31/12/15

31/12/15   THU   COOL*

今日當然都係holiday mood啦, 朝早瞓到8點多起身返工, 兩隻豬仔就交比婆婆啦, 買好早餐返去食完都係做吓自己嘢啦, 基本上今日都係hea過, 你話我咩都好啦, 真係冇mood! 午飯後都係睇吓電視打吓機啦, 下午又係做吓自己嘢啦! 放工準時走人, 老公本來係早放架, 但點解冇早返屋企呢, 美其名就係office仲有同事埋緊數, 冇理由唔等埋佢, 實質係因為同D老細係到踢波, 正衰人嚟架! 最終返得去買埋飯比嫲嫲都7點幾先返到嚟! 我就快手摺起D衫出發去子慧屋企, 不過咁早去到都冇用, 因為最終都要等埋程生佢地買好嘢食嚟到先開始, 但柏仲真係餓啦, 所以比咗意粉佢食先, 大嗰兩隻就喺房玩囉, 梗係又成日嗌交啦! 終於等到程生一家到啦, 快手setup開餐, 緊係肚餓, 差不多10點先晚飯呀, 餓鬼死! 食完嘢都係吹吓水咁啦, 睇陣電視就開遊戲機嚟玩, 子元最開心啦! 玩到差不多12點了, 叫佢地出嚟倒數, 柏仲都唔係好知咩事架, 但就係拍吓手囉, 開番支白酒嚟飲, 好似好多年冇試過咁樣倒數迎新年了! 倒數完都係繼續打機玩, 不過柏仲頂唔住啦, 開咗支奶比佢喺Gloria房飲完瞓咗, 我地就一路玩到點幾兩點先走呀! 柏仲喺車仔照瞓, 返去放上床就算了, 我地都沖涼瞓了, 搞得嚟都3點幾先有得瞓!

30/12/15

30/12/15   WED   COOL

放完一日假, 真係冇咩mood返工, 不過…鬼叫你窮呀頂硬上! 仲仲7點多醒咗, 當然係到搞住哂啦, 點會放過你! 8點多起身梳洗, 笨元仲瞓緊, 等阿媽過到嚟我地就返工, 同老公出去北海道食個早餐先行, 以為今日會好多嘢做啦, 點知都唔算忙, 終於可以抖啖氣吹吓水! 午飯後都係睇吓電視打吓機啦, 仲仲又打電話比我呢, 子元把聲原來喺電話都仲好BB架! 下午都係做吓公事又做吓自己嘢啦, 係咁諗吓仲有咩要做, 放工準時走人啦! 返到去就執吓屋囉, 我返到阿媽就返屋企架啦! 執好屋等老公返嚟就一齊出去, 因為佢去踢波, 咁我見兩隻細GE喺屋企困咗一日, 就比佢地出吓去啦, 不過下次都係唔好啦, 因為柏仲唔肯坐定玩, 係要周圍走, 其實睇住佢都幾攞命, 佢真係走到老遠都唔怕, 仲同我byebye, 我話冇奶奶食架啦, 佢竟然點頭, 比佢激死! 終於踢完可以走啦, 近近地去新都會食, 試咗間粥麵嘢, 佢都有晚餐GE, 咁都幾好食喎, 二百幾蚊唔算貴啦! 撘的士返屋企快手同兩隻豬沖好涼瞓覺, 我最終衫都冇摺都瞓啦, 因為真係好攰!

29/12/15

29/12/15   TUE   COOL

今日我放假一天, 因為阿媽要覆診, 咁就順手入康傑交埋文件下星期可以返學! 9點幾出去食個早餐就過青衣, 交咗文件就返嚟, 去咗遊樂場玩到差不多12點才回家, 整午飯煮粥, 1點幾有得食就比仲仲食埋先瞓, 子元就梗係襯機同佢做功課溫習, 仲仲都算合作瞓咗兩個幾鐘, 咁就叫做溫咗英文啦, 仲仲起身就比佢地玩, 6點多出門口去會合老公食晚飯, 去咗大家樂食咋, 買吓嘢咁返到屋企都8點多, 沖好涼就比仲仲瞓覺, 子元就睇蟻俠, 老公就砌佢的機械人仔! 一日FTM工作又完結了!

 

 

 

 

 

28/12/15

28/12/15   MON   COOL

返工日, 阿媽過來睇住兩隻嘢, 好在笨元參加咗活動, 下午會出去, 咁我交代完都返工啦, 但今日真係冇停過手, 超攞命呀! 深哥過嚟寫票啦, 跟住其他公事冇停過, 午飯就去買飯同埋攞仲仲的學生相囉, 下午都係冇停過手, 堅係辛苦! 放咗咁多日假有排做! 做到放工唔理啦放工先啦! 返屋企接更, 之前仲要去小童接番笨元, 返到去都係簡單煮兩嘢餸, 因為老公今晚去飲, 得我同兩隻仔食! 阿媽stay到我整起大部份嘢先走, 怕咗仲仲呢! 食完飯就洗碗抺地沖涼, 打暈哂佢地我就自由了, 老公11點幾返到嚟就齊齊食個杯麵先瞓呢!

27/12/15

27/12/15   SUN   COOL

最後一日假期啦, 星期日都係如常學畫班啦, 老公就去咗踢波, 我要一揍二, 食完早餐去買吓嘢去埋圖書館又去接番子元然後回家, 不久老公都回來咁就佢哄仲仲, 我就煮D飯仔仲仲食, 之後都係執嘢嘢咁, 跟住就同子元做吓功課, 要做埋D讀書報告等等, 到4點幾仲仲起身先出街, 都係去葵芳行吓, 不過又係咁買衫呀鞋呀等等, 咁我地都真係過年前先買得多D啫! 最後連個電視架都買到買, 返屋企仲即時整埋, 掂哂! 明天又返工了!

 

 

 

26/12/15

26/12/15   SAT   COOL

今朝子元去咗學體操啦, 咁就早D打暈仲仲, 等笨元回來, 仲仲醒咗我地就可以早D出去街街啦, 先去北海道食個飯就撘巴士去九龍灣行megabox, 主力都係買嘢啦, 買咗好多嘢又行咗好多嘢, 預買定過年嘢咁啦都OK GE! 本來諗住喺呢頭食埋嘢先返屋企, 但因為要買飯比嫲嫲, 所以都係要返青衣, 去咗青衣城分頭行事, 買晚餐買波鞋等等, 7點多上到去食咗嘢先, 仲仲見到嫲嫲終於疴得出屎, 但就冇胃口食嘢, 咁我又好忙咁要幫忙打掃, 做到8點幾9點回家了, 順手搬埋好多奶粉尿片衫褲走, 返到去都係執嘢沖涼啦, 又打吓機咁先瞓!

 

 

 

 

25/12/15

25/12/15   FRI   COOL RAIN

聖誕假期開始, 一朝早就跟埋老公去踢波, 因為諗住可以比佢地去馬鞍山公園玩吓, 點知落雨喎咩都冇得玩, 我地去咗食早餐先, 老公就有D遲咗去踢波啦, 食完早餐返過去球場, 比佢地跑吓啦, 老公踢到11點就走啦, 約咗程生佢地飲茶, 撘巴士出去都係12點幾, 子慧都一齊嚟飲, 吹吓水咁食到咁上吓就回程, 老公揍住3個返荔欣, 程生就車我地去街市買今晚BBQ的食物, 快手買完佢就車咗程太佢地入青衣, 我就回家收拾, 等程生round2先車我地入去! 不過我地係去嫲嫲到先, 要幫嫲嫲買飯執屋等等, 6點到就行落去BBQ地點, 幾經辛苦終於找到, 上到去都係小朋友玩, 我就主力要睇住仲仲啦, 老公就去燒嘢食, 笨元梗係最嘈嗰個啦, 但都未至於要被針對, 由於有小朋友的姐姐有問題地追趕著針對笨元, 所以經過幾次後我終於嚟火, 我一火就會走架啦, 咁最終程太同另一個媽媽嚟勸我, 我咪返上去囉, 之後氣氛都麻麻, 不過我咪當冇事發生咁囉! 10點幾終於閃啦, 返去到快手沖涼, 11點半已經瞓得架啦, 真係好快手!

 

 

 

 

 

 

 

 

 

24/12/15

24/12/15   THU   WARM**

今日都係要返工, 但根本就係holiday mood! 朝早老公揍子元入去休到, 我就等阿媽嚟揍仲仲, 然後就返工啦, 返到去都係冇咩mood開工, 都係只做D非做不可GE事先啦, 老公今日又冇話返嚟, 但就突然朝早出現咗, 好在都係返一返啫! 午餐後去咗曬相整印同名貼等等, 因為仲仲1月返學所有嘢突然變得好急要處理嘛! 下午都係吹吓水, 買吓starbucks做TEA, 夠鐘放工就走人啦! 今晚瘋狂三人組報佳音, 所以約咗7點喺板板到食個晚飯就去追星, 佢地都準時8點左右就開始, 都係舊年嗰幾個點啦, 今年仲仲叫做第3次睇啦, 一出世嗰年都跟過一個點架! 不停拍片影相, 最後上埋去抽獎,所謂的獎都係捐出來的禮物, 我地又咁鬼好彩成日抽到喎, 咁車仔嗰D又未開packing的就比佢攞返去玩囉! 返得去都10點多啦, 快手沖涼打暈仲仲, 比子元玩陣才去瞓, 我地咪就係執嘢囉, 可能知明天放假冇咁願瞓呢!

 

 

 

 

 

23/12/15

23/12/15   WED   WARM

今日老公放假, 子元又已經放假, 得我要返工呢! 朝早7點幾先醒, 梳洗出門口, 佢地又跟埋一齊話出去食早餐呢! 返到去都係冇咩mood做嘢, 見有嘢要即做先做囉! 期間老公打嚟問我得唔得去醫院幫嫲嫲辦出院手續, 但我真係開緊工喎, 最終係佢帶埋兩個細上去, 但原來又未出得, 真係亂! 下午我都係做吓公事做吓自己嘢啦! 老公就喺屋企砌床, 然後同咗兩隻細去公園放電, 放工同我喺美孚會合, 佢就去踢波, 我就買少少餸返去, 要收拾殘局, 真係好亂呀, 仲要將個膠櫃放番埋去, 原來唔洗用嘢承住都放到喎, 非常好! 執GE時候柏仲梗係搞搞震啦, 都唔知鬧咗幾多次, 終於執起可以煮飯啦, 應該快D幫手嗰個又係到睇電視, 唔洗幫手嗰個又係咁上枱, 真係激死! 終於開好餐飯食, 由於丙完隻豬仲一轉, 佢好靜咁自己食完餐飯, 有時都係要極端D鬧吓先得! 等我洗埋碗抺埋地, 就同佢兩個沖涼, 呢方面子元就幫到手, 兩個喺廁所玩得好開心呢! 沖完涼攞件校服出嚟可以同佢影學生相, 因為學校打咗嚟話比柏仲1月返學, 咁下星期等我放假可以返去交哂D嘢! 影好靚靚就飲奶瞓覺啦, 新床仔冇咩問題, 照瞓! 子元就話要睇電視, 咁都比佢睇啦, 佢話佢做哂功課除咗專題同閱讀報告! 咁我沖好涼出嚟老公已踢完波返嚟, 子元仲有甜品食, 食飽飽我都好攰, 快手瞓覺啦!