17/11/14

17/11/14   MON   COOL-

又要返學啦, 柏仲明明鬧鐘響都未醒, 但我都未捉到笨元起身, 佢又已經醒咗, 真係服咗佢! 搞掂就落樓啦, 今日都唔算好凍, 但都問吓D家長有冇校服比到我! 返上樓又係餵奶再摺衫再出門口啦, 入到去食埋早餐就返工啦, 今朝都係做吓自己嘢先, 寫吓日記upload番D片咁又一朝! 午飯又要出去買飯, 下午都唔願做嘢, 明明要做廠嗰D嘢, 但真係愈諗愈唔抵, 唔想做住, 拖吓先囉! Hea吓上吓網又放工了, 返去揍笨元, 回家沖好涼又開始作戰, 邊煮飯邊叫佢做好D嘢, 又做埋網上, 等老公回來又話要快D食完飯落去同個囝打乒乓波, 點知落咗去又冇得帶因為晏唔開喎, 查實我就唔想GE, 又要洗碗又要睇住柏仲, 又要子元溫埋默書, 其實已經好唔夠時間! 返上樓後又叫佢練拋波, 結果玩到成身汗又要沖多次涼啦, 同佢對功課時又要執錯漏, 又要叫佢做埋小考改正, 數常都係得八十幾分, 不過不失囉! 後來先發現手冊寫住欠交中文小考改正, 但我好肯定有放入功課袋架嘛, 子元都話有交, 係班主任課交咗, 我估係應該嗰堂先交但佢一早交咗出去咪冇得交咪欠交囉, 唉…我仲要冇留底添, 真係唔見咗都唔知點算! 之後仲要默埋書, 又要餵埋柏仲同哄埋瞓覺, 隻豬仔今晚竟然可以扶著地下企起身行, 但當然係好唔穩啦, 不過已經好叻仔啦! K.O.埋笨元可以休息啦, 勁眼瞓囉, 11點未夠就想瞓, 點知柏仲未夠12點時喊, 我都攰到聽唔到, 係老公入嚟發現柏仲嘔, 又要做一輪清潔先瞓得!