28/2/15

28/2/15   SAT   COOL*

今日都係如常的星期六啦, 朝早8點多起身搞掂兩隻嘢就返工啦, 今日都係冇咩mood做公事架啦, 所以都係做吓自己嘢咁啦! 差不多1點老公先揍兩隻嘢過嚟, 因為柏仲瞓到12點幾呢! 一齊去Aeon嗰邊食午飯, 再行陣商場, 笨元就去打乒乓, 本來打兩個鐘, 我地返屋企化算D GE, 但見柏仲返去又唔會瞓住, 不如去玩吓, 於是去咗海麗那邊的遊樂場玩, 我地包場玩, 本來玩得好地地, 點知豬仲諗都唔諗就由一個自己根本一級落唔到的地方行落去, 結果咪跌鬼咗落地囉, 真係好笑笑小電影架, 過去睇吓佢係喊咗陣啦, 左眼角損咗同少少紅腫啦, 好在今日才星期六, 有時間好番唔怕比嫲嫲發現! 玩多陣就去海麗商場行下, 到4點幾去買定雞蛋仔接笨元囉! 回家後就要溫書啦, 老公噯笨元又唔肯瞓喎, 到笨元溫好書, 我又試吓噯啦, 條友擺到明攰但又掛住玩, 打暈咗佢之後我地可以靜吓, 仲叫咗Pizza Hut食, 食完先叫醒柏仲, 都八點幾啦, 餵咗D飯佢食, 之後就放佢玩囉, 到10點幾先再K.O.過佢!

<爬! 對柏仲來說冇難度!>

 <幾輕易上到嚟!>

 <最鍾意玩轉轉轉!>

 <石春路....冇知覺咁!>



27/2/15

27/2/15   FRI   COLD

今朝原來凍咗, 我又冇為意搞到著得條短裙凍鬼死! 朝早七點幾起身搞掂自己叫醒子元, 柏仲8點多都未醒, 想佢瞓晏D時又唔見佢咁! 都要叫醒佢起身食奶過嫲嫲到啦, 好在趕到架42, 好順利入到去跟住就返工啦! 今日的起心肝做商會D嘢, 冇辦法唔做啦, 老細開始食飽飯冇屎疴, 身在千里外都要whatsapps嚟煩你! 午飯咪去買飯囉, 明明有個飯喺雪櫃都唔記得拎, 可惡! 下午都係好努力工作, 係到5時多才休息吓做吓自己嘢, 放工返入去揍番兩隻嘢, 咁啱老爺嚟搵埋奶奶出去食飯, 就車埋我地返屋企, 然後到笨元游水, 我地去大家樂食飯, 老公食完就揍番子元返屋企先, 我去759shopping完就返去, 又買咗好多嘢! 沖完涼餵埋柏仲啦, 佢而家識要求多多, 知道食奶要行去邊找邊個, 食完噯咗一陣都喊架, 但喊陣都瞓番, 哄埋笨元就自由時間啦! 睇吓legoland water part囉, 真係幾唔啱玩, 都唔洗買combo飛啦!

26/2/15

26/2/15   THU   WARM

今朝嫲嫲出嚟, 所以瞓到8點先起身, 不過柏仲都早早醒咗係到嘈! 嫲嫲嚟到我就買埋早餐返工啦, 返到去都係做吓自己嘢, 吹吓水咁, 再繼續沉醉喺我個新加坡planning中, 我都知我係誇張架啦, 要plan得咁仔細, 但唔plan到時冇backup真係唔知點算好! 午飯去咗食譚仔, 雖然人多但等吓咁都好快, 下午繼續plan, 襯老細不在的日子做咗先, 到時佢返咗香港就冇得咁free架啦! 放工返去揍埋柏仲, 等老公同笨元喺林醫生嗰邊做完職業治療回來就去曼克頓山嗰邊晚飯, 柏仲好叻仔呀, 撕到一粒粒D雞肉同包佢可以自己食, 嫲嫲又比小龍包佢食, 幾開心! 回家後就沖涼玩陣啦, 我就抺一抺個地, 過年後好似未抺過地, 我都覺得有D過份! 咁沖埋涼餵完柏仲交比老公, 我就同笨元溫默書啦, 條友完全唔掂, 搞到我又要變一變惡人, 再教佢方法記囉, 都真係好難叫佢完全自己搞掂GE! 溫到10點前都搞掂可以瞓覺啦! 我地睇完沒關係都瞓啦!

25/2/15

25/2/15   WED   WARM

今日完全唔知醒, 子元又半夜三更叫我起身裝水佢飲, 搞到我又瞓唔好, 8點都係老公聽到廳個鬧鐘我先醒, 不過由於太晏, 陸生又因有事做請了假, 所以叫佢揍仔去嫲嫲到, 我直接返工, 否則太晏了! 食完早餐就做自己嘢啦, 都係睇新加坡D嘢, 想快D Plan好個行程, 入場卷就過埋截數先再訂囉! 午飯去咗買麥記, 因為想食將軍漢堡呢! 下午都是沉醉喺新加坡當日啦, 反正都未有mood做商會D嘢, 同埋諗住冇咩變, 都係咁做, 好快搞掂, 雖則得番半個月! 放工快閃了, 入青衣城同老公及笨元會合, 買咗飛睇企鵝呢, 笨元睇得不知幾投入, 套戲亦好好睇! 不過之後去食嘢時, 周圍都勁多人, 我又唔想食咖哩, 所以排別府, 見只係兩張枱咪等囉, 點知去哂D二人枱又唔去四人, 笨元一要等就係到嘈, 又周圍郁, 我又心急怕太夜返去接仲仲, 咪火起囉! 佢真係好冇耐性, 都唔知點訓練佢! 食完返去接柏仲啦, 咁啱入lift時佢就落樓, 行少程囉, 撘巴士返去時柏仲又瞓咗, 返去都要捉佢沖涼啦, 跟住食奶瞓覺! 自由時間先係幫老公手放好新買的printer, 原來而家D printer好平, 都啱用GE臨急要print嘢都唔洗煩! 沖好涼後再睇電視, 睇到點幾先瞓, 又喺大group嗰到吹水呢!

24/2/15

24/2/15  TUE   WARM

今日照常營業啦, 朝早7點幾起身了, 因為要揍兩個入青衣嘛, 都遲咗架啦, 所以只撘到8:55架車, 入到去馬上又撘番巴士出嚟, 買得早餐都9點幾, 返到公司都係寫番日記做吓自己嘢啦, 又找吓新加坡D資料咁! 午飯幾個同事去咗食開年飯, 食日本嘢呢, 真係超好食但都幾貴, 一個刺身套餐要$160! 下午又係找資料囉, 我真係要plan清楚嗰種人囉! 放工返青衣啦, 返到去柏仲以為有得走, 想衝出門口呢, 之後陪佢玩陣囉, 點知條友又爬櫈又跌到頭, 真係服咗佢! 食飯時用咗少少喝罵方式令佢坐定定食哂先比落地, 叫做成功啦! 飯後一陣都回家啦, 柏仲已經眼瞓, 喺巴士已瞓咗呢! 返去沖完涼9點多就再瞓番, 子元都9點半就瞓咗啦, 又有自由時間, 12點多就瞓!