24/8/14

24/8/14   SUN   VERY HOT

今日都係節目豐富的一天, 朝早7點幾起身就要揍笨元去畫班, 由於老公去踢波, 我要一揍二呢, 過到去買埋自己份早餐啦, 程生嚟到佢可以揍住柏仲先, 比佢發現到柏仲條刀疤, 其實係琴晚個衰仔行到去子元房門時失平衡跌到囉, 撞咗埋去, 本來腫哂架, 好在我地識即刻敷冰都好快消腫但就有條痕囉! 揍咗佢地上畫室我都係唔返屋企, 去阿媽到等算啦, 等佢同婆婆玩吓我又可以輕鬆吓呢! 到10點幾就過返去接笨元, 柏仲就已經瞓咗, 佢熱我又熱呢, 好在等咗陣就有車回家, 一返到去佢就醒咗, 真係激死! 唔理得咁多, 我都要打掃咗地方先比佢落地, 咪叫子元喺床仔引住佢先囉! 打掃好放佢落地玩, 我就再執定去游水D嘢, 約咗敏瑩佢地去新屋會所嗰邊游水呢, 笨元問咗我一日, 起煩! 等老公回來佢就煮會飯, 柏仲食完奶食咗粥仔就比daddy打暈咗佢, 老公一齊瞓埋, 我就繼續執嘢好怕執漏嘛! 到2點多開始可以hea吓, 3點到柏仲醒啦, 就出門口去新屋會合, 佢地都係剛剛到, 搞掂就去換衫落水, 個池都OK好玩呀, 笨元算叻仔, 喺D女面前嘛總要扮勁! 攞住塊浮板就周圍游, 真係唔驚! 但估唔到係柏仲驚喎, 要一輪時間warm up, 到中段先識enjoy呢! 玩咗個幾鐘分頭沖涼啦, 會所設施都好好, 老公先K.O.咗柏仲, 我睇一睇住佢先, 等佢沖完照顧柏仲我就去揍埋笨元入嚟沖涼啦, 搞掂哂佢地去遊戲室玩住先, 等程生佢地都OK, 上新屋望一望D裝潢, 就去AEON食晚餐, 都係去食板長, 等咗半個鐘有位, 柏仲上半場瞓咗我地都食得安樂, 係之後比咗少少飯佢食啦又要玩! 老公一揍三去睇玩具, 我地埋埋單就上去睇多陣閃人, 去超市買咗餅仔比柏仲, 因為佢D手指餅食哂啦! 琴日睇到佢開始出到下排牙啦, 吽咗勁耐! 買完極速閃人又偷運埋我地返屋企先, 返到去都9點囉! 快手沖涼後柏仲頂唔順要瞓快手餵埋奶, 到笨元敷敷吓mask就瞓咗, 咪一齊抬佢上床囉, 跟住到我都敷吓mask啦! 10點幾老公話攰, 所以今晚唔夠11點就瞓哂!

<整裝待發游水水!>

 <四個小朋友合個照先!>

 <一日活動後敷個mask先keep到靚仔架嘛!>