18/12/14

18/12/14   THU   VERY COLD

今日係老公生日, 但只係晚上出去食個飯, 連蛋糕都冇, 相又冇影張, 好似好衰咁添, 不過佢就話冇咩所謂, 可能人大咗真係唔太再在意慶祝生日! 朝早如常咁揍笨返學啦, 不過要一早叫醒老公起身蒸燒賣, 因為今日笨元學校聖誕party嘛, 係老公先識點去搞保溫! 落到去啱啱校車到, 跟住快手返上樓搞掂柏仲, 好在今日嫲嫲過嚟, 因為怕柏仲凍要出去呀! 咁嫲嫲嚟咗, 我同老公就出去食個早餐先返工啦, 返到去都係做吓自己嘢吹吓水咁啦! 午飯後咪睇電視同抄埋廠D嘢囉, 終於叫做完成, 因為大部份佢地都攞返番去抄! 放工就仆返去揍埋兩隻細同奶奶一齊撘的去愉景新城食Outback, 因為book位只餘6點嗰個時間, 老公今日喺嗰邊做嘢, 可以早D去攞位先, 咁我地六點幾先到都仲得! 不過一來揍住柏仲, 食得好辛苦, 條友仔唔係掉嘢落地就係嘈, 真係好難搞! 二來呢間Outback已經唔好食, 下次唔洗再嚟! 食完就去咗反斗城囉, 都唔知邊個生日啦! 嫲嫲買咗4架thomas比笨元, 聖誕禮物喎! 都再冇去邊啦, 撘的回家洗白白打暈兩隻嘢, 又要整埋明天旅行日D嘢, 真係攰到冇人有!

<蜘蛛俠?>

 <原來係柏仲!>