今日係老公生日, 節目都幾豐富吓! 朝早我又係餵早場兼泵奶啦, 難得佢肯埋身, 不過最終都要再泵番清, 同埋兩個鐘柏仲又喊食! 老公就揍笨元返學, 然後買早餐返嚟比我食, 之後都係hea吓咁咋, 到下次奶餵完就差不多時間出門口, 約咗奶奶喺太興食晏, 然後上健康院, 去到都好快有得見醫生, 今日主要磅重同埋比醫生做全身檢查, 好叻仔啦隻蕃薯有3.11KG, 已經重過出世時, 跟住去見埋醫生啦, 由頭睇到落腳架, 醫生都話柏仲好合作, 睇完佢又要食奶啦, 反正喺健康院就比佢啜一陣先, 然後再補奶份比佢, 跟住就去接笨元放學, 再去青衣城啦, 因為今晚要食生日大餐嘛, 去到青衣城有好多聖誕節裝飾, 反正又未夠鐘, 咪影一輪相先囉, 可以影到D唔錯的全家幅呢! 跟住就去Mr Steak等食啦, 點知6點左右隻蕃薯又係到嘈, 見未有嘢食就去餵吓佢先, 都餵咗有20分鐘, 今日佢算好難得埋咗3次身, 餵完返到去快快手咁食啦, 蕃薯都冇再嘈啦! 食到七點幾買埋蛋糕就回家啦, 返到去蕃薯終於有得食, 佢地就沖咗涼先我就泵奶, 然後一齊影番幅生日全家幅再K.O.笨元, 再餵埋多次隻蕃薯諗住瞓啦, 點知唔夠兩個鐘佢又嘈, 仲食夠100m l!
沒有留言:
張貼留言