29/2/16

29/2/16   MON   COOL

今日開始有車車我地返學啦, 慢慢感受吓呢種有車GE生活啦, 雖則我都仲係好赤D錢! 朝早又係拖子元起身返學啦, 老公整得午餐嚟都有D遲, 好在校車等埋! 返上樓同仲仲換衫, 老公去攞車! 唔洗趕住巴士, 可以遲少少出門口, 去到老公就泊埋架車食早餐先返工, 我就揍兩隻嘢囉, 買埋早餐返工, 朝早都係做吓自己嘢! 不過收到消息星期四會有個新人返工, 係做marketing嘢, 令到我有少少危機感, 真係好不安, 唔會係想炒我嘛! 中午時去埋銀行, 今個月有驚喜喎, 加咗5%人工, 咁應該唔會加完人工嚟炒我掛! 係都冇法啦, 都係要見步行步! 不過陸生又買咗架車, 我真係唔可以冇咗份工囉! 買得飯返去食得嚟都放完lunch, 真係要開始搞商會D嘢! 時間過得好快, 話咁快又放工, 去買埋餸先返去, 而家喺街市買餸, 雖然係要用現金, 但我都要開始練習少碌D卡用番現金多D! 買完返去, 柏仲瞓緊, 子元做緊功課, 寫咗程序表比佢雖然時控上未必跟得足, 但始於佢個人就好似有約束D咁, 唉…人都係要管架啦, 自問自己都係咁! 見仲有時間就對咗功課先, 但對對吓仲仲就醒咗, 好在都對得切先, 跟住開電視比仲仲睇我就可以去煮飯, 叫子元溫埋英默就出嚟陪仲仲, 7點幾已經煮起飯食! 今日老公好幫手呀, 因為佢想出去松記食糖水, 所以8點半就走咗出去囉, 咁樣出一出去食個糖水就用咗一個鐘啦, 不過柏仲今日咁晏先起身, 就比佢出吓去啦! 食完回來都9點半, 都要子元溫埋英默先瞓呀! 咁我沖好涼都趕得切睇J2套劇, 12點多就瞓啦!

28/2/16

28/2/16   SUN   COOL

新車要同佢改番個名先, 都係叫番佢個型號CUBE啦! 因為CUBE未有車位, 所以琴晚都係瞓街, 但唔好以為瞓街好易, 都要等位架! 朝早老公去攞番架車喺迴旋處等我地, 過去接埋程生就去畫班啦, 跟住就去咗食早餐啦, 都係去番平時嗰間, 食完就去check吓呔氣買吓嘢, 又差不多時間去接佢地啦, 車咗敏瑩返屋企我地都返屋企, 我又要變臉做惡人, 真係好辛苦, 又激到我喊, 完全冇自動自覺咁, 佢琴日話仲差一樣功課未做, 但我一check時點解呢樣又做咗D嗰樣又做咗D呢, 捉佢快D做又好似我錯咁! 仲仲見我咁就梗係閃埋一邊啦! 叫做做好番哂先再出去踢波囉, 我就K.O.仲仲瞓晏覺, 然後都係摺衫等等啦! 子元佢地3點幾返到嚟, 買咗外賣食, 柏仲知道有得食就醒, 咁食完都係4點多, 老公已經捉咗柏仲入房玩, 叫咗子元入房溫習, 但因為我仲收拾緊, 佢就喺到吽, 連坐去書枱都仲唔識! 又激到我顛, 浪費哂D時間, 最後我同子元喺房溫到6點多, 老公喺廳瞓咗, 仲仲就睇電視, 老公一醒就話已經咁晏, 我話差少少溫好架啦! 因為約咗今晚嫲嫲食生日飯嘛, 6點幾出發去買埋蛋糕就入青衣, 載埋嫲嫲就去愉景新城食, 去食上次好食嗰間日本嘢, 不過就要等位, 好在喺反斗城隔離, 咁可以邊等位邊比佢地睇嘢冇咁煩! 大包就自己撘車嚟, 食完豐富的日本菜就回程啦, 因為都已經9點幾! 返到去再切埋蛋糕, 食完就要回家啦, 返得去已經11點, CUBE找到夜泊位, 今晚唔洗瞓街, 返到去快手K.O.仲仲, 子元仲多多事實, 我話已經11點幾啦仲唔瞓! 老公都攰冇等埋我就瞓啦!

27/2/16

27/2/16   SAT   COOL

今日子元家長日, 但佢又要踢波比賽喎, 所以一朝早起身揍咗子元比契爺, 帶佢過去球場, 我搞掂仲仲就去地鐵站同老公會合, 因為要過敏瑩屋企接更, 佢地8:30見家長, 咁用佢地屋企做基地, 細路就喺屋企, 大人就出出入入囉! 敏瑩9:15去YMCA學嘢, 咁我就揍佢過去, 老公就揍住仲仲, 揍完敏瑩返返, 我地又等夠鐘就去學校見啦, 葉老師真係比較少嘢講, 不過佢比較負面D, 加上子元又係比較搞事D, 所以都係覺得佢GE多嘢講係麻煩事, 希望出年轉過個班主任會好D啦! 另外又係講佢歌詠班時唔夠合作囉, 唱唱吓又會停又唔交戲扮唱, 但佢又好積極要去練, 咁先矛盾! 都快手見完就去會合程生佢地, 因為要去接敏瑩, 同埋要去報復活節YMCA托管班! 約咗喺巴士站等, 但老公話佢之前訂咗嘢想去攞先, 咁我地咪過去YMCA先囉! 安頓好敏瑩我同程太就去另一間YMCA報名, 報好了程太就返去先, 咁我就等收據同埋會合老公, 打比佢話搞掂問佢喺邊, 佢話喺樓下, 咁我就落去啦, 但都見佢唔到, 就喺呢個時候佢喺架車到行過嚟, 叫我地上車喎! 我嗰吓真係唔知驚喜定驚嚇囉, 你買咗架車, 做咩會買車架, 你邊有錢買錢供車呀, 車位呢油呢, 點頂呀? 十九幾萬個問號喺個頭頂! 我估我當時個樣真係好好笑, 不過未得閒答我住, 因為要同休會合接番子元先! 子元原來早過我好多就知道daddy買咗車, 佢都真係口密呀! 所以佢應該冇我咁驚訝, 只係開心囉! 老公叫做慢慢答番我D疑問囉, 架車係二手車, 連稅5萬, 零首期月供$1300, 佢話佢cover到喎, 咁都買咗囉, 我可以點呢係咪, 唯有接受同埋我再慳D囉! 新車落地去邊呢, 都係原先決定咁去Mega box, 出乎意料咁冇咩人泊車喎, 去到先食咗嘢, 然子元見到嗰間立體影像館又話要入去, 其實我勁唔想GE因為好無聊仲要收$100, 但老公話不如比子元入去, 佢打暈仲仲, 咁入到去點都影到夠啦, 佢比柏仲入埋去影, 不過因為係恐龍, 仲仲都驚呀, 因為見到有隻係血盆大口的恐龍, 嚇到佢即刻喊! 所以抱番佢出去瞓覺啦! 我同子元就係咁玩囉! 睇完哂就同老公會合, 子元話去睇書局, 又買咗本書但係漫畫, 跟住就去行ikea, 又去攞吓靈感囉, 行完去買嘢食時柏仲就醒, 真係醒得合時! 咁跟住咪去咗AEON睇玩具囉, 我就去睇10蚊店, 但仲仲竟然扮大事, 搞到又要上去換片室換, 比佢地玩陣遊樂場就去反斗城, 5點多就走啦! 約咗程家晚飯, 先去長沙灣買粥比Fiona, 因為佢腸胃炎, 跟住去到程家安頓好, 我同程生落咗去買晚餐外賣返上去食! 今晚早D走啦, 程家要休息, 9點3到就走啦, 返到去快手K.O.咗佢兩個就可以休息啦!

26/2/16

26/2/16   FRI   COOL

今日都係如常啦, 朝早揍子元上樓車, 跟住揍仲仲返學, 跟住我就返工啦, 都係做吓自己嘢做吓公事咁啦, 下星期老細就返, 又要回歸現實啦! 午飯去咗買麥當勞, 試吓個新包, 但真係勁多人囉, 點半先返得到上去! 下午都係做吓公事咁啦, 放工夠鐘就走啦, 直接返屋企執好嘢整少少餸就去小童, 點知去到唔見阿媽喺到, 原來佢同仲仲落咗去食D嘢, 佢話佢下午唔多肯食飯, 所以要同佢去食D嘢, 仲仲近來又真係唔多願食嘢, 不過間中啫, 佢又唔係冇得疴! 合唱團overrun, 6:45都未放, 所以我都要同miss講, 時間關係在小童個廁所換埋先就算, 快手過到去都要等阿sir第二round出來接佢地! 老公喺泳池同我地會合, 咁一齊返去我就煮飯, 佢就主力搞掂仲仲啦, 等佢地上咗嚟沖涼開飯啦! 吹吓水咁又10點多先走, 不過程太病病地呀, 所以都早點走! 咁我沖好涼仲趕得切睇劇呢!