3/9/13

3/9/13   TUE   HOT

開學啦, 笨元7點就走入嚟問我記唔記得佢要返學, 我就叫佢快D去梳洗啦, 最終咪又係到我起身叫佢郁先郁! 落到巴士站就有車, 返到去剛8:30但已經好多人排隊, 所以都係快D去排隊好, 吹吓水咁影番張相就入學校啦, 望吓D老師真係轉得好西利, 真係得番兩個主任同兩個老師, 其他全部係新, 唯有寄望佢地真係教得好啦, 咁老實講自己做家長都要跟得足, 唔可以單靠學校GE! 送咗笨元入課室, 見到龍校長喎, 佢話有家長問佢全日班D嘢, 仲話係我講話仲有全日班, 好似怪我咁喎, 我係幾唔順氣架, 你地行政亂要家長守秘密, 我地都已經冇講過出去啦, 咁都到咗開學, 家長遲早都知你都要公開承認因為低班收得太多人所以開唔到全日班架啦! 咁出番學校時咪同Rachel同Apple佢地吹到9點先走人囉, 買埋早餐返去食, 寫吓日記上吓網咁, 睇極都唔明yahoo個blog點搬, 咁我反正已backup文字, 真係想唔再搞, 反正主要都係日記啫, 另外子元成長紀錄我都backup哂, 唔想煩! 中午食飯後都係睇吓電視, 下午老細又返咗嚟係咁講嘢, 本身我真係冇咩做架, 諗住plan吓中秋飯要買咩餸, 佢係到唔得啦, 係咁要找嘢做, 講咗個幾鐘先捨得走, 頂佢唔順! 終於捱到放工啦, 先撘車去長發幫笨元攞個新書包, 老細又話要買大公報, 商會活動有佢個衰樣喎, 又要我周圍找, 麻煩! 六點幾先返到奶奶到, 又忙住睇笨元D通告呀手冊呀咁, 跟住已經開飯啦, 食完笨元主力要我地陪佢玩, 我都陪咗陣, 搞得嚟要撘8:10班車, 返到去沖完涼都9點, 因為已有功課啦嘛, 梗係開始溫書啦, 都係要佢寫番自己個英文名同A-Z啫, 但佢好明顯已經冇電, 不過我都要佢起碼寫完自己個名, 但叫佢串佢又話唔知, 咪串埋佢聽要佢寫, 寫完就叫佢洗茶點袋囉, 洗足15分鐘喎, 激死未! 但我都唔理得咁多住, 又要搞佢D回條, 又要包手冊, 整得嚟佢都叫做搞掂, 踢佢入房我地就開電視睇衝上雲霄, 佢真係好攰啦, 都冇走過出嚟! 我地睇咗陣新聞添就瞓啦!