30/9/13

30/9/13   MON   HOT

返一日又放假, 其實都真係幾冇mood, 但冇咩特別嘢就唔放假架啦, 揍咗笨元返去再吹陣水就返工啦! 朝早都係做吓自己嘢先, 中午就開始抄廠嗰D嘢, 午飯去埋銀行買麥當當個新包返嚟食, 都已經勁晏, D老細們返到嚟, 真係好唔同的反應, 有個就話我食埋哂D冇益嘢, 有個就話鬼佬都係咁, 有個就走埋嚟攞薯條食添! 下午繼續抄, 抄到放工搞掂1批! 放工返到去陪笨元玩陣啦, 食完飯又玩, 明天放假都唔洗咁急返去! 同嫲嫲商量好明天揍笨元入嚟, 我地去睇戲! 返到屋企對埋功課溫埋書, 就比佢玩玩具, 十點多就瞓啦! 我地咪hea吓囉, 反正明天又唔洗早起!

29/8/13

29/9/13   SUN   WARM**

今朝瞓到九點幾十點, 笨元都算合作, 冇成日走入嚟嘈! 起身後等老公煮pancake, 食完收到軒媽電話, 話Amanda搞自助餐, 又話咩到生日又怕食唔到, 最終我都係打咗比Amanda問佢究竟搞咩, 原來嚟緊繼將有4條KING後, 又嚟一個啦, 不過唔知King 定Queen呢! 佢話食餐好GE先喎, 都係GE, 之後可能要過年後先有機會出嚟, 跟住到佢生埋先再有機會又要到暑假, 咁就是但啦, 貴就貴啦! 不過又要我找時我要有嘢做緊, 就炆炆地囉, 最終決定咗Holiday Inn, 折咗都唔洗$1000一個family, 可以接受啦! 終於諗清楚笨元D校服點執, 有D唔啱GE就真係要掉! 執好我已經好攰, 就叫老公同笨元去圖書館, 我抖一輪就打掃先, 佢地好快又返啦喎, 但又激到我, 令我發脾氣! 最終都冷靜番做埋D家務, 老公就煮咗午餐, 食埋收拾又出去, 我其實都心大心細好唔好出去, 因為都係陪老公去踢波, 不過總好過又困喺屋企, 最多係摺唔到D衫囉, 總有一晚有心機摺GE! 入到天水圍踢, 車程又好快喎, 都未瞓夠就到啦! 去到都係勁早, 本來老公諗住比笨元去遊樂場玩吓, 但因為有微雨冇得玩, 於是只係喺看台咋, 好在佢有帶車仔嚟玩, 開波前同Daddy玩咗一輪, 跟住話要飲嘢喎, 諗住球場出面有水機嘛, 點知係壞GE, 最後問到第二個工作人員先講得清楚另一個水機喺邊, 行到隻嘢咁先買到嘢飲, 上半場佢主要係到打機, 下半場就玩吓車仔咁囉, 終於完場輸3-0! 梗係啦得9個人打! 搞掂又掂番巴士出去, 我又係好攰照瞓, 決定咗去美孚間大家樂打邊爐, 百多完又有邊爐又有牛排, OK啦! 食完返去快手沖好涼執好嘢睇掌門人, 今集好笑嘛有古惑仔! 睇完笨元都攰啦即瞓, 我地就睇埋星夢先瞓!

<玩到冇嘢好玩!>

28/9/13

28/9/13   SAT   HOT

朝早我如常返工啦, 笨元學完畫畫就要去踢波, 所以唔會嚟接我放工, 咁我放工就返屋企自己煮D嘢食囉, 最簡單咪罐頭湯意粉囉! 食住睇埋套大結局就等老公打電話嚟睇吓幾時出門口, 佢地踢到2點半, 知我食咗嘢就食埋嘢先再找我, 咁4點多先出門口呢, 撘咗架蝸牛巴士, 用咗大半個鐘先入到沙田, 同老公會合後就行吓囉, 笨元都行咗大半反斗城, 之後都係上一田睇吓玩具, 今日個人好攰呀, 尤其個大腿後側成日都庳, 勁辛苦! 所以睇完冇咩特別就不如早少少入第一城, 去麥當當坐吓, 差不多7點先上去阿婆到! 等咗陣都開飯啦, 笨元有我部手機打實OK架, 不過食完飯打到就嚟冇電就叫佢畫畫囉, 都算合作啦! 九點幾走啦, 一程過撘86返去, 笨元反而冇瞓而我就瞓得好冧! 返到屋企沖好涼就捉笨元瞓啦, 我地反而HEA到十二點幾先瞓呢!

<型嘛?>

27/9/13

27/9/13   FRI   HOT

今朝笨元身體OK啦, 可以照比佢返學, 今日仲要係八九月份生日會, 又要著華服, 一套走天涯, 反轉又第二隻色啦, 合作GE時候一樣咁趣緻! 揍咗佢返學我就返工啦, 朝早都係做自己嘢啦, 就係提唔起勁做其他嘢! 午飯又要出去買, 都未睇哂套劇老細就一家大細返哂嚟, 嘈到呢! 然後咪做公事囉, 做足一個下午呀, 咪又係抄廠嗰D嘢囉, 想完成哂一SET先收工, 所以都做到差不多6點呀! 返到去已經勁攰, 笨元睇飽佢個442台就要我同佢玩學校派嗰套GOLF套裝, 但我真係冇力啦, 到食飯時又到佢冇力, 嫲嫲話餵佢都唔食喎! 走咗去打golf就唔眼瞓! 八點未夠閃啦, 冇42要撘到出美孚再轉車, 老公就去咗畫室改明天畫畫時間, 我就同笨元沖涼等等啦, 笨元都好合作沖完自己做埋Mels, 做到唔識先問我, 等我搞掂就教佢啦, 但有一題都係唔明, 放咗上Group問大家! 老公好晏先返到, 原來比法團D人拉住傾嘢, 好在都幫手搞埋隻笨瞓覺! 我地就hea到十一點幾瞓, 都幾攰呀, 但最慘瞓到4點幾急V醒咗好難瞓得番, 開始步入7個月最後階段又辛苦啦!

26/9/13

26/9/13   THU   HOT

今日真係好舟車勞頓! 朝早揍笨元返學啦, 其實都覺得佢條氣麻麻架啦, 但今日有活動去立法會參觀嘛, 錢又比哂啦, 梗係要去啦, 咁佢個情況又未差得咁緊要, 朝早比咗轉成藥架聞氣, 帶埋支氣返學校囉! 返到去交代好就返工啦, 今日我都好忙呀, 朝早做好自己嘢12點就出去啦, 乘要出去開會的機會, 早D閃走去荔天交表, 一個人都冇, 係我交交吓時先有個家長嚟交! 搞掂都係12點半, 喺附近商場找地方食Lunch, 忍唔住食咗間日本嘢七十幾蚊呀, 食咗三片三文魚刺身呀, 我諗應該冇咩GE, 之前都有食過啦, 跟住就食牛肉烏冬, 食完都係1點, 記起中環間荷花話搬遷大減價咪去睇吓囉, 都係呃人ge! 咁咪早D過去商會嗰邊囉, 一路開一路擔心趕唔切去接笨元, 因為今日D議題好有發揮性, 好在老細3點半有多就閃咗, 有下場喎, 都唔知佢去邊! 咁開到差不多四點終於開完, 老細閃咗我梗係即閃啦, 趕到去青衣好在有Rachel載咗我半程路, 咁4:50就去得到啦, 因為遲返而仲有機會同老師呀校長佢地吹水, 吹到5:10先行人, 笨元就好慘咁比我地玩咁, 尤其龍校長成日整鬼佢! 由於老師話佢把聲都沙咗, 所以都係決定同佢去睇醫生, 不過由於我攞咗太多嘢, 點都要返屋企放低嘢先! 唔理咁多啦撘的士返去, 放低嘢同笨元換件衫就出門口, 截到的士先話VV, 又要喺街同佢用膠袋解決, 好在司機等埋我地啫! 去到即刻有得睇, 葉醫生都話笨元有喘, 要喺醫院聞一次氣先, 咁咪去咗聞氣先囉, 佢又好鬼記得細D時去親聞氣我都講故事佢聽, 等佢輕鬆D嘛, 到而家佢都係咁, 一要聞醫院D氣就要我講故仔, 今次D氣咁襟, 我講足3個故事先聞完, 去交單攞藥, 要等廿幾個號碼, 咁就去食咗晚餐先啦, 叫咗一個餐share, 有D嘢比佢落肚就得啦! 佢最想就係有得玩遊戲機, 咁食完嘢咪去攞藥囉, 唔洗等幾好! 撘小巴返到屋企先沖涼, 然後佢自動做功課, 因為明天生日會, 今日派哂功課, 咁笨元又肯做喎, 咪由佢做囉, 7樣呀佢1個鐘唔洗做哂仲要自己做都算係咁, 係要睇題目嗰D先要我幫手, 其他抄寫的都係自己搞掂, 我應該好感恩! 做完其實都差不多9點半, 本來話做哂比佢玩到9點, 但都過哂時間啦, 就話比佢玩10分鐘佢又OK, 玩玩吓Daddy返喎, 沖完涼仲可以陪笨元傾陣偈先瞓呢! Touchwood 睇咗我成千蚊醫生就冇咩啦, 仲有少少咳但瞓時起碼冇咳啦! 見我今個月有少少錢淨又同我一鋪清袋, 唉!

 

25/9/13

25/9/13   WED   HOT
今朝笨元6點幾就咳醒咗, 搞到我地都早咗起身, 又早咗好多出門口, 係早到8:15就返到學校, 佢就係到同呢個玩又同嗰個玩, 我就叫佢唔好走嚟走去, 講真咁早返嚟排隊真係冇咩著數! 揍咗佢入去我就返工, 不過撘咁早車都冇用, 因為都要塞車咁, 都係嗰D時間先返到去! 朝早都係做吓自己嘢啦, 抄吓嘢咁午飯又要出去買呀, 下午都係繼續抄啦, 不過老細返咗嚟又冇嘢做咁, 都拖慢進度, 好在點都叫做放工前搞掂一部份! 返到去笨元咳多咗個人又冇胃口咁, 梗係啦, 唔係睇電視就睇IPAD, 睇到個人吽哂! 咪迫佢入房休息吓再食囉, 食完就早D返屋企, 食咗藥等等, 希望冇咩事啦, 唔想又要睇醫生呀!

24/9/13

24/9/13   TUE   HOT

笨元今朝7點就起咗身搞掂哂D嘢, 真係估佢唔到呀, 到我起身時佢已經換校服食早餐, 所以8點就出到門口返到去又有得排隊! 揍咗佢就返工啦, 買埋早餐返到嚟都係做吓自己嘢咁啦, 朝早都係想自由自在吓先! 午飯買少少嘢襯個福麵, 平平地又一餐, 睇吓電視咁等開工, 老細下午返咗嚟, 好似一朝冇講過嘢咁, 係咁講埋哂D廢話, 無奈地聽啦人工包埋嘛! 跟住都係咁做廠嗰D嘢囉, 做到放工當然停手啦, 長命工夫長命做! 返到去笨元睇緊ipad, 咁我又hea吓囉, 等老公返到嚟就開餐啦, 食雲吞嘛…點知食食吓唔對路喎, 有D酸味, 為安全起都係唔好食啦, 咁我都食咗咁上吓, 都唔餓啦, 所以佢地煮麵食我都冇食! 行上巴士站兩父子又係到鬥快, 笨元又出陰招拉開Daddy, 結果自己失平衡咪跌到囉, 一邊膝蓋流血, 係到叫哂救命, 已經抺咗傷口架啦, 但都要等返到屋企沖咗涼先可以洗傷口嘛, 佢就全程係到哎哎呀呀咁煩鬼死你, 但返去沖完涼又突然好勇敢咁洗傷口等等, 不過貼咗膠布就話唔可以行嚟行去, 指我地幫佢呢樣嗰樣! 等我沖完涼搞掂就溫習啦, 今日有4樣功課呀, 但佢話佢第一個做哂, 平時2樣又唔見佢第一喎! 溫習時都好快, 問佢D字識睇識寫就算溫咗架啦, 都係培養佢溫書習慣啫! 執埋書包等等就瞓啦, 我地就hea到十一點幾入房, 但吹水吹到一點都未瞓得著呢!

23/9/13

23/9/13   MON   RAIN  8號3號風球

今日都係要返工架啦, 但未遇咁早啫! 七點幾睇一睇電視仲係8號, 笨元醒咗但我地就繼續瞓, 瞓到九點多先醒, 明明仲未轉架, 但到9:20就轉3號啦, 局住要起身啦, 老公就仲未捨得郁, 到佢起身時已過咗半個鐘, 打比嫲嫲原來佢都未知轉咗3號, 咁佢地溝通完竟然係嫲嫲出嚟, 咁都算啦, 但嫲嫲出得嚟就晏啦嘛, 食咗早餐我就出門口先, 老公話佢等嫲嫲, 但原來嫲嫲好晏先嚟到, 老公就遲咗先返到公司, 咪覺得應該琴日未掛8號時揍咗笨元入青衣先囉, 唉…根本就唔work, 你都唔知幾時掛8號! 算啦, 都冇幾何再有風住, 到時先算! 一路都做吓公事做吓私事咁, 午飯又要去買飯, 食咗麥當勞都好飽, 飽到晚飯都仲好漲, 我真係要再食少D嘢, 漲住個胃好辛苦! 晚上返到去都仲早, 笨元今日算好合作喎, 沖涼後執玩具都算快, 跟住執埋書包校服等就有得食梨, 都唔知係咪為咗食梨所以咁快! 一路食一路睇我打機, 幾開心呀, 係入房後出過嚟幾次, 鬧完咪入番去囉, 我地就hea到十一點幾瞓啦!

22/9/13

22/9/13  SUN   RAIN 3號8號風球

今日有D困獸鬥, 朝早瞓到十點多先願起身, 星期日嘛比人瞓耐D都得掛! 梳洗完摺衫先, 等老公煮早餐, 今餐食pancake, 又煮得好好食喎! 食完就去圖書館先, 再去埋超市買吓嘢就回家啦, 因為買得多嘢, 叫笨元幫手拎啦, 佢又係到話做唔到, 真係好可惡, 但唔理呀, 照叫佢幫手囉, 唔洗做呀! 返到去就無聊吓啦, 我都要休息吓呀! 兩點幾食午飯啦, 都係煮麵啫, 跟住老公話同笨元入房瞓, 咁我咪喺廳瞓囉, 點知瞓瞓吓笨元又走咗出嚟玩玩具, 我見佢唔搔擾我就由得佢, 瞓咗陣諗住入番房瞓, 先發現冇開冷氣, 老公又投訴話係笨元閂咗, 唉…咁大個人投咩訴呢, 火火地我就出咗走廊行咗降吓火先返入嚟, 個人都醒咗囉, 咪打掃囉, 不過都幾吃力架, 老公就仲喺房瞓, 開住門比佢聽住D聲架啦, 都仲可以瞓, 都唔知係咪扮瞓! 直到笨元自爆佢又將早餐D餅放咗喺早餐枱後面之後, 我就發哂顛咁鬧同叫佢清理囉, 真係成個人顛哂咁, 最後走埋入廁所喊, 都唔係第一次架啦, 教極都唔聽, 真係好傷心, 老公呢個時候先出嚟, 仲要問我做咩喺廁所, 我咪淨係打開門話係咪喊陣都唔得囉! 喊完叫做抒發咗D啦, 出去再同笨元講數, 話今晚冇得食晚餐同冇得睇掌門人呀, 佢谷到對眼紅哂但又唔敢喊出嚟架, 我就要佢記住呢種心情, 再有下次就冇情講! 同煮飯前先再問佢, 記唔記得自己衰咩, 唔可以再浪費食物, 咁先煮埋佢飯囉, 算佢醒目食哂碗烏冬, 咁咪可以睇埋掌門人先沖涼瞓覺囉! 六點幾開始掛八號, 都遇咗明天要返工架啦, 不過笨元就一定唔洗返, 又唔知幾點落都幾麻煩!

21/9/13

21/9/13   SAT   HOT

今日又去街街, 諗住聽日大風大雨嘛, 所以今日再去街買吓嘢咁啦! 朝早照樣我返工啦, 佢兩父子差不多時間就嚟接我放工, 笨元上到嚟其實都幾唔合作, 有時都幾乞人憎! 由於上到嚟食咗D月餅, 所以唔食晏住, 過到九龍灣先食, 撘地鐵過去都好快, 半個鐘多D已去到, 喺工廠區食茶餐廳, 然後就去Mega Box, 睇咗笨元的反斗城再抽埋扭蛋就去咗荷花, 想睇吓蕃薯粒D嘢嘛, 買咗百幾蚊呀, 見呢到先有嗰隻大裝的儲奶瓶, 又唔算貴咪買埋囉, 跟住就睇吓其他無謂嘢, 最後喺H&M買咗套Snoopy睡衣, 買咗56碼1-2個月咋, 因為最大得番6-9個月, 但嗰時又唔啱著長袖, 不如買細件D等佢可以著出街嘛! 用咗上次張優惠只要$99就有兩件, 都真係抵架! 跟住撘穿巴返德福睇咗陣玩具就去買餸呢兩日食啦, 唔覺唔覺都買咗四百幾蚊! 跟住試吓撘40號條新路返屋企, 去到長沙灣轉車都好順路, 唔錯! 返到屋企沖個涼休息吓等食飯啦, 真係好攰呀, 琴日又出去今日又出去都真係幾吃力! 晚上睇埋小B大任務就要笨元瞓啦, 我地咪再睇吓電視先瞓囉!

20/9/13

20/9/13   FRI   HOT
中秋節之後嗰日梗係hea過架啦, 瞓到十點先起身, 出去食早餐順手出埋街, 太多人十一點幾先食早餐, 茶餐廳人多到呢! 十二點多先喺美孚出發去尖沙咀, 老公話有隻航空母艦泊咗喺碼頭, 於是帶笨元去睇吓囉, 又真係幾好睇喎! 跟住都係行吓反斗城同商場咁囉, 跟住去大家樂食個TEA就去CITY SUPER買材料返屋企煮咖哩, 笨元未比錢已經眼瞓, 抱到daddy死死吓, 好在可以喺巴士瞓, 咁返到屋企沖個涼又可以再玩等食飯啦!

<好壯觀的航空母艦!>

 <我地睇得好開心!>

 <商場有LEGO展!>

 <遠觀下的母艦!>

19/9/13

19/9/13   THU   HOT
 今日真係幾冇心機返工, 一嚟中秋早放嘛, 二嚟除咗星期六返嗰半日, 都叫做放3日假, 係holiday mood多D架啦! 朝早都有D晏先返到公司, 因為喺學校門口同佢地吹水吹耐咗! 返到去都係寫好日記等等, 然後開始抄廠D嘢囉, 開飯前已經抄緊, 真係抄到放工啱啱好完成其中一部分, 放工就去揍笨元放學啦, 其實有少少唔開心, 我諗住我同笨元二人世界一陣架嘛, 不過老公同奶奶又已經喺學校附近食緊TEA, 咁老公食完返公司打卡先, 但奶奶就等埋, 笨元就唔會好合作囉! 返到去先食D嘢, 比笨元睇電視到五點幾就要做功課, 以笨元的速度都要45分鐘先做得哂5樣功課呀, 其實真係已經算好快架啦! 咁之後咪比佢睇youtube囉, 但到食飯時就冇哂精神囉, 完全唔肯食, 咁等我地食完休息吓, 嫲嫲洗埋碗就去海濱行, 撞到兩個同學咁啦, 今晚個月亮真係好靚, 影咗好多張相呀! 行到去青衣城食埋糖水就回家了, 已經撘的士返去架啦, 笨元都眼瞓到隻嘢咁, 沖完涼即瞓! 我地就hea吓先瞓啦!

<串串貢咁樣!>

 <我話只影靚仔先即刻影!>

 <學校整的燈籠!>

 <靚媽架靚月!>

 <趕住去救火咩你!>

 <路人甲影得唔錯!>

 <撞到嘉桐呀!>

18/9/13

18/9/13   WED   HOT

迎月日喎, 今晚返青衣做節, 不過日子都係咁過! 照樣起身返工返學啦, 搞掂就買早餐返工, 朝早我係鍾意做吓自己嘢, 照樣上網睇嘢吹吓水咁啦, 下午先開始做廠嗰D麻煩嘢, 仲以為老細唔返啦, 查實真係好唔想見到佢, 因為佢個人愈來愈乞人憎! 果然又令到我好火, 同佢講一件公事係關於鋪頭個員工, 我係講緊個員工, 佢就講咗第二樣, 總之叫佢解決問題佢就係到東拉西扯, 令到你想去打佢小人啦! 下午就係到鬧佢囉, 發洩吓都好架! 放工返到青衣先去GIV仔到攞埋個泵奶機, 雖則已經幾手, 但$500就有啦喎仲想點, 最緊要用到! 傾咗陣就返去啦, 咁啱同老公一齊返到, 陪咗笨元玩咗陣, 等大包返嚟等到8點先有得食, 笨元都係冇咩胃口咁, 莫非真係仲未清哂? 咁都由得佢啦, 但佢都係衰架啦, 鮑魚就食到飯就食唔到! 食完就試吓隻藍梅芝士月餅, 不過我冇食呀, 佢地話幾好食喎! 老公陪笨元喺房玩到九點幾, 真係要閃啦, 因為笨元已經冇電係到發哂脾氣! 大包佢地車我地返去, 咁各自合作搞掂佢, 10:30已可入房瞓! 我地就睇吓新聞先囉, 十一點幾十二點先瞓, 但笨元半夜又走入嚟話發惡夢, 我呢排已經唔可以一覺瞓天光, 比佢嘈一嘈又瞓得唔好啦!

<做節豐富晚餐!>

 <姑姐喺泰國買的靚衫!>

 

17/9/13

17/9/13   TUE   HOT
笨元今日可以返學啦, 朝早都算合作, 不過見佢入到課室好似游雲咁, 真係比佢激死! 跟住我就買早餐返公司啦, 上午把握時間做自己嘢, 好在琴晚喺屋企已經寫好哂日記, 唔係返到嚟真係冇咁多時間呀, 今日都係放番D相上去就OK! 又同phoebe吹吓水咁就一朝啦! 午飯食番琴晚D餸, 好鬼多肉囉! 食完打吓機睇吓電視咁又要開工啦, 下午要幫廠入面抄嘢, 真係學足一個下午, 都係嗰句啦, 完全唔明點解要臨交先嚟趕! 仲要PK到老細whatapps嚟問埋哂D唔趕GE嘢, 但因為我冇時間睇嘛, 仲好似責怪你咁, 咪照直覆佢話幫佢廠入面趕工, 冇時間睇whatapps囉, 比個事實佢知, 反正佢老婆阿媽都見到廠嗰個人出咗嚟教我抄嘢架! 同幾個同事一齊鬧餐佢飽咪收工囉, 返到屋企又要服侍少爺啦, 沖完涼食晚飯陪佢玩, 溫書做功課睇陣電視就講故事瞓覺, 冇瞓晏覺最好9點前瞓! 我就有私人時間hea吓啦, 老公去踢波, 買埋糖水返嚟比我食咁啦!

16/9/13

16/9/13   MON   HOT
今日做番日FTM, 真係好辛苦! 朝早起身後就開始照顧笨元, 煲粥又要餵佢食, 佢係咁掛住要玩又唔願郁, 終於出到門口去買餸啦, 真係想有架車仔拖D嘢返嚟! 先去圖書館借咗書, 再去買餸, 去埋759買埋能量飲品比笨元就回程, 但隻笨好衰, 叫佢幫手攞吓嘢唔願咁, 回家後抺個身就處理好D餸先, 陪笨元玩咗陣又煮粥, 食完又係陪玩, 然後捉咗佢入房瞓架, 但瞓瞓吓又咳醒咗唔願再瞓, 咪由得佢囉, 嫲嫲又過咗嚟, 睇住佢我又開始準備晚餐D嘢, 今晚阿媽佢地過嚟做節嘛, 原來煮起上嚟都幾係嘢, 又唔夠工具咁都七點幾先煮起架, 好在食完有人洗啫, 咁都冇咁辛苦! 不過今日都係好攰架啦!

15/9/13

15/9/13   SUN   HOT
今日真係多采多姿的一日, 約咗嵐嵐九點幾喺迴旋處等, 不過食埋早餐有D晏, 過到荔天JOIN埋程生, 等幾個小朋友可以一班玩! 夠鐘我地就要上hall聽講座, 但真係好悶囉, 一來上年聽咗次, 二來校長真係講得好悶! 咁到12點終於聽完, 接埋笨元佢地就去碧海藍天找地方食嘢, 排得最快喺酒樓就去酒樓啦, 食嘢時笨元都唔多願食架啦, 不過之後見佢地係咁玩都冇咩呀, 咁啱又撞到phoebe佢地, 咪約咗陣間上去囉, 都係參觀吓咁啦, 跟住就落會所玩GE, 但笨元唔知係咪食滯咗定係比人傳染咗, 竟然嘔咗兩轉, 個人又勁攰, 咁咪馬上撘的士返去囉, 之後佢雖然好攰但都嘔咗兩次, 最終攰到喺房瞓咗, 但都已搞到我地死死吓, 又要換床單又要洗, 叫咗外賣pizza hut食完笨元竟然醒咗, 但都冇咩比佢食啦, 反而係食藥囉, 買咗雙飛人藥水, 內服外用嘛! 老公話佢應該係少少腸胃炎, 唔洗睇醫生, 清咗D菌出嚟反而就冇事, 咁老公咁講唯有係咁做啦, 等佢食咗藥再瞓番, 再嘔多次就瞓天光啦! 不過明天都係返唔到學架啦!

<左擁右抱>

 <三個咁勤力?>

 <好好玩的playground!>

14/9/13

14/9/13   SAT   HOT
今日都係一個好普通的星期六, 朝早佢兩父子自己搞掂, 我就返工啦, 買咗早餐返去嘆吓咁啦, 星期六都冇咩做架啦, 咪等放工老公嚟接我就喺附近食完午餐就返美孚買材料預備星期一的晚飯囉! 買齊嘢返到去, 係咁執廚房, 始於要安排好新雪櫃加入後的擺法嘛, 一執都執到老公踢完波返嚟, 仲要預備埋後日D餸, 結果攰到爆咗! 身痛咁! 晚飯簡單地食三文魚意粉, 好好食! 最後心笨元睇埋小B大任務就要瞓, 明天還要一早起身去開放日呢! 我地都係睇吓電視咁就瞓啦!

13/9/13

13/9/13   FRI   HOT

終於捱到星期五, 但又好似冇咩特別開心咁! 朝早揍咗笨元入學校, 見到龍校長本來諗住話佢知明天唔嚟聽talk, 但佢話除咗升小之外仲會講K3課程簡介, 叫我地都聽吓, 本來都諗住睇吓請唔請到假架, 但出到學校門口見到K3熟嗰班家長, 傾開佢地有D都唔聽, 咁就不如叫聽嗰D話番比我地知, 老實講聽唔聽都係咁同佢溫習架啦, 所以都係算啦! 傾得太高興啦, 9點有多先去撘車, 所以買埋早餐返到公司都晏啦, 之後都係做吓私務咁啦, 午飯後睇吓電視, 老細又係未放完lunch就返到嚟, 好在冇嘈住哂啫! 下午都有公事做呀, 放工等車又耐又冇位坐, 所以返到去都唔係太自在, 等都要開始工作, 就係睇功課, 星期五係冇喺學校做功課架嘛, 睇一睇都幾多喎, 英文2樣, 中文1樣, 數學1樣, 纙緝思維1樣, 作句1樣, 咁快就已經6樣功課, 好在笨元都合作, 先做咗Mels同中文, 咁餘下的學完合唱團返去再做都得! 食完飯七點半未夠就閃, 襯笨元學緊時, 老公話去麥當當食雪糕, 咁我咪食蘋果批囉, 之後去萬寧買埋嘢再去759八吓, 因為正價7折嘛, 但想買D嘢全部都冇GE, 最終老公買咗隻芒果布丁折咗$7, 就係用呢隻布丁嚟吸引笨元極速做哂功課, 咁佢都有比心機做ge, 英文生字, 數學同思維都唔洗我睇自己做好, 只係要我教佢作句嗰份, 咁都應該ge! 做完食飽滿足哂啦, 玩咗陣玩具十點幾咪瞓囉! 我就試試剛買的巨峰提子, 冇以前食過的咁好味, 有少少失望! 睇咗陣電視12點左右都瞓啦!

12/9/13



12/9/13   THU   HOT

今朝激到我呢, 兩個一個唔肯起身, 一個慢吞吞, 咁我咁早起身做咩呢! 嬲到我搞掂就行, 冇等老公呀, 不過未有lift到最終都一齊落樓, 但都係好氣囉! 揍咗笨元返學就閃啦, 買早餐返工等等! 朝早都係做吓自己嘢同人skype吓啦, 午飯又要去買飯, 飯後咪睇吓電視, 下午老細返咗嚟, 梗係冇好嘢啦, 冇好嘢之餘仲係無聊嘢, 總之煩啦唔想提! 放工返到去見笨元玩緊火車又睇緊電, 本來諗住可以休息吓, 但佢又要入房玩, 咁都算啦, 成日要出出入入, 好易撞到我架嘛, 最終一次踩咗落我腳脛到啦, 痛到我呀, 真係發脾氣啦我, 之後我真係黑足咁耐面呀, 因為食飯又唔願食, 望住個電視呆咗, 叫佢食又話飽跟住又要人餵, 我冇眼睇呀, 廢事血壓升呀! 不過就影低咗佢要人餵食飯個衰樣, 勁想放上group呀, 不過老公又話唔好, 最終我都冇放, 但就用咗嚟嚇佢囉, 但隻笨竟然話“呢D已經發生咗ge我唔會去理!”, 我都明佢意思, 即係你都send咗啦, 人地笑咪笑囉, 我做咩都冇用架! 真係比佢吹到漲, 洗唔洗睇得咁開呀! 咁最終我都要佢明白自己錯係邊, 要人餵飯係唔啱, 老實講唔通我鬧嫲嫲咩, 但真係咩都做唔到咁好無奈囉! 夠鐘有巴士, 上到車唔夠一陣佢就瞓咗, 我都由得佢瞓啦, 因為而家落車叫得醒佢行返去, 咁返到去沖完涼又醒番, 同埋老公去咗踢波, 得番我同佢一對一點都合作少少ge! 等我沖埋涼就溫書啦, 睇番group入面的whatapps先知, 原來唔係個個小朋友溫書都咁易架, 咁呢方面我真係要感恩ge, 因為教功課笨元真係易, 只係其他嘢難搞D啫! 睇埋圖書本來就瞓架啦, 但因為字典張書籤離奇失蹤, 好邪囉明明放喺側邊但睇完就消失咗, 結果關燈後笨元就出咗嚟幾次係咁講書籤件事, 又要我鬧! 終於可以休息吓, 開咗FOX睇埋上半部琴日睇唔到的鐵達尼, 不過睇之前就執咗個雪櫃先, 將舊雪櫃D嘢搬去新ge, 先發現個雪櫃好多垃圾, 咁收拾完感覺好好多, 起碼裝嘢的方法啱先啦, 唔會用隻水杯去裝豆瓣醬再用保鮮紙包住就算嘛! 老實用雪櫃都要用得其所先可以保到鮮嘛, 咩都塞哂入去為咩呢, 不如食D新鮮嘢! 搞掂就睇住電視等老公返嚟啦, 佢買咗紫米露, 咁我可以邊睇邊食啦, 又因為唔係好眼瞓, 睇到點幾先瞓呢!

<叫佢影相又唔肯.....>

<有個小朋友要餵先食...幾歲呀!>