14-15/12/13

14-15/12/13   SAT-SUN   COLD

星期六日唔洗嫲嫲過嚟啦, 等佢休息吓! 今朝笨元要學畫班, 我就要帶柏仲健康院睇黃, 於是餵咗晨早嗰餐泵埋奶再餵多一餐就出門口, 本來諗住睇咗我先食早餐, 不過奶奶打嚟話佢上緊茶水站, 叫我食咗早餐先, 咁就喺茶水站食咗先, 九點多落番健康院, 好快有得睇, 今日指數再落番185, 又再大多咗兩日, 重量亦上番2.9kg, 即係再有進步, 可以常規等18/12先返嚟見醫生, 若18號都OK就足一個月先返嚟打針架啦, 呢幾日又要再努力呢! 搞掂哂就去撘巴士出公司, 老公接埋笨元學完畫班就會嚟同我會合, 估唔到返到去咁多嘢做, 好在佢地掛住玩柏仲, 我可以盡量快D做好D嘢! 不過都做咗好耐呀, 始於唔可以好專心咁做係慢D架啦! 搞到十二點多先叫做做好! 係時候午餐, 老公叫打比phoebe問佢落唔落嚟食嘢, 於是就去咗酒樓囉, 邊食邊吹都吹到兩點幾先走人, 返到去又係泵奶餵奶囉, 阿嫲同阿媽過咗嚟睇柏仲, 大家嘻嘻哈哈咁又過咗個下午, 晚上食自己囉, 由於老公下午整豬腳整到好攰, 所以晚飯我煮, 都係蒸番熱D肉餅, 我再炒個菜同火腿炒蛋, 笨元食哂幾比面! 白白完就睇吓電視囉, 終於可以休息吓, 我覺得今次個人都算精神, 又冇話特別攰, 同埋唔好再迫我食咁多嘢, 我真係食唔落, 食多咗最終都係嘔番出嚟! 晚上我泵奶老公餵奶, 又係時係覺豬啦!

第二朝瞓到八點幾柏仲先叫食, 因為4點幾食咗一次嘛, 咁餵咗佢我就泵好奶再叫老公起身, 整好行裝出去食早餐順手去超市買嘢, 如果唔係落雨應該仲方便, 今次試咗推BB車出去, 都算OK呀, 去到板板到食完嘢, 就去惠康買日用品同食物, 由於時間關係柏仲開始叫肚餓, 但叫咗陣佢發覺都冇咩用就放棄咗, 瞓多陣好過! 完成哂D嘢就撘巴士返屋企, 返去洗白白食奶, 我又要泵奶啦, 然後等老公煮午餐, 食飽都係陪吓笨元咁啦, 佢成日有得喺屋企玩原來好開心架, 晚飯仲要有蛋包咖哩飯食, 開心得佢呀, 沖埋涼就睇oncall大結局, 期間都係餵吓奶又泵吓奶咁啦! 我睇oncall睇到臨尾都頂唔住瞓著咗, 笨元咪又係咁, 我瞓到12點左右比老公叫醒, 泵多次奶先瞓, 佢就餵埋柏仲先囉!