31/3/23

 31/3/23     FRI.    RAIN

終於最後一日返學喇，真係好興奮，大家都放早嘅星期五，非常之充實！朝早照常湊咗細佬返學我就返工，雖然今日要跟對面妹，但係都冇乜嘢，炮哥佢哋問今晚去唔去睇馬戲團，本來都有啲猶豫，不過我哋只要買多咗張飛，就可以一齊去睇，其實都幾抵，同埋我都想睇好耐，不過老公實唔會去睇，大家一班人去，佢就可能會去！最終我幾經辛苦上網買到飛，因為喺學校開住工咁樣嚟買飛其實都幾艱難，好彩都俾我搵到機會快快手手做咗佢！學生們12點就放學啦，我哋12:30要去禮堂聽校長講嘢，佢都好快手唔使半個鐘就搞掂，期間我哋仲食咗午餐，都係三文治咖啡咁簡簡單單！我見時間許可，就叫哥哥唔使去接細佬，我自己慢慢揸車過去接都仲可以！返屋企會合咗之後就去郵局攞郵件，不過又大雨又塞車， 10分鐘車程揸咗半個鐘有多！攞元件喺附近食埋午餐，就返屋企準備今晚去睇馬戲團啦！早啲出發，過到去同佢哋會合佢哋會合，一齊食咗晚餐先入場，去咗食一間日本嘢，老公好豪氣咁叫咗刺身，仲有食咗四個拉麵，咁就冇咗100磅，不過又真係幾好食！馬戲團係今日重點，我都唔知自己其實有冇睇過，不過佢呢個似雜技團多過馬戲團，總之每個表演同埋間場都做得好好，我哋今次俾咗13個就可以全家一齊睇，其實都幾化算足足睇咗兩個鐘，差不多10點先至散場，所以返到屋企沖完涼都差不多12點啦！