘈的繼續嘈, 柏仲成日要自由, 但又唔知危險, 好麻煩! 飯後先餵柏仲食藥噴鼻等, 喊到拆天咁! 跟住我快手洗埋碗, 再趕笨元做功課, 叫佢做佢就玩, 激死我, 等佢地閃咗我餵柏仲時叫佢做功課佢就喺枱瞓咗, 唯有叫佢明天先做囉! 終於到我沖涼啦, 真係要抖抖, 好攰呀! 11點多已頂唔順, 睇咗一part新聞就瞓!

27/11/14

27/11/14   THU   WARM

身體健康真係好緊要, 不過成日唔夠瞓其實都好難有足夠抵抗力! 柏仲有得瞓就唔瞓, 鬧鐘一響彈起身, 喊住要你抱佢, 真係頂佢唔住, 不過我好堅持要佢等我梳洗完先理佢, 因為放咗佢出廳就搞亂檔, 笨元今日都好乖自己起身, 不過係之後慢D囉, 趕趕地落到去上校巴啦, 返上樓叫醒老公幫手餵藥, 要兩個人先搞得掂呢條友仔, 諗住摺完衫先餵奶, 條友竟然食得1安就唔食, 可能係鼻塞, 但同佢通番個鼻之後都係唔食, 可惡呀浪費! 過到青衣咪食吓通粉囉, 快手完我都返工啦, 今日都幾忙呀, 朝早係到prepare工展證的相, 本來諗住今日過去架, 但計計吓明天早D過去可以早閃去揍笨元去合唱團都好呀! 下午叫做free d啦, 但想休息吓, 食咗藥個人都吽哂, 我都知傷風會自己好, 但個過程就辛苦D囉! 放工返去揍笨元, 做好功課溫哂書, 咁買餸買米返屋企就沖涼煮飯啦, 而家比笨元做網上功課後佢又唔知係到搞咩, 老公7點多我未沖涼就返到嚟, 所以都有D亂咁煮好餐飯, 8點左右開飯, 飯後執拾洗嘢期間老公就睇住柏仲, 係笨元一玩開咗就收唔番個心, 之後執書包校服都亂, 好在默書都識, 咁就放過佢啦, 執埋D手尾10點幾先瞓, 我就已經超攰啦, 11點多未睇完新聞已想瞓!

26/11/14

26/11/14   WED   WARM

今日好忙好忙, 放一日假啫, 洗唔洗咁忙呀? 朝早要揍哂兩隻入去嫲嫲到, 因為運動會後放假一天, 不過晏咗入去, 又要餵藥又要餵奶, 真係攞命! 食埋早餐我就閃了, 返到公司upload番哂D相先, 跟住寫番日記, 就要開始prepare中午開會D嘢, 12點多出咗去開會, 雖然lunch meeting, 但都開到兩點有多, 回來後整吓工展D嘢, 老公又打嚟講番笨元做評估D嘢, 原來政府嗰D要等一年, 才有得見醫生, 評估完係有要再等兩年先有得醫, 咁等法唔怪得D人個個去哂私家做評估啦! 不過私家真係好貴, 6K-9K不等, 聽到都驚! 再諗諗點搞先, 老公都好積極咁找資料又睇人地教授的講座, 叫做了解多咗! 我就忙住開會, 放工先得閒同佢傾! 今日返嫲嫲到食飯, 幾耐冇試過咁hea, 我食咗藥個人吽吽地, 但應付笨元陪佢玩吓, 柏仲都好快醒咗, 咪一齊入房玩囉! 跟住老公回來就食飯啦, 然後都係撘車返屋企咁囉, 返去沖涼餵藥, 笨元好合作地沖好涼就溫默書, 係默漏咗字囉, 比佢玩一陣就瞓啦, 我食咗藥都呆呆地, 睇埋新聞就瞓啦!

25/11/14

25/11/14   TUE   WARM

今日真係辛苦過返工, 6點半起身搞掂柏仲叫醒老公, 約咗Lewis車咗柏仲入青衣先, 跟住再出嚟接番我地去運動場, 咁8點前都去得切, 呢幾程車已經慳番好多! 去到就帶咗子元去集隊, 我就去番義工家長嗰到攞資料, 知道自己做咩就去看台嗰到囉, 因為我負責看台, 會合埋程生咪一齊上去囉, 開台只可坐最前, 但曬到顛! 老師帶咗各班上嚟後, 義工家長就要幫手將D小朋友分類到不同項目, 又要維持吓序啦, 跟住老師會call名叫參賽的同學排隊等風紀帶落去, 分到咁上吓就可以休息吓, 之後D家長開始坐哂上去看台最高, 實在太曬! 到子元跑時, 佢喺佢嗰組係第一, 但其實係本來第一嗰個到終點時收油, 不過都入唔到三甲, 但都好叻仔架啦! 到10點多就call家長參加賽跑的去司領台報到, 不過等咗勁耐囉, 好在一班阿太喺到吹吓水時間都好快過! 過到起點又要等一輪, 之後再有家長加入, 睇到有一個裝朿都幾行, 估佢都幾勁, 我仲要同佢同一heat, 都好GE有D競爭對手, 其實大家吹水時都係話玩吓, 但我地呢D學咗咁多年跑步的, 一跑番上手原來都仲有D勁兒, 自問未出哂100%力架, 跑到第一都好開心, 睇埋時間係9’21. 算唔錯啦! 程生拍咗片, 可以睇番我贏幾條街呢, 哈哈! 頒獎禮喺閉幕禮時才進行, 可以去換番衫似番個人先, 上番看台已經冇幫手啦, 太攰了, 咁就坐喺最上嗰到吹吓水囉, 到差不多12點落番去等閉幕等頒獎, 上台攞獎真係好好feel, 哈哈! 不過子元話, 讀到陸子元家長時D同學望住佢, 佢覺得好怪喎, 傻豬嚟GE! 攞完獎影吓相就返上去看台啦, 完哂就等學生喺跑道企好, 家長先去接, 亂亂地架不過都好快接到笨元, 去廁所換埋衫就入青衣, 約咗嫲嫲食午飯, 揍番柏仲再去康傑攞番珠心算張證書, 又探吓D老師咁啦! 都同龍校長傾咗小一班主任話子元過度活躍症個問題, 咁龍校長梗係話唔係啦, 但都話照去check咗先, 比番老師睇囉! 之後我地就去觀塘啦, 因為APM有snoopy的展品, 去潮聖吓都要! 撘42C過去齊齊瞓哂, 落車時又要抱子元又要抱柏仲都幾係嘢, 去到apm係咁影呀影, 不過張全家幅都唔算好靚, 可惜! 影完冇咩行就去番德福, 子元淨係掛住睇玩具, 柏仲都係! 6點左右去食埋晚餐就回家, 我超攰呀, 沖好涼食藥的食藥, 食奶的食奶, 忙碌非常, 仲要睇埋子元的功課等等, 10點前K.O.哂佢地到老公幫我按吓腳啦, 唔係明天真係唔洗行!

<看台上!>

 <落場準備比賽!>

 <一班等跑的阿媽!>

 <朋友仔!>

 <三位飛人媽!>

 <我第一, 哈哈!>

 <好多snoopy!>

 <攞我個牌扮哂嘢!>