2/2/15

2/2/15   MON   COLD

今朝真係超唔願起身, 好似比人打咗一身咁, 周身痛呀! 仲要捉子元起身換衫返學先辛苦, 佢琴晚咁夜先瞓! 跟住又要等柏仲起身食奶先出門口, 佢條友瞓到8點多先起身, 真好! 不過落到樓冇車囉, 諗住撘的士又喺哂對面線喎, 最終等到8:50真係冇車, 都要走過對面撘的士! 入到去都冇食早餐就返去, 真係攰到冇哂力! 所以今日用個輕鬆心情去做嘢, 反正老細又冇返就最好啦! 午餐有抽到唔錯獎的同事請食Pizza, 都好啦! 下午開始prepare吓商會嗰邊請人D嘢啦! 放工就返去接笨元啦, 佢放學返去只係瞓冇做過功課, 咁就死火啦, 返到去先做, 一嚟又多, 二嚟我要煮飯叫佢自己做, 做到開飯前都仲淨3樣未做, 叫佢食完飯再做啦, 成日話隻手好攰, 真係比佢激死! 到我洗好碗打掃好後佢叫做做哂, 但一對之下, 錯漏百出啦, 做漏一本又做錯哂, 完全冇心機囉, 激到我又變怪獸, 之後因為夠鐘餵柏仲, 老公好似叫我冷靜吓咁, 但到我餵緊時, 我又聽到到佢喺入面鬧! 可想而知條友幾乞人憎! K.O.咗柏仲後老公話佢已做好, 我都冇再睇啦, 叫佢執埋書包瞓覺囉! 終於有得休息, 要嚟個全身按摩, 真係好放鬆!