18/6/15

18/6/15   THU   VERY HOT

今日柏仲就瞓到7點喎, 其實佢日日瞓到7點都好好啦…可惜唔係! 送咗子元返學就返上去啦, 仲仲繼續周圍搞破壞, 老公揍柏仲入青衣, 但因為撘唔切廿幾分嗰班車, 咁諗住撘再遲一班, 點知超遲, 但我都唔理佢啦, 我返工先啦! 今日老細唔返, 真好! 完全做自己嘢, 但都係無無聊咁啦, 午飯後睇吓電視咁啦, 呢套新劇都幾用腦, 但又幾好睇! 下午都係無無聊咋, 放工阿媽揍咗子元過嚟, 因為佢都要過美孚, 回家後沖好涼, 煮住飯咁等老公揍仲仲返嚟, 由於今日有功課喺要上網, 一要用電腦就麻煩, 最終食完飯先做, 我已經極快速去做應做GE事, 但嗰兩個應該一個吸塵, 一個抺地架嘛, 但冇人郁, 唔係打機就睇電視, 我覺得真係要正視呢個問題, 點解叫佢地做家務好似喺我錯咁, 分工合作咋喎, 食完飯拍吓patpat就去打機, 我就執碗洗碗吸塵抺地倒垃圾睇功課餵奶趕仔刷牙瞓覺洗奶樽, 真係自己望見都嚇一嚇, 咁另一條友喺到做咩呀? 睇住仲仲, 但都係會打住機咁睇仔, 老實我揹住個仔都可以照做以上堆嘢架喎, 咁佢咪連唯一作用都冇埋! 做大人都唔識自動自覺, 咁邊有說服力叫細嗰D自動自覺呢! 話佢佢就係到軟皮蛇, 話明天開始會改喎, 好…我就放長雙眼, 睇吓佢係咪又講大話! 搞掂子元瞓咗, 我鬧完佢都廢事嬲, 死自己細胞又唔係佢! 好好欣賞我的媚娘好過!