30/6/15

30/6/15   TUE   HOT

今日要過商會開會, 乘機可以早放! 朝早如常揍子元返學啦, 柏仲今日早起身有得出去啦, 仲可以上校車玩一輪添! 返上樓食埋奶就玩吓啦, 然後一齊去食早餐, 我就返工啦! 返到去都有D趕趕地, 寫吓嘢吹吓水咁又11點了, 仲要去埋銀行先過上環, 所以過到去都12點幾, 好在都仲攞到位, 齊齊食海南雞飯, 跟住就返商會做嘢, 開吓票吹吓水咁時間又過了, 夠鐘就開會, 老細們都好快手搞掂, 所以四點未夠已走得, 返到去沖個涼先, 執好嘢就襯閒日去吓街, 同埋奶奶一齊過咗荃灣, 去Aeon買吓嘢咁, 喺10蚊店買得好開心呢, 子元就去玩卡機, 但比人打尖又唔識出聲, 唉…! 玩到7點幾去食飯, 去咗食鐵板燒, 真係好正呢! 食完再去行吓先, 嫲嫲就話返屋企先啦! 我就去咗買泳衣, 選來選去還是價錢要緊, $99套不太樣衰就算, 反正著在我身上幾靚的都變唔靚! 子元柏仲就買咗籃球! 已經9點幾要快手回家了, 沖涼食奶柏仲即瞓, 我就要搞掂哂佢地先有得沖涼呢!

29/6/15

29/6/15   MON   HOT*

今朝仲仲冇早起, 乘機賣甩佢揍子元校車, 返上嚟發現仲仲已在廳, 老公話我一出門口柏仲已經爬出嚟呢! 又餵奶又摺衫啦, 幾日冇摺好多籮! 摺完都要出門口了, 買埋早餐返工啦, 朝早都係寫吓日記吹吓水先, 午飯後睇吓電視打吓機, 下午準備好D嘢比老細簽等等, 就可以做吓自己嘢啦, 時間都過得好快, 放工直接返屋企, 老公已經揍咗子元放學, 返到去又有奶奶煮好飯, 又唔洗追功課溫書, 真係好舒服, 沖好涼同子元睇一睇功課又食飯, 柏仲見到開飯就會逐個叫你地去食飯, 又自己要攞high chair, 好搞笑! 但食又唔係好食, 始終個口都仲係痛, 老公今朝帶咗佢去睇牙醫, 個牙醫好好, 睇完又唔收錢再寫埋紙佢去兒科攞消炎藥! 食咗藥好少少啦, 希望快D出到哂D牙, 又唔再熱氣啦! 趕好哂佢地去瞓我又可以睇電視啦, 不過睇睇吓幽靈我都瞓鬼咗!

28/6/15

28/6/15   SUN   HOT

今日決定比柏仲在家休息! 朝早我帶子元去畫班, 今日程太揍敏瑩, 之後佢去掃貨, 咁我咪跟佢去行吓囉, 反正都冇地方去, 最終我都有著數, 買咗少少平嘢啦, 但攞起上嚟都幾係重, 又尿片又淋浴露又盒裝紙咁, 搬番屋企都幾喺嘢! 返到去收拾好, 就一齊出去食晏, 不過食完老公又同仲仲返去啦, 我同子元就上程生到游水, 今日好好陽光, 所以都幾多人游呀! 玩咗個幾鐘, 又玩水槍又游吓咁啦, 3個大人睇3個細路都OK GE! 游到4點幾上水返去沖涼啦, 由於要返去接更, 老公去踢波, 所以沖完涼就要走啦! 返到去老公即閃, 我執好嘢就開始煮晚餐, 睇吓屋企有咩就整咩囉, 柏仲係咁阻住子元玩, 等我要揹住柏仲嚟煮嘢囉, 揹到咁上吓都頂唔順, 好在子元都喺廳玩夠, 咁就叫佢入房玩lego, 可以放番柏仲落地玩, 我就煮埋下半場, 本來想早D餵柏仲食粥先, 點知佢唔多肯食, 子元又話肚餓啦喎, 咁就煮咗意粉先, 準備好哂就齊齊食, 喊住痛住都要餵柏仲食架啦, 叫子元洗咗D碗佢又洗得幾好, 叫做幫到吓手啦, 執埋D手尾K.O.埋柏仲就可以陪吓子元睇吓電視! 老公9點幾返嚟, 仲買埋糖水, 梗係啦比我片完佢今個星期踢咁多場波嘛! 食埋糖水子元就瞓啦, 我地就hea吓到11點幾先瞓呢, 柏仲飲咗D涼茶好似好D喎, 晚上都冇咩再痛醒!

27/6/15

27/6/15   SAT   HOT

今朝我就如常返工, 老公朝早去踢波, 叫咗嫲嫲出嚟睇住兩隻嘢! 柏仲依然因為牙肉腫哂又生非滋, 所以好燥底, 水又唔願飲, 不過佢就肯食飯喎, 好奇怪! 我放工買咗KFC返去食, 夠鐘老公就揍子元去乒乓球, 揍完再返嚟, 我就繼續同仲仲喺屋企, 佢依然燥底, 水又唔肯飲咁, 個口又臭! 跟住佢指住廁所話popo, 咪放佢入去囉, 咁我就執住玩具先啦, 柏仲成日都會閂咗門去popo架嘛, 到我執好嘢入去廁所時, 見到佢竟然企咗喺塔上面, 唔跌佢落去好嘢喎, 佢企喺上面之餘仲要向牆企, 因為搞緊D淋浴露, 但佢照繼續疴屎, 於是腳啦, 塔邊啦, 全部都係POPO, 真係應該影低佢! 最後梗係冇影啦, 放佢落去沖身啦, 又要洗埋個塔, 真係比佢玩死! 老公夠鐘就出去揍子元, 約咗喺巴士站會合去九龍灣, 約咗程生佢地去運動鋪買嘢, 因為有coupon, 但敏瑩要學嘢放6點, 所以我地喺德福行吓先, 知佢地到咗先過去, 本來想撘shuttle但實在排唔到, 都係行落去, 柏仲好勁行哂全程! 去到先睇運動嘢, 其實可能嗰時放子元去玩具反斗城會好D, 因為佢係咁搞住哂, 跟住柏仲又口臭又唔肯飲水又扭, 係咁比我片, 捉咗佢出去飲水叫做飲咗D! 買完就去食嘢啦, 都係食日本嘢咋, 不過柏仲真係超唔合作, 又捉咗佢出去一次, 鬧佢叫佢走條友真係走喎, 頂! 子元敏瑩食飽就走咗出去睇人地冰球比賽, 叫做唔悶囉! 食完都9點多, 仲要去兒童區個遊樂場玩, 程生去Ikea買嘢, 完成哂就屈蛇回家, 又嚟5人車坐8人! 返到去即時同柏仲沖涼食奶瞓, 子元都好快瞓, 我地都攰啦, 但柏仲隔個幾鐘就醒一次, 係咁痛哂, 見到佢就陰公, 我冇得瞓都好陰公!