4/9/13

4/9/13   WED   RAIN

今朝真係幾經艱辛先揍到笨元返學同返工, 因為嗰段時間大雨到不得了, 仲要大雨就多交通意外, 等46X等咗20分鐘先有車, 因荔景山路撞咗車, 入到青衣已8:50, 同陳主任傾咗一輪, 走嗰時都差不多9點, 點知橫風橫雨到不得了, 企天橋到都濕哂, 唯有等吓先行啦, 同幾個家長吹吓水咁! 行到去巴士站都係喺天橋口避住雨咁等車啦, 見佢準備開車先埋去, 返到公司嗰頭又係勁大雨, 買埋早餐返去都濕哂! 食埋早餐都係做吓自己嘢啦, 又睇吓升小D嘢, 做吓自己嘢又午飯啦! 今日老細唔返, 好輕鬆! 做吓自己嘢又做吓公事咁啦, TEA完就放工, 返到青衣睇笨元功課, 今日寫自己中文名, 咁只係寫咗一行, 仲有三行要寫, 佢話睇埋嗰套卡通先, 我就比佢睇埋先做, 但關咗電視要佢做時, 個人就放軟哂, 迫我出絕招, 攞個衣架打咗一吓屁股! 就黑起塊面比我睇, 佢面黑我就愈火, 所以頭嗰行都係大家好唔高興下寫GE, 之後我見一地公仔就執咗佢先, 再放番好衣架, 笨元可能見我行開咗, 又好似寫得好D, 跟住老公回來後我叫佢唔好出聲住, 我怕我鬧埋佢! 最後兩行咪寫得好D囉, 食埋飯入房玩咗陣就走啦, 等佢冇借口話眼瞓唔溫習! 沖完涼都係八點幾啫, 就叫佢寫番琴日未寫ge A-Z, 但佢竟然抄枱面印咗嗰D字, 真係當我傻ge, 仲要自爆抄GE, 正豬仔! 寫完都冇時間玩玩具啦, 又要食甜品, 又要執校服等, 講埋故事都過咗九點半, 搞到我睇唔到開頭個衝上雲霄! 呢排都早咗眼瞓, 新聞未做完就喺梳化瞓咗啦!