13/6/15

13/6/15   SAT   VERY HOT

今日係節目豐富的一天, 朝早已經要執齊嘢啦, 預計出到晚上才回來! 早上我就要返工啦, 老公喺屋企搞掂兩隻嘢, 夠鐘就嚟接我放工, 去咗食麥記, 嫲嫲走出嚟煲咗粥比仲仲, 咁佢就食粥啦! 食完差不多就出發去球場, 其實真係太早過去啦, 3點先開始但2點多我地就到, 等老公都換好衫就先影吓相, 之後佢地咪踢吓囉, 柏仲都踢埋一份, 條友仔帶波都OK喎, 同佢影咗好多足球小B相呢! 終於可以入去草場啦, 叫做有D陰涼位抖抖, 但我已經熱咗差不多一個鐘, 真係唔掂! 佢地踢嗰時又唔可以比柏仲落地, 都幾係麻煩, 佢地中場休息時柏仲先可以出吓去! 子元踢到尾聲話暈, 所以都冇得再踢, 下次咁熱出嚟真係要帶埋冰先掂, 好在隊友有帶可以借! 4點幾要交場啦, 終於可以去抺身換衫休息吓, 不過我開始頭痛啦, 但都支持得住, 諗住去番D冷氣地方會好D, 點知只係愈來愈差, 6點去到晚飯地點, 小朋友們一枱, 真係嘈到顛! 柏仲先食咗飯仔, 跟住開始咩都扭我就知佢攰啦, 咪打暈佢囉, 咁食飯時都叫做清靜D, 我食完都真係要抖抖, 因為頭愈來愈痛, 想嘔又眼瞓, 總之就辛苦啦! 終於頂到走得都已經8點多, 唔理咁多啦打的返去, 快手搞掂佢地沖個涼, 兩隻仔暈哂我就真正可以抖, 最終食咗藥, 瞓吓好D!