31/12/13

31/12/13   TUE   COLD

今日除夕但都冇咩好節目架啦, 朝早又係聽到蕃薯叫咪起身囉, 餵奶泵奶例牌動作, 老公要返工, 我就等奶奶過到嚟就返公司攞票, 廢事笨元搞事所以帶埋佢一齊去公司, 攞票之餘順手做吓嘢同埋過埋相囉, 搞掂去銀行囉, 排完中銀又去HSBC, 笨元都算合作, 比部機佢就乖乖! 去銀行後去埋超市再買午餐返去食! 下午都係嗰D啦, 餵奶泵奶, 四點幾頂唔住去午睡, 點知瞓到6點幾先知醒, 蕃薯又冇叫食喎, 搞到遲咗出門口, 因為蕃薯今日滿月嘛, 簡單地一家人食餐飯囉, book咗7點去桃園, 去到蕃薯先食奶! 我地就食到9點多回家啦, 返到嚟我搞掂泵奶就餵蕃薯食奶, 佢兩父子沖完涼就瞓啦, 我自己一個人倒數呢, 其實都冇咩所謂, 1點多餵埋奶就可以瞓, 不過蕃薯夜晚真係無端端就會大喊, 都唔知應該點算好!

30/12/13

30/12/13   MON   COLD

半夜4點幾就叫食, 真係難為老公啦, 我都有起身同佢換咗片先架, 到7點多又叫但只係叫幾聲, 等到8點真係嘈啦, 餵咗佢我先再泵奶, 老公就返工囉, 泵好奶就好忙咁為今日冇水做預備! 仲要快手煮埋早餐食, 又要顧住笨元唔好開水喉用, 仲有蕃薯一早就疴到自己一身都係尿咪順手喺冇水先同佢沖埋涼囉! 之後做吓公事又要餵奶啦, 中午都係食自己咋, 下午同笨元玩吓咁囉, 跟住都係做嗰D嘢啦! 奶奶五點幾先過到嚟, 不久就出門口去食晚飯, 蕃薯就瞓喺到陪我地食囉, 佢都算乖架啦冇咩嘈過! 回家後就要飲奶啦, 泵完奶沖涼, 我就瞓先啦! 由得老公餵嗰兩餐!

29/12/13

29/12/13   SUN   VERY COLD

今朝好忙, 因為朝早要去睇笨元合唱團表演, 蕃薯5點幾飲完奶, 我7點起身泵咗奶先, 再叫得佢地起身後又要再餵奶, 餵到咁上吓奶奶嚟接更, 我地換好衫就出門口啦, 揍咗笨元去會堂我地就去快食個早餐, 再上番會堂睇佢地表演, 不過都真係有排等架, 之前D表演有D悶, 有D又幾好笑架, 等到十一點幾先到佢地, 比起深井嗰邊個合唱團, 美孚呢個pro好多, 笨元個位企得好靚, 影相video都好靚, 但敏瑩企咗喺第二行都唔係好睇到, 搞到程生全副裝備都唔係好拍到都幾慘! 我地睇到1點都走先啦, 都冇咩好睇, 買埋飯就返屋企食, 蕃薯已經沖好涼, 等到3點先再食! 食完飯老公同奶奶又出咗去攞電話喎, 又得番我同兩隻仔, 4點捉咗笨元去瞓, 蕃薯又係食咗奶陪佢玩吓, 想瞓又唔係好瞓得著, 都係喺梳化坐吓咋, 老公打過返嚟話去聚客居食, 但我又唔想再出去啦, 仲要兩個都瞓哂, 蕃薯又差不多再食奶, 所以都係唔出去食啦, 最終佢地買咗聚客居D嘢返嚟食, 食完hea泵好奶又要餵蕃薯, 睇埋掌門人就沖涼啦, 等到12點隻蕃薯又叫食, 點知食得勁衰, 自從琴晚佢咁嘔法就比佢嚇到唔敢比佢咁急啦! 咪等佢半夜再叫食囉!

29/12/13

29/12/13   SUN   VERY COLD

今朝好忙, 因為朝早要去睇笨元合唱團表演, 蕃薯5點幾飲完奶, 我7點起身泵咗奶先, 再叫得佢地起身後又要再餵奶, 餵到咁上吓奶奶嚟接更, 我地換好衫就出門口啦, 揍咗笨元去會堂我地就去快食個早餐, 再上番會堂睇佢地表演, 不過都真係有排等架, 之前D表演有D悶, 有D又幾好笑架, 等到十一點幾先到佢地, 比起深井嗰邊個合唱團, 美孚呢個pro好多, 笨元個位企得好靚, 影相video都好靚, 但敏瑩企咗喺第二行都唔係好睇到, 搞到程生全副裝備都唔係好拍到都幾慘! 我地睇到1點都走先啦, 都冇咩好睇, 買埋飯就返屋企食, 蕃薯已經沖好涼, 等到3點先再食! 食完飯老公同奶奶又出咗去攞電話喎, 又得番我同兩隻仔, 4點捉咗笨元去瞓, 蕃薯又係食咗奶陪佢玩吓, 想瞓又唔係好瞓得著, 都係喺梳化坐吓咋, 老公打過返嚟話去聚客居食, 但我又唔想再出去啦, 仲要兩個都瞓哂, 蕃薯又差不多再食奶, 所以都係唔出去食啦, 最終佢地買咗聚客居D嘢返嚟食, 食完hea泵好奶又要餵蕃薯, 睇埋掌門人就沖涼啦, 等到12點隻蕃薯又叫食, 點知食得勁衰, 自從琴晚佢咁嘔法就比佢嚇到唔敢比佢咁急啦! 咪等佢半夜再叫食囉!

28/12/13

28/12/13   SAT   VERY COLD

今朝蕃薯7點叫過, 但塞咗奶咀比佢冇嘈就冇比佢食住, 但我要起身泵咗奶先呢, 泵咗大半個鐘都係得90ml, 咁不如唔好谷啦可以嘛! 泵完餵蕃薯食奶, 又要叫佢兩父子起身去畫班, 我就煮早餐食然後要做吓公事咁啦, 話咁快蕃薯又食奶, 我又要洗衫摺衫等, 邊得閒啫! 中午蕃薯沖咗個涼又食奶啦, 佢兩個去埋反斗城買埋禮物比下個月生日會D同學就返嚟, 我冇等佢地自己焗咗飯食就算啦, 佢地返得嚟都好晏! 晚飯都係食自己咋, 老公瞓咗叫佢又唔多願郁, 於是咪我去煮飯囉, 煮起先叫佢起身食, 然後都係泵奶沖涼啦, 點知到餵12點嗰餐時, 隻蕃薯食得急得滯, 嘔番哂出嚟喎, 嚇鬼死我地, 唔敢再迫佢食, 等佢夜D叫食時先再算!

27/12/13

27/12/13   FRI   COLD

今朝老公要去幫嫲嫲手將間屋大移位, 所以起身後就出咗去, 我起身餵完泵完奶先得閒煮早餐同笨元一齊食, 好在佢又冇話餓喎, 煮咗通粉同麵share食, 之後佢都係玩玩具囉, 不過就要佢做一部份珠心算先, 當然係激到你火起佢先安樂架啦, 心算時都好D, 珠算真係令你非鬧佢不可! 我又忙緊同蕃薯沖涼食奶喎, 咁啱阿媽過咗嚟都好D啦有人幫吓手! 之後再泵多次奶就煮午飯, 都係雞同菜囉我自己都開始悶! 笨元都係開始自己玩咁啦, 我都冇咩特別嘢做, 咪陪吓佢囉, 老公返到嚟一陣又要休息, 後來我都陪佢瞓咗覺, 7點先醒, 佢煮飯我餵柏仲, 食完佢揍笨元去合唱團, 我就繼續喺屋企囉, 襯有時間沖咗涼先, 話咁快蕃薯又食奶, 老公佢地都剛返咗嚟, 不過佢要K.O.笨元呢, 十一點到我都眼瞓啦, 蕃薯10點叫食食到11點先食完, 可惡呀, 之後我都瞓先囉, 唔知老公係咪都好快入嚟瞓, 因為蕃薯到2點多先再食呢!

26/12/13

26/12/13   THU   COLD

蕃薯5點叫食, 相隔咗4個鐘都算係咁, 點可以調較到6點飲呢? 咁先可以來到返學之後D時間呢! 笨元朝早約咗敏瑩去睇與龍同行, 咁我又食自己囉, 好想食吓大家樂的早餐呢! 早上都係做番嗰D嘢啦, 日日都係咁上吓架啦, 蕃薯日頭真係算合作架, 食飽就瞓, 若佢快D調較好晚上飲奶的時間咁大家都舒服囉! 中午時老公帶埋敏瑩上嚟玩, 程生佢地晏D先嚟接番, 佢兩個就開心囉, 又玩煮飯仔又玩雪糕屋, 食完午飯再玩Lego, 程生上到嚟都係吹吓水咁咋, 等蕃薯飲埋6點餐奶就去聚客居晚飯, 不過竟然要等位, 真少有! 今日都食得好盡興, 冇法啦, 知佢做埋今個月老公勁想去食囉, 今晚未算好凍都仲可以出去, 過兩日凍就真係去唔到啦! 食到八點多都要閃了, 返去快手K.O.笨元, 佢都已經勁攰啦, 跟住就餵柏仲啦, 到晚上佢就醒好多, 吹佢唔漲!

25/12/13

25/12/13   WED   COLD

聖誕節, 都係冇街去架啦, 蕃薯3點幾飲咗餐奶到9點先嘈喎, 若果佢調好個時間係12點飲完6點飲咁就一流啦, 起身餵咗佢我都要泵奶, 不過咁多個鐘都係得嗰6安唔夠, 快D唔谷啦, 唔谷我就唔洗泵啦! 老公起身煮早餐我地食, 同蕃薯沖埋涼佢就出去啦, 帶笨元去睇Thomas呀, 襯佢地出咗去我又有精神, 打掃吓間屋先, 真係唔可以咁耐唔執屋架嘛! 老公買咗米線返嚟做午餐, 笨元眼瞓得滯唔多肯食已經要瞓, 我地就輪流餵咗蕃薯同食嘢, 之後老公都瞓咗, 我就等connie嚟, 佢都五點幾先嚟到, 笨元剛瞓醒, 吹咗大半個鐘, 佢又做埋佢個聖誕老人送禮物比笨元同柏仲啦! 六點幾老公出去買晚餐, 我就餵蕃薯啦, 食完晚餐泵咗奶先跟住再食蛋糕, 聖誕節點都要食個蛋糕先似聖誕架嘛, 食完就沖涼瞓覺, 老公就餵埋餐奶先瞓啦!

24/12/13

24/12/13   TUE   COLD

今日係平安夜, 我地都有活動, 朝早都係如常, 下午軒媽佢地過嚟, 晚上笨元報佳音! 朝早起身餵咗蕃薯先泵奶, 十幾個鐘冇泵後乳頭都冇咁痛, 又泵咗150ml出嚟, 不過好快就比蕃薯清貨架啦, 泵完就煮早餐食, 笨元食咗麵包又食咗蛋糕, 到我煮麵食佢又要痴! 之後就自由時間, 奶奶過咗嚟煮D嘢我食, 阿媽又過咗嚟攞湯嚟, 食食吓午飯軒媽佢地就到, 都係吹吓水咁啦, 佢成日話我對蕃薯好殘忍呢, 咁我係咁架啦, 樣樣都咁緊張仲得了GE, 人都顛啦! 子元同軒軒兩個就玩到顛, 蕃薯就未夠鐘就叫食, 真係比佢兩個激死我! 搞掂隻蕃薯餐奶我真係要泵奶啦, 老公期間返咗嚟, 都好有佢陪軒媽佢地吹吓水唔洗冷落咗客人咁! 跟住我就收到個壞消息, 會計開票前問老細係咪開全份糧, 老細話冇應承過喎, 咁都冇法架啦可以點啫, 都要硬食架啦, 不過真係忍唔住要咀咒吓佢囉! 5點多老公揍咗笨元去小童群益會彩排, 然後就去聚客居, 我同軒媽一家就等蕃薯食埋6點餐奶先出去, 人多D可以食多D嘢嘛, 最慘係聚客居做埋呢個月唔做啦, 可惜! 食到7點幾就撘的士返美孚睇吓佢地開始未, 我睇咗兩個點就返屋企啦, 一班柴娃娃咁係到唱都幾搞笑, 成班家長就圍住狂影相, 程生更加成個戰地記者咁啦! 返到去餵咗蕃薯我就泵奶啦, 等佢兩父子返嚟沖完涼我先沖, 但隻蕃薯到我地瞓嗰時就係咁喊, 理咗佢四五次都仲係咁, 最終我攰到冇再理佢, 由佢喊到攰大家齊齊瞓!

23/12/13

23/12/13   MON   COLD

星期一老公要返工啦, 但笨元就開始放聖誕假, 其實睇住兩個都OK, 同埋奶奶阿媽又過嚟呢, 不過老實講我又真係唔介意自己一個人喺屋, 就算睇住兩個其實又未至於好吃力, 因為有時一個人一個做法, 冇人質疑亦唔需要解釋, 所以好似阿媽嗰時講, 揍住阿妹坐月時, 阿嫲淨係買餸上嚟比佢, 佢自己一個人坐月, 比起嗰時我要喺阿嫲到坐月, 舒服好多呢, 我都好有同感! 朝早我都8點幾先起身因為蕃薯未叫食, 蕃薯食咗跟住煮早餐我同笨元食啦, 中午阿媽同奶奶都過咗嚟, 不過阿媽過咗嚟一陣就走啦, 奶奶當然喺到啦, 有時又唔係唔鍾意, 只係佢太多維護小朋友的歪理, 話佢又唔好意思, 唔話又過唔到自己, 都幾難做, 得我同阿笨靜靜地都幾好架! 食咗午飯, 餵埋3點嗰餐我就瞓啦, 但都瞓得唔好又比笨元嘈醒, 就不如起身做吓嘢, 可能奶奶仲未習慣蕃薯的食奶模式, 餵完之後又未抱番佢10分鐘落吓格, 結果我諗住沖涼前就發現蕃薯回番都幾多奶, 仲要一路同佢換衫一路仲有得回, 比佢玩死! 最終搞掂就沖涼食飯囉, 跟住我都係開始hea, 今晚試吓唔泵奶就瞓, 睇吓可否快D收到奶, 我真係頂唔順, 乳頭痛根本係忍受唔到架, 又損又拉扯嗰種痛, 我真係忍受唔到! 今晚老公餵笨元12點嗰餐, 我可以早D瞓!

21-22/12/13

21-22/12/13   SAT-SUN   COLD

呢兩日我都冇出過街, 但都唔會悶, 時間都過得好快, 星期六老公帶笨元去學畫班, 我就自己喺屋企煮早餐囉, 又要餵柏仲呢, 不過我個人都唔係好舒服, 周身骨痛咁, 冇咩特別咁都係做嗰D嘢, 老公佢地返咗嚟我就煮午飯啦, 都係焗雞飯咋, 食完個人好攰啦, 但又未瞓得住, 仲要摺埋衫咁, 餵埋3點幾嗰餐就瞓啦, 真係要瞓吓先掂, 起身後都仲係好周身骨痛, 量吓體溫有燒喎, 就打比Amanda問吓可以點做囉, 佢話其實都可以照餵的, 食藥都可以餵, 好在過咗一輪我再量已經冇燒啦, 可以真係出咗一身汗好D掛, 晚餐食Pizza咋, 之後咪都係沖涼睇電視餵奶泵奶囉, 老公就早D瞓咗啦, 因為佢半夜要起身嘛, 咁12點幾嗰餐就我餵啦!

星期日大家都瞓得幾晏吓, 蕃薯5點飲完奶就8點先再飲, 咁餵完先泵奶, 然後叫老公起身煮早餐, 食完早餐都係hea吓啦, 中午前叫老公幫蕃薯沖埋涼先餵奶, 因為下午佢又要帶笨元去生日會, 又得番我一個添! 阿媽攞咗D湯過嚟就走啦, 老公冇食午飯就出去, 反正去麥當當生日會都有得食! 我就整番熱琴晚Pizza Hut的意粉, 不過呢隻意粉真係唔多好食, 我都係食咗一半咋, 餵埋3點嗰餐執埋D手尾我就瞓啦, 瞓到佢地返嚟食晚餐先起身, 今日做冬打邊爐, 不過我都係食唔到好多, 呢8個幾9個月真係食細哂個胃, 我磅數竟然跌到落128磅, 真係估佢唔到! 食完飯就休息吓, 等嫲嫲閃咗我地先沖涼呢, 之後老公都係早D瞓, 我又係泵奶餵埋12點嗰餐先瞓呢!

20/12/13

20/12/13   FRI   COLD

今日雖然老公放假, 但佢好多嘢做, 其實都冇幾多個鐘喺屋企, 朝早蕃薯7點多叫食, 餵完佢就泵奶, 笨揍元醒咗就自己搞掂啦, 八點幾開始叫老公起身架啦, 搞到九點幾先出到去食早餐, 所以蕃薯未夠10點就係到叫食嘈生哂囉, 本來諗住食完老公就幫柏仲攞出世紙, 我就揍番笨元返去, 但蕃薯係咁喊都唔好 意思, 於是我快手食完同蕃薯返去食奶先, 老公就帶埋笨元去攞出世紙, 餵完奶我又要泵奶啦, 阿媽攞過D餸過嚟又走啦, 我等老公佢地返嚟, 不過同柏仲沖咗涼餵咗餐奶佢又要揍笨元去聯歡會, 下午又得我喺屋企, 都算精神又見地方dirty於是抺咗個地冇瞓到晏覺呀, 5點幾泵埋奶沖個涼, 笨元同奶奶佢地都返咗, 因為買咗D嘢食於是冇煮飯, 大家求奇食咗D嘢, 點知笨元食得急又有d咳, 叫佢瞓一瞓先去合唱團, 結果又嘔真麻煩! 之後老公揍笨元去合唱團, 我又一個人喺屋企照顧蕃薯, 坐坐吓個人竟然開始骨痛, 都唔知係咪作病, 係就麻煩都唔知點算! 笨元返到嚟掛住玩, 到11點先瞓, 我就泵埋奶等D樽先瞓得, 蕃薯2點幾叫食, 而我成晚都瞓得唔好, 唔係發夢就係咁醒, 好辛苦!

<笑起上嚟會有月亮眼架!>