30/4/14

30/4/14   WED   WARM

今日笨元終於可以返學, 再唔返就連跳舞表演都冇得表, 咁我嗰$200就凍過水! 好在今日有程生車, 所以我自己揍埋柏仲入去, 先放低我去青梅, 佢地揍埋子元返學, 再返上嚟接去車番我出長沙灣, 真係超好呀! 買埋早餐返公司啦, 今日都係冇咩心機做嘢, 但又唔做唔得啦, 因為老細佬上午返哂嚟開會, 好在唔洗我浦頭啫! 午飯前就走哂, 好在啫唔洗對住佢地食飯, 佢地都當埋食飯時間係佢地GE, 成日打番嚟叫人做呢樣嗰樣! 下午都係hea吓咁啦, 明天都放假囉, 放工返青衣買埋戲棚嘢食就返上去, 點知笨元食咗兩個蛋糕, 都唔食我買D嘢, 早知唔洗買咁多啦, 食到勁飽呀! 7點幾就閃人啦, 笨元已經一副要瞓的樣, 食咗藥係咁冇法! 柏仲都仲係有咳, 但又冇醫生睇, 好在唔算好嚴重, 唯有繼續食住中藥先! 我咁樣一揍二仲唔撘的士咩, 但呢D時候總係冇的士, 笨元又接近暈咁滯, 終於見對面馬路有車, 拖住佢衝過去都要架啦, 上到去兩隻都瞓哂, 最慘係落車後, 左手抱一個右手拉一個, 到沖完涼隻笨就醒哂, 咪比佢玩到9:30先瞓囉! 柏仲求先7點補咗3安, 因為之前5點嗰餐嘔咗, 所以頂到11點幾先再食啦, 老公都踢完波返咗嚟, 等佢沖好涼睇咗陣電視都瞓啦!

<發脾氣中!>

29/4/14

29/4/14   TUE   WARM

今日笨元繼續休息一天, 8點左右起身, 嫲嫲不久已到, 笨元柏仲都已醒咗, 但都要服侍埋佢兩隻嘢先出得門口, 買得早餐返去都唔早, 不過老細今日又係唔返, 點都free D! 午飯後就睇電視啦, 大老闆娘返咗陣, 但都唔阻礙我做自己嘢GE, 上吓網hea吓咁啦, 放工後返去, 見笨元冇咩事啦, 但嫲嫲話柏仲剛才嘔奶, 所以早咗叫肚餓! 返到嚟涼都未有機會沖又要陪笨元玩, 老公未夠6點半就返咗嚟啦, 大家一齊喺到講吓大包D嘢, 佢地兩公婆好似真係未諗掂婚後住屋問題, 真係服咗佢地! 食飯前沖埋涼, 咁食完飯就可以同仲仲玩啦, 玩咗陣就噯佢瞓吓, 到九點多佢已經扭, 可能嘔咗奶餓醒咗, 最終未夠9點半開咗6安比佢, 飲飽就瞓啦, 笨元都係咁上吓時間瞓啦, 明天可以返嘛要早D瞓啦! 唔洗11點幾先嚟餵奶, 可以早D瞓, 不過半夜聽到柏仲咳呀, 唉…十成比子元傳染咗啦, 又冇藥喎, 唯有比佢食住保嬰丹先啦!

28/4/14

28/4/14   MON   WARM

今日笨元要請假一天, 嫲嫲過咗嚟睇住兩個, 笨元琴晚好夜先瞓得到, 所以我地出門口佢都未起身, 仲仲起咗身, 但見到嫲嫲時呆咗, 嫲嫲即刻話佢呆佬認親人, 唔見兩日要望咗一陣先識笑, 真係比佢笑死! 冇餵佢飲奶就返工啦, 笨元仲沉睡中! 買埋早餐返公司食, 食完都係寫吓日先啦, 老細已經返咗香港, 縱使個人唔返嚟都會屎忽痕打嚟叫你做呢樣嗰樣! 到午要去買啦因為勁白痴地唔記得帶, 之後都係睇吓電視咁, 下午上咗維基時間過得好快, 到五點多時奶奶打嚟話笨元咳得勁咗, 於是我早D返去同佢去睇醫生, 老公又放工啦, 咁咪順手帶埋柏仲去食輪狀囉, 撘的士過去好快有得睇啦, 係等攞藥等得耐, 叫咗老公去買外賣先, 我就睇住兩隻細GE係到等, 攞到藥再帶柏仲去治療室交比姑娘食輪狀, 3個姑娘圍柏仲一個嚟食, 洗唔洗咁多人! 食完就閃得啦, 撘咗架舊的又要塞吓車咁, 幾辛苦先返到去呀, 馬上食嘢啦, 子元就食咗個包就食藥, 食完藥沖好涼老公就照顧柏仲, 我就搞掂笨元, 九點幾瞓咗之後又咳到嘔, 好在佢都識嘔落地, 床只係少少有得救! 11點餵埋柏仲餐奶就瞓啦!

<打機中的病人!>

27/4/14

27/4/14   SUN   WARM*

今日本來活動多多, 但笨元情況真係唔可以出去玩, 所以唯有在家休息! 朝早我地瞓到9點先知醒, 其實笨元入咗嚟幾次架啦但都比我打發走, 本來聽到佢冇咩咳應該好D, 點知食咗藥後又開始冇精神, 不過係出咗門口先係咁, 等我仲執嘢嘢帶埋車仔出去, 因為本來下午係去YMCA玩架嘛, 去咗麥記食早餐, 未食笨元就已經嘔, 但都冇咩好嘔, 食咗半個包就冇食, 揍咗去畫班我地就買早餐返阿媽到食, 因為老公要幫阿媽整廁所, 食完早餐同柏仲玩陣, 佢條友想瞓又唔肯瞓, 要人噯, 好在都噯得掂, 瞓咗差不多一個鐘起身食奶, 我就揍咗笨元同敏瑩放畫班, 本來諗住等柏仲食埋奶一齊食完午餐就去YMCA, 但笨元又攰又咳, 邊去得到, 所以只係去咗食lunch我地都係選擇回家, 笨元本來都唔肯架, 唯有呃佢活動取消咗佢先肯放棄! 返到屋企睇吓running men, 睇完佢肯去瞓一陣囉, 真係一陣就醒咗, 不過個人都係吽吽豆豆咁, 柏仲又係唔多肯瞓仲成日要人抱, 食奶前瞓咗陣, 6點食埋奶都係唔多想瞓, 不過我地照叫外賣啦唔理佢, 另外煮咗粥比笨元, 落D陳皮佢都肯照食, 因為真係成日冇食過嘢, 但就要人餵囉, 變咗BB咁! 食完到我地食Pizza, 9點多已經喺梳化瞓咗, 抱佢入房瞓啦, 但都咳醒咗好多次, 柏仲就11點幾叫醒佢食奶, 本來應該餵完就瞓, 但老公又掛住睇電視, 結果睇到2點先瞓!

<練吓企...不過好快就跌咗落地!>

 <瞓咗婆婆張床!>

 <洗白白好舒服!>

26/4/14

26/4/14   SAT   WRAM

今朝笨元要返學校綵排, 所以都同平時一樣要起身, 程生車埋我地入去, 不過有D趕咁未去買早餐比笨元, 所以要程生車咗我地去買個包先! 返到學校排陣隊先入到去, 見敏瑩個頭咁亂, 一問之下原來係程生梳, 唔怪得之啦, 即刻同佢札一札番好D囉, 雖則我都唔係札得好好架啦! 之後同家長們吹陣水先走人, 因為平日有D係姐姐揍的, 今日可能放假就自己揍返嚟, 差不多時間又要閃, 程生架車夠鐘! 返到公司都係hea啦, 笨元今日唔洗踢波唔會過嚟接我放工, 反而係我買飯返去食, 返到去已經勁餓, 佢兩父子開住個小米盒係到睇雷神, 柏仲剛食完奶, 噯咗佢一陣就放佢入房瞓, 我地就梗係食啦, 之後笨元開始愈咳愈西利, 但藥就係得嗰堆, 都係唯有食住先架啦, 平日唔洗午睡都喺梳化瞓著咗, 咪抱佢入房瞓囉, 老公又係瞓埋, 三個瞓哂我咪打掃囉, 間屋亂到呢! 笨元醒咗都係由得佢睇電視, 完全放縱呀, 病就係咁, 自自然然縱容佢! 到6點幾餵咗柏仲就等老公返嚟煮晚餐, 因為佢過咗阿媽到幫佢整嘢, 笨元愈夜愈咳得哂利, 食咗D粉食埋藥就瞓, 但瞓瞓吓都係咳到嘔, 好在教過佢有咩就嘔落垃圾桶, 佢又真係做到, 唔洗執手尾可以好快瞓番! 我地都餵埋柏仲11點嗰餐就瞓啦!

<練坐中!>

 <手長腳短好搞笑!>

25/4/14

25/4/14  FRI   WARM

今朝嫲嫲出嚟, 不過我都係要咁早起身, 跳次鄭多燕仲要餵埋柏仲, 因為老公仲瞓緊, 柏仲又醒咗係到叫, 冇得唔理佢, 好在都趕得切準時出門口去買埋麵包上巴士! 揍咗笨元返學我就返工啦, 當然唔忙啦, 不過老細下星期就返啦, 又要回復原狀啦! 午飯後都係繼續睇韓劇, 呢套聽見你的聲音真係唔錯! 下午等大老闆娘閃咗又自由, tea time仲去咗買starbucks食, 因為其中一個同事生日呢, 乘機食餐! 放工行到返美孚, 去咗萬寧同屈臣氏做咗格價專員, 兩邊格哂價, 邊間邊樣平就去嗰到買, 淨係濕紙巾都買咗4pack, 再送3包30張, 總之為起一定平啦, 睇怕呢大半年都唔洗買濕紙巾! 好辛苦地抬哂返屋企, 又要督笨元做功課先, 好在都唔算太多! 老公返咗嚟可以睇住柏仲, 奶奶就返屋企啦, 等笨元做好功課執哂嘢就可以出發去小童群益會, 不過敏瑩今日嚟唔到, 所以我地兩公婆去咗冰室剧扒! 接埋笨元比佢玩陣就回家, 沖好涼餵柏仲食埋餐奶就瞓, 我地hea咗陣睇埋套劇, 11點幾都瞓!

24/4/14

24/4/14   THU   WARM

今日如常地返工返學了, 老公揍柏仲, 我揍子元, 買埋早餐就返工啦, 老細依然未返香港, 所以都係冇咩心機做嘢, 午飯後睇吓電視咁啦, 下午大老闆娘返咗一陣就走, 所以都係睇吓嘢咁啦, 幾無所事事! 食埋個tea又放工啦, 行到過美孚先撘車, 郁吓好過冇! 返到去老公喺站頭等埋我一齊返去, 笨元仲睇緊IPAD, 同佢睇咗功課先, 不久就食飯啦, 放番柏仲喺床嘈吓啦, 食完飯先陪佢玩, 隻豬仔已經開始想轉身, 但又掛住食手, 轉唔到身就係到發脾氣! 7點幾走人啦, 剛趕巴士返去, 先沖咗涼就要笨元溫默書, 不過放得太耐假, 心散咗, 到我同佢默時都係唔識, 要再抄又唔開心啦! 柏仲就唔多願瞓, 放佢落床又係到喊, 到笨元溫習完咪比佢入房讀故事書比柏仲聽囉! 我就好眼瞓, 冇講故事就捉咗笨元入房瞓, 再喺梳化瞓到11點幾老公叫醒我起身餵柏仲呢!

23/4/14

23/4/14   THU   WARM

今日係子元6歲正日生日, 不過已經放咗5日假, 點都要返工啦, 今晚買蛋糕慶祝啦! 朝早瞓到八點, 等嫲嫲嚟到就出門口啦, 柏仲飲咗4安就唔肯飲, 由得佢啦! 買埋早餐快手返公司啦, 要過番哂D相落電腦, 又要寫番D日記咁啦! 上午話咁快就過咗, 午飯要去買飯, 簡單地食車仔麵咋! 下午大老闆娘返咗一陣, 好在都唔影響, 就算sales同總監返咗嚟都冇影響, 佢有佢地開會! 放工就買蛋糕然後同老公會合返屋企, 第一時間沖好涼先, 再同柏仲玩, 跟住食飯啦, 放柏仲喺學行車漫遊吓, 食完飯先同佢玩, 等笨元溫埋默書就影相切蛋糕, 有不錯的合照, 可惜柏仲瞓咗, 要嫲嫲抱住佢影! 柏仲可能未瞓得好, 放咗落床係咁喊, 好不滿咁, 老公都哄咗好幾次, 又開埋冷氣比佢, 到九點幾先叫做瞓得冧D! 執好明天返學D嘢就比笨元玩陣, 然後要錄畢業生10秒片段, 拖咗好耐啦一定要交, 都搞咗好耐先錄得好, 因為笨元又係有拍攝恐懼, 望住部機就呆, 搞咗好耐先有段好D! 10點要佢去瞓, 明天返學嘛! 老公就開始係到整小米盒, 終於setup到啦, 可以有好多劇同戲睇! 首先試咗開步步驚情嚟睇, 我知啱啱有得做, 雖然得兩集都睇住先啦! 睇完一集就馬上搞掂隻仲出嚟食奶, 邊餵邊睇!

<chok王生日快樂呀!>

 <洗唔洗咁可愛!>

 <同嫲嫲嚟個合照!>

 <個個都有望鏡頭的合照, 美人相機是最好的發明!>

22/4/14

22/4/14   WED   HOT

今日係迪士尼之旅, 好攰, 但笨元就冇呢個情況! 朝早瞓到九點笨元叫我地先起身, 馬上餵咗柏仲食奶, 執埋行裝就出門口, 約咗嫲嫲喺青衣城交收柏仲, 食埋個麥當當早餐就出發入迪士尼, 笨元都好期待! 去到欣澳已call定煊喺大門口等, 真係人多到呢! 11點半入到去, 喺大門口影埋相, 同笨元去埋toilet就可以開始玩, 先去poohpooh到攞fastpass, 然後就去排巴斯射鎗, 呢D笨元最鍾意, 跟住就去睇3D電影, 次次都有睇架啦, 但都係會嚇到! 之後去咗新嗰邊園區, 胡迪區對子元嚟講係睇GE啫, 樣樣都驚唔會玩, 跟住去迷離莊園, 我都未玩過啦, 不過都知係有驚嘢, 笨元都知知地, 但估唔到佢驚得咁緊要, 真係伏住唔敢睇! 時間差不多可以返番去玩pooh, 有fastpass排10分鐘就得啦, 笨元例牌有D驚啦, 睇完呢個就去corner café食午餐, 其實我已經好頭痛, 但又冇藥食, 只可飲吓咖啡頂住先, 埋單6百幾蚊, 不過又真係幾好食, 笨元仲有生日雪糕添! 差不多開始巡遊, 叫做找到個靚位啦, 就喺café 對出, 等咗十幾分鐘先巡到過嚟, 笨元都記得有得出去玩吓, 不過真係玩得幾吓又要返嚟! 睇完呢個要找地方坐坐, 小小世界係最好選擇, 都等咗半個鐘先入到去, 我真係頭痛到要瞓瞓! 所以玩埋小小世界就去騎馬仔就算, 之後去小鎮大街睇玩具, 終於都撞到CICI, 吹咗陣水再行咗陣就走啦, 走之前再食個甜品, 唔覺唔覺都6點幾先走到! 返青衣城食壽司, 好滿足! 上嫲嫲到接番柏仲, 又係傻更更咁樣囉! 撘的士返去, 馬上沖涼啦臭泊泊! K.O.咗笨元11點就餵埋柏仲啦, 今日真係夠哂攰啦!

<奇妙之旅開始!>

 <影得好好的合照, 出年帶埋柏仲嚟!>

 <火車控制員?>

 <影相位!>

 <扮胡迪!>

 <扮REX!>

 <未入迷離莊園幾得戚!>

 <三個一樣高?>

 <好搞笑的兩父子!>

 <困住都咁開心!>

 <啱哂佢...>

 <得個影相位, 冇嘢玩!>

 <勁餓...秒殺食哂!>

 <掛住食雪糕!>

 <最愛巡遊!>

 <扮鬼扮馬!>

 <夜晚影仲靚!>

 <臨閃合照!>

21/4/14

21/4/14   TUE   WARM
今日又係休息日, 安排到隔日大活動, 否則我實攰死! 八點幾起身餵咗柏仲, 等老公起身先去食早餐, 又同笨元砌緊LEGO呢, 所以11點幾先食, 去咗海皇食粥咋, 跟住去買D日用品咁就回家了, 反到嚟同才仲咗涼先食奶, 之後老公K.O. 咗柏仲後K.O.埋自己, 我就幫笨元衣櫃換咗季, 都好大功程呢, 搞完又要陪佢玩, 6點幾餵咗柏仲老公先醒, 佢又約咗人晚飯, 同我地上咗阿媽到一陣佢就出去, 我地就食飯啦, 之後砌埋蛋糕, 9時左右走人, 柏仲喺巴士瞓咗, 咁我回家後就輕鬆D, 同笨元沖好涼就砌埋盒lego再K.O.佢, 然後叫柏仲起身後餵埋奶就寫吓日記, 但攰到瞓著咗, 到老公回來才醒呢!

20/4/14

20/4/14   SUN HOT
今日真係攰到不能想像, 其實經過上年都遇咗會係咁, 不過笨元咁想要個生日會, 點都要搞多次大型比佢架啦! 朝早都係瞓到八點幾起身餵奶, 跟住老公煮早餐, 食埋就笨元去學畫班, 好在有程生車佢去, 咁我地可以專心pack嘢, 我仲順手幫自己D衫換埋季! 12點幾老公已call 咗雞記出發, 我就等程生嚟接, 咁啱柏仲又叫肚餓喎, 咪餵埋佢先出門口囉, 好事嚟GE! 點幾過到去會所, 已經要馬上開始工程, 老公預備緊氣球, 我就掛banner同預備飲品, 開始有幾個家長嚟到, 有D都幫吓手, maymay嚟到就入咗禮物先, 然後先陪我去攞壽司同蛋糕, 最估唔到係D食物唔多夠, 估唔到相隔一年, 小朋友的食力勁咗咁多, 真係勁唔好意思! 好快食咗嘢就玩遊戲, 不過D小朋友愛波波池多D, 其實唔多願玩, 同埋又要集合又要排隊, 係難搞D! 第一個遊戲係一二三紅綠燈, 叫做好快完成, 而第二個遊戲就係running men撕名牌, 比想像中難搞因為要二人一組, 早知唔理咁多由得佢地發顛亂撕就算, 最終都係大個嗰D贏! 咁就馬上開始埋打pinata, 咁就可以預備切蛋糕啦, 要開住咪先可以控制到佢地影相, 好在有埋maymay 喺到分蛋糕, 兩年生日會佢都係好重要的幫手呢! 分好蛋糕開始有人散啦, 於是咪派埋氣球同禮物囉, 因為執得嘢嚟都5點多, 望見D禮物真係頭都痕埋, 回家時直接坐雞記, 返去第一時間沖涼然後餵柏仲, 再約程生晚飯, 勁肚餓囉, 食埋麥當勞雪糕, 好滿足地回家了, 再沖多次涼後就同笨元同D玩具大合照, 搞得嚟又差不多時間餵柏仲食奶, 好好地瞓覺啦!

19/4/14

19/4/14   SAT   HOT
 今日要休息吓啦, 起碼我要休息, 笨元下午仲要去踢波! 朝早瞓到八點幾要餵柏仲啦, 之後等老公起身後就出門口, 約咗阿媽同阿婆飲茶, 飲到12點幾去惠康買埋嘢FOR明天生日會, 主力係買嘢飲已經百幾包, 用柏仲架車仔抬返去, 真係好誇張! 返到去佢地執好嘢就出門口踢波, 我就同柏仲沖涼飲奶, 跟住佢又扭眼瞓, 搞到我個地抺到一半都要理吓佢, 抱咗佢出廳一陣入番房佢又肯瞓喎! 咁我打掃完都可以休息吓先再執明天partyD嘢, 本來諗住出去食, 但撞正柏仲食奶時間我又唔想出去, 咪叫老公買外賣囉, 佢買咗口水雞, 超正! 食完同柏仲玩吓, K.O. 咗笨元餵埋柏仲餐奶又瞓得!

18/4/14

18/4/14   FRI   HOT
今日節目豐富呀, 朝早七點幾就要起身啦, 梳洗完就餵柏仲, 仲要執埋嘢先, 所以都要飛的入去, 因為買咗9:10戲飛睇美國隊長2, 喺茶水站食埋早餐交低埋柏仲比嫲嫲我地又飛的去青衣城了! 美國隊長真係幾好睇, 不過唔知笨元睇得明幾多! 睇完去買埋午餐返上青梅樓食, 柏仲剛食飽呢! 咁我地又食飽埋就抖陣出發啦, 去佐敦谷公園, 撘42去到撘咗1個鐘先到, 仲要搵吓路咁, 原來都真係幾多人吓, 同埋都幾曬, 不次嚟真係要帶足嘢嚟先掂, 玩咗陣遊樂場就找個草地玩吓, 同柏仲影吓相咁, 差不多時間就行番去撘巴士入西貢, 又係去咗個遊樂場先, 笨元可以玩時又可以餵埋柏仲食奶, 跟住行去海旁再食埋晚餐, 係好豐富的海鮮餐呢, 食完就再去食糖水才撘巴士出番九龍轉的士回家, 超攰呀! 同兩隻嘢沖埋涼食奶等就休息吓啦, 明天休息日, 預備生日會!

17/4/14

17/4/14   THU   WARM
完全holiday mood的一天呢, 朝早奶奶八點多就過到來, 不過我都餵埋柏仲先換衫返工, 朝早要prepare埋生日會D嘢, 要print好嘢嘛, 午飯早D食咗, 因為要去開會嘛, 約咗Nicho一齊過去, 買埋咖啡就去開會, 我地兩個老細今日都唔係到, 大家都想快D開完會就閃人, 所以真係好快開完, 3點幾已閃得, 返到屋企柏仲剛飲完奶, 唔理咁多沖咗涼先, 執嘢整吓嘢到6點叫Pizza食, 之後嫲嫲就返屋企啦, 點知我發現佢冇帶電話, 已經馬上追落去, 點知去到巴士站唔見佢, 都冇辦法唯有返番屋企, 諗番都覺得自己勇, 雖然只係落去一陣間, 但始終都係留咗佢兩個係到嘛! 最終嫲嫲都返咗上嚟攞番個電話, 老公踢完波十點幾先返到嚟, 我啱啱餵完柏仲呢, 不過就睇埋12點幾套劇大結果先瞓呢!

16/4/14

16/4/14   WED   WARM

今朝嫲嫲出嚟, 所以我瞓到8點先起身, 一覺瞓咗8個鐘真係好正! 梳洗後嫲嫲已到, 留番佢餵奶, 我地換好衫就出門口食早餐返工! 返到去都係做吓自己嘢又做吓公事咁啦, 好難咩都唔做GE! 午飯後都係睇吓電視打吓機咁啦, 所有老細都唔喺香港, 自由之外都會做吓自己嘢! 食埋tea就放工啦, 返到去屋企, 笨元問係咪做一行珠心算, 明知我叫佢做一頁佢就做一行, 咪即刻比我丙囉, 同佢沖好涼就即刻要佢做, 結果食飯前咪做好哂, 飯後同柏仲玩咗陣, 開始扭眼瞓, 抱住都扭, 於是放佢落床喊, 10分鐘唔洗瞓咗! 我地就開始prepare吓生日會D嘢, 最主要係氣球同小禮物袋, 真係剛剛好咋! 執好哂都係3盒左右, 到時有KAI哥幫手車入去掂啦! 10點左右捉笨元去瞓啦, 我地就要等到11點幾先可以叫醒柏仲食奶, 因為佢對上嗰餐7點先食呢! 老公一早喺梳化瞓咗, 其實我都好攰, 都一路餵一路瞓架啦, 但點都要頂埋先, 搞掂就馬上瞓!

<食手怪!>

 <明明食緊!>

 <一發現我影佢就縮手!>

 

15/4/14

15/4/14   TUE   WARM

今朝又係一早起身跳完舞就服侍兩位少爺啦, 柏仲飲得嗰3安就係都唔飲, 都冇法啦唯有放過佢, 因為今日我揍埋佢入去, 要快手出門口! 仲夠時間買埋個麵包先上車, 返到學校門口開始扭計, 可能我定咗喺到冇郁呢, 心情唔多靚! 揍咗笨元入去學校要即走, 剛好趕到43B! 放低隻粒就返工啦, 程太比埋條hip seat我, 今晚可以試吓啦! 返到公司就食埋個早餐做吓自己嘢啦, 老細今日飛番佢老家, 但未上機前都係咁打嚟, 超煩! 午飯後都係睇吓電視, 大老闆娘返咗嚟一陣啦, 所以下午都可以繼續做自己嘢, 放工就計劃去戲棚買嘢返上去食, 點知等咗勁耐都冇41A, 總之等到差不多6點先有車, 買埋嘢返得去都差不多7點, 其實都幾貴吓, 買咗百幾蚊呀, 但一年一次就算啦! 返到去柏仲仲瞓緊, 笨元玩緊玩具而唔係玩機, 都好啦, 食完飯執好嘢先陪笨元入房玩咗陣, 到八點幾先走, 撘唔到42撘咗42A, 順路去埋759買嘢, 結果買左百幾蚊! 返屋企後放低柏仲喺房, 我地就沖涼先, 佢就自己哄咗自己瞓啦, 所以等笨元瞓咗我地再抖吓先, 11點幾先餵佢呢!

14/4/14

14/4/14   MON   HOT

又要返工返學啦, 朝早再跳番鄭多燕, 跟住服侍兩位少爺, 趕得切出門口撘車, 送咗佢地返去又要返工啦, 買埋早餐返去快手食, 朝早做完自己嘢都有做吓公事, 午飯去買嘢食, 老細又一早返咗嚟, 嘈住哂人地睇電視! 下午又喺到喎, 不過算啦, 睇在佢明天就飛, 我又有個悠長假期就算啦! 下午都係prepare吓子元生日會D嘢, 諗諗吓都好似幾多嘢搞! 放工就撘地鐵去青衣城訂蛋糕, 然後返到上去笨元就掛住睇機, 柏仲就瞓咗, 差不多食飯先醒, 同佢玩咗陣老公返啦, 食飯食到半飽, 因為有下半場, 約咗幾個同學仔去戲棚, 好好地佢地已經排緊隊可撘單買嘢食, 食咗我最想食GE臭豆腐同榴槤冰, 超正! 佢地又玩得好開心啦, 柏仲比我放咗喺人地架BB車坐住先, 因為抱住佢冇手食嘢, 總括嚟講都好好玩好開心GE! 八點幾九點要走人啦, 又打的…好赤! 回家後未得閒理柏仲, 放咗佢喺B床, 佢可能比人玩到攰, 自我催眠咗, 咁我地沖好涼K.O.咗笨元又要開工整生日會D回禮袋, 貼好紙喺袋面, 零成本完成! 11點幾叫醒柏仲食奶, 不過佢都係瞓住嚟食! 睇埋套劇12點幾先瞓, 好攰!

 <食冰呀, 真係好正!>

 <子元要咗支薄荷味...>

 <鬥CHOK中!>

 <吹波中, 吹得夠大唔洗比錢!>

13/4/14

13/4/14   SUN   HOT

今日諗住出街架啦, 不過地點一改再改, 最終變咗近近地去荃灣咋! 今朝都算晏起身, 因為琴晚喺梳化瞓夠咗, 餵完奶到3點先再瞓, 今朝勁唔想起身, 好在柏仲食飽咗都冇起身嘈, 反而係笨元走過入嚟問呢樣問嗰樣! 老公八點幾起身去咗踢波, 我就照瞓冇理佢啦, 到我再醒時已差不多10點, 唔得再賴床, 起身發覺笨元喺到做緊珠心算, 應該係老公叫佢要做架啦, 咁都算乖仔! 梳洗完餵埋柏仲先煮早餐一齊食, 食完柏仲又扭, 就同佢沖咗涼先, 因為諗住老公踢到12點半, 差不多時間就入沙田會合, 但沖好涼隻仲又瞓咗, 於是唔出去住, 老公買D嘢返嚟我地食, 仲可以睇Running men, 笨元又可以砌Lego, 佢不知幾開心, 佢真係砌得叻咗好多, 係初頭砌咗變形俠醫隻手搞到我再出盡辦法幫佢拆出嚟啫! 睇完running men就執嘢出門口, 近近地去荃灣睇吓笨元張組合床, 仲有買咗D衫比柏仲, 見佢係有好多衫, 但都係大件嗰D, 而家只係得D夾衣, 找過都冇咩短袖啱, 所以去買番幾件比佢, 買得好開心呢! 睇埋組合床, 玩咗陣遊樂場再睇埋玩具就返青衣食晚飯, 奶奶話提早同大包慶生日! 返到去食飯前餵咗柏仲, 但食到一半又唔食, 唔理佢住我食咗先, 食完再餵咪食埋囉! Hea 到八點幾就回家, 坐kai哥順風車, 返到去沖好涼就比笨元再玩, 老公搞掂柏仲, 我睇埋笨元執書包D嘢就可以摺埋衫, 11點前K.O.埋笨元抖吓就捉柏仲食埋奶, 但佢完全熟睡咁只飲得4安! 我地都早D瞓啦, 明天又要開工!

<咁快砌哂D生日禮物!>

 <仲欠阿姨未送的美國隊長就齊!>

 <包面仲VS尖面元>

 <困住雙仲幾好!>

 <著番笨元的褲同鞋, 可惜找不回上衣!>