31/12/14

31/12/14   WED   COLD

2014年咁就完結啦, 今年都真係過得好快, 好多大改變, 好多嘢要適應, 大致上都冇話適應唔到GE, 總之都算係開心快樂的一年啦! 今日繼續係要返工GE, 奶奶出咗嚟揍佢地, 可以瞓晏D, 兩隻豬仔都未起身, 但我8點多都要醒啦! 搞掂佢地食咗脆片就出門口啦, 盡人事減吓啦! 返到公司都係做吓私事又做吓公事啦, 因為都真係好多好多嘢做咁, 做極都做唔完架喎! 午飯後去銀行, 好忙好忙, 下午都係好忙好忙, 5點幾準時閃人啦, 去買埋今晚打邊爐的菜就回家啦, 奶奶去咗wet, 阿媽過嚟幫子元溫書後順手接更, 咁我返到佢就走啦, 老公都好快返到, 各有各預備嘢啦, 7點幾開始打得邊爐, 慢打型式, 兩隻細又可以周屋走, 都係好事! 食完洗埋嘢, 沖埋涼就K.O.咗柏仲先, 子元比佢hea多陣先瞓啦, 我太攰了, 坐咗喺梳化都瞓咗, 同周公一齊倒數, 老公話叫過我都唔醒! 所以佢等我瞓到點幾醒啦先一齊返房瞓!

<2014除夕晚餐!>

30/12/14

30/12/14   TUE   COLD

今朝竟然瞓矮頸, 痛到我死! 仲要趕佢幾隻嘢起身入青衣, 老公琴晚漏咗電話喺嫲嫲到, 咁就佢入去囉, 我就可以執吓間屋先, 放假放到亂哂龍, D嘢都亂哂龍! 喺屋企食脆片先, 最多返到公司附件買多個包, 等自己冇咁失落! 朝早係咁做好自己嘢先, 再要prepare下午開會D嘢, 又要去買飯啦, 下午開足全個下午會, 都係開Annual Dinner嘛, 要找人做咪由得佢比廿幾萬人囉! 不過佢同人開會時, 真係醜態百出, 以為自己好醒其實係豬頭丙, 唉! 開到5點幾先開哂其他嘢, 咁都放工閃人啦, 好在今日入青衣, 又唔洗煮飯, 約埋老公仔一架巴士一齊返去啦, 同佢地兩隻豬玩陣就食飯啦, 飯後hea陣都返屋企了, 沖好涼餵咗柏仲, 比佢地玩陣9點幾就瞓覺啦, 我地就可以hea吓睇吓電視, 老公又要幫我按吓條頸啦! 睇哂星星先嚟瞓都12點幾!

29/12/14

29/12/14   MON   COLD

柏仲琴晚真係好可惡, 4點左右開始喊, 老公同我噯過都唔得, 放佢喊完一輪老公再噯先肯瞓, 足足搞咗個幾鐘, 真係唔明佢喊咩, 結果我地唔知醒, 奶奶8點幾過到嚟我地先知醒, 快手出門口, 買埋早餐返去食, 又要快手做好D嘢, 因為下午要出去開會, 都真係幾趕吓! 約咗Nicho點幾喺地鐵會合先一齊過去, 唔覺唔覺都開咗1個鐘, 不過最開心都係加人工嗰part, 而家加到4.5K, 不過都唔及深哥加到13.6K開心, 高人工過我囉! 好在計哂2份糧咁而家都唔錯, 走唔甩架啦! 4點幾先走, 返得屋企都5點幾, 要快手執嘢入青衣, 因為買咗飛6:30睇戲, 同埋奶奶子元柏仲撘的入到青衣, 再帶子元撘番巴士落青衣城, 剛剛好入場! 套Night at the Museum 真係幾好睇, 睇完都8點幾, 去咗快食個拉麵就返上去揍番柏仲, 剛好有42真好彩, 返到去先餵咗柏仲佢已經即瞓, 咁我地再沖涼囉, 老公比柏仲睇埋閃電俠先瞓, 我地就12點多就瞓囉!

<又睇戲又食拉麵!>

 <三人世界自拍吓!>

 <入唔到去影都影吓出面!>

28/12/14

28/12/14   SUN   COLD
星期日係早上學習日, 迫住8點前要起身, 不過已經遲了所以都唔想趕, 柏仲又醒咗咪餵埋佢囉, 搞到只撘到8:50班車, 食埋麥當當就揍佢地上去, 再去買早餐返去同老公仔一齊食, 點知條友話唔多舒服想食藥, 又要我去頂珠心算班, 結果我又要趕頭趕命咁出去囉, 因為學完就直接出街, 所以要執埋柏仲D嘢囉! 12點幾喺長沙灣會合過去mega box, 先去食咗午飯先, 跟住先再行街, 又係咁要睇玩具囉, 悶死人! 之後都係餵埋柏仲餐奶等佢瞓咗就睇吓衫, 買咗套飲衫比柏仲, 見冇咩行就去咗隔離零炭天地比佢地玩吓囉, 再返番去IKEA食晚飯然後撘MTR返屋企, 經過德福時諗住再行吓睇吓買唔買到我啱的裙啦, 最終喺馬沙買咗對黑色高跟鞋, 再經過一間唔知咩時, 見大減價喎咪入去睇吓囉, 千幾蚊條裙減到幾百蚊, 又啱feel喎, 試咗幾條最終都係買咗條黑色的, 折咗5百幾, 真係好開心, 不過就要再keep一keep先掂! 咁樣行吓就買齊最開心! 回家前仲去咗百佳入吓貨, 返去佢地沖好涼, 我就執好嘢先, K.O. 咗柏仲再沖, 之後仲有好多做, 明天又要返工了!

<柏仲捉住咗隻Bear唔比人走!>

 <比哥哥的恐龍陣圍住!>

 <玩樂中!>

 <零炭天地草地遊!>

 

 

 

 <參觀參到你咁舒服!>

27/12/14

27/12/14   SAT   COLD
今日都係忙碌的一天啦, 朝早8點多先起身, 搞掂埋柏仲就出門口了, 要返工嘛! 返去都係hea吓做吓自己嘢, 12點幾老公揍咗兩隻仔嚟玩吓啦, 跟住就去咗KFC食個lunch然後去工展會, 都係行吓迫吓食吓雪糕食吓小食咁就走, 去咗隔離維園公園玩到4點幾5點就去附近商場同柏仲換咗片食咗奶, 先再撘巴士入沙田, 6點幾就入到去, 忙忙亂亂咁食完飯8點幾就走架啦, 但因為笨元等緊巴士先話要去廁所, 搞到miss咗班車, 激到我顛咗咁滯, 搞到差不多10點多先返到屋企, 又要捉番柏仲起身食奶沖涼, 都幾係攰, 12點多搞掂哂就即刻瞓啦!

<可愛的聖誕B!>

<柏仲第一次過海!>

 <有得睇冇得食的分別!>

 <開始喜愛玩遊樂場!> 

 <玩得幾叻!>

 <可以周圍玩!>



26/12/14

26/12/14  FRI   COLD*

今日D時間好似唔係好夠用咁! 朝早8點多起身啦, 叫哂咁多個起身就梳洗好出去食早餐啦, 梳洗得嚟都9點幾啦, 出去食完早餐再去759買吓嘢就回家, 叫笨元做埋讀書報告, 因為我要整D嘢先, 咁咪比佢玩陣先囉, 點知叫佢收嘢就收唔到啦, 又要激火我, 搞到又慢咗先出到門口, 因為買咗飛1:15喺奧海城睇大英雄聯盟, 12點幾先出到門口, 去攞咗飛買咗嘢食就等入場囉, 估唔到真係幾好睇喎, 臨尾仲想喊添, 幾感人! 之後好趕咁喺UNICO買咗D衫再去反斗城比佢行咗陣, 咁就遇唔到時間返去學畫班, 遲咗半個鐘先去到畫至呢, 不過都冇咩所謂啦! 跟住我就要去買奶粉呀等等, 返到屋企都5點多, 柏仲喺到搗亂緊, 又要執嘢游水, 6點左右去到樓下酒樓攞定住叫定條魚, 咁程生佢地接咗畫班過嚟, 小朋友們就可以快食完去游水! 最搞笑係揍佢地落去泳池時, 喺車仔麵檔竟然見到Ms Mak, 原來佢嚟飲壽宴喎, 不過好明顯打定底先囉, Ms Mak可能個心諗, 放假都撞到你真係邪! 揍完去泳池咪返上去再食過囉, 柏仲都算係咁, 坐足咁耐食哂D飯, 差不多8點就去泳池接番佢地回家沖涼, K.O.咗柏仲, 子元就同daddy砌Robbie機械人, 都砌到十一點幾, 佢都冇幾何差不多12點先瞓!

<搗蛋仲!>

 <同子元一樣眼碌碌!>

 <難得兩個拍吓拖!>

 <就係去睇大英雄聯盟!>

25/12/14

25/12/14   THU   COLD
假期的一天, 老公8點就要起身, 因為買了9點飛去青衣城睇thomas, 我就喺屋企揍住柏仲, 本來食早餐時都幾好架, 仲有時間比我食埋先,  為放咗佢喺床仔又有嘈喎, 但到我想噯佢瞓時佢就係都唔瞓, 11點多老公打嚟話出旺角, 反正柏仲都唔瞓咪一齊出去囉, 不過又落雨又唔用車仔, 同柏仲出去真係好辛苦! 先去咗睇lego, 買咗份神獸比佢做聖誕禮物, 跟住就上咗新世紀周圍行吓, 仲有食咗午飯先囉, 又去一田買材料今晚聖誕大餐, 影吓相就回家啦, 白仲喺車已瞓咗, 好在返到去都繼續瞓, 咁我地可以各自做好自己嘢, 笨元D功課都叫做做好哂, 係欠讀書報告等等, 佢就好開心咁砌佢個神獸囉! 柏仲醒咗嫲嫲又嚟咗, 大家等食大餐啦, 柏仲沖好涼變咗個聖誕B咁好趣緻, 食飽飽咪hea吓睇吓電視囉! 今日都好快攰!

<好得意的合照, 柏仲又伸利!>

 <轉個方向影, 都係要伸利!>

 <同嫲嫲的合照好靚!>

 <聖誕老B!>

 <POSE王!>

 <笑得好可愛的聖誕老B!>

 <有帽冇鞋!>

24/12/14

24/12/14    WED   COOL


平安夜梗係冇得早放啦, 好在唔洗揍兩隻細入去, 所以可以瞓到8點先起身囉! 嫲嫲嚟到我就出門口啦, 返到去先買早餐先, 之後都係做吓自己嘢啦, 午飯前老細都係好唔通氣咁要佢答嘢又唔答咁啦, 食完飯繼續都有好多嘢做咁啦, 所以今日都好忙! 不過最慘係大老闆娘去咗廁所辨大事但個廁所通風壞咗, 搞到個廁所唔用得咁滯, 唯有放工去對面商場去, 幾誇張! 放工就直接返屋企先, 執好柏仲D嘢再出番去美孚食大家樂, 又撞到子慧呢! 快食完就去跟住笨元佢地去報街音呢! 之後仲有得去抽獎等等, 真係好多嘢, 我地仲要抽中咗架車仔呢! 散場後仲去埋麥記食雪糕才回家, 快手K.O.哂兩隻就休息了, 又唔攰喎點幾先瞓!

<準備報佳音!>

 <快D排好隊啦!>

 <終於投入到!>