21/11/14

21/11/14   FRI   WARM

今朝都係如常咁揍笨元撘校車啦, 跟住就同柏仲去嫲嫲到, 都係如常咁啦, 返到公司都係做吓公事咁, 都好多嘢要做呀, 所以都做唔到廠嗰D嘢! 午飯後就睇吓新劇啦, 又幾好睇喎! 下午都係做吓公事做吓私事咁, 放工仆去買餸返屋企整好又要出去揍佢地合唱團, 喺體育館換緊衫時竟然收到班主任電話, 原來子元今日喺學校禮堂聽講座時, 係咁踢前面張櫈, 搞到人地舉手投訴, 跟住臨放學時, 又有同學投訴佢搞人書包, 所以班主任就要打嚟講吓, 睇吓佢究竟係咩事, 懷疑佢會唔會係有過度活躍或者專注力不足等, 搞到我成個人down哂, 其實我都唔係冇諗過呢個問題, 應該話一早已經有問過幼稚園的老師, 但可能幼稚園始終鬆D, 小學要求係嚴格好多, 所以老師會提出呢D疑慮! 一路傾到屋企樓下都未傾完, 我再問老師會唔會因為有細佬喺到, 影響到子元的情緒, 佢一聽到呢到就話最大機會係咁, 始終我地一定冇可能二對一咁伴住佢, 而對住佢的通常係我, 我又好少會玩, 成日都係溫書做功課, 而讀書壓力又大咗, 咁都會令佢有呢D行為喎! 但點都好啦, 我都因為呢通電話而變得有D彷彿, 你話子元係好嚴重的過度活躍就一定唔係架啦, 但若佢真係有D, 我又覺得不如早D同佢做training, 等佢唔會因為咁而影響生活! 講番晚飯時間啦, 都幾混亂吓, 一嚟唔夠米, 最終齊齊食出前一丁, 二來程太要揍咗個老細, 唔多得閒理D細, 我地又要煮餸又要睇咗D細, 真係超亂! 好在最終九點幾都叫做食完, 入房餵咗柏仲食奶佢就暈咗啦, 出番嚟見老公竟然洗緊碗, 雖然之後都要執吓手尾, 但都好難得! 咁我就入房睇笨元功課, 今日又OK喎, 日期都寫哂有漏! 不過我就收到張回條係話要返去補課, 係小考後成績未如理想, 原來80幾分都係未如理想要加操, 我都上咗賊船添! 但老師又叫我唔好迫咁緊, 真係好矛盾, 我都要諗諗點搞先! 今晚已經超攰, 沖完涼後抖陣都12點囉, 瞓覺!