28/8/14

28/8/14   THU   HOT

今日笨元真係正式一條友踏入學校啦, 佢就一向頭也不回架啦, 係做阿媽GE有D唔捨啫, 不過我已經係做到好放手GE阿媽嚟架啦, 見佢安全入咗學校就OK架啦! 朝早發生咗D小插曲, 嫲嫲唔記得笨元今朝要返學, 仲走去買早餐比佢, 撘遲咗班車, 搞到8:40先過到嚟, 好在我都趕得切揍笨元返學, 仲喺小巴撞到之前喺麥記識的媽媽, 大家齊齊返學! 今日起只可送到學校門口, 見佢地入咗操場就要讓開比佢他人入啦, 同monita吹陣水又見到程太啦, 咪齊齊吹陣囉, 不過時間關係真係要返工啦, 買埋早餐返到去都9點半, 不過今日都係冇咩忙, 咪做吓自己嘢又做吓公事咁囉! 午飯後落咗去睇手袋, 都係陪佢地睇啫, 開倉又唔係特別平, 我又唔需要買袋! 下午大老闆娘返咗陣啦, 之後都係吹水時間, 放工快手返屋企, 因為嫲嫲突然有街去, 但佢都煮起咗飯同一個餸, 淨番菜同蒸蛋我要整啫! 先沖個涼再叫笨元去沖, 跟住prepare吓D餸啦, 同笨元玩幾吓, 老公都返啦, 咪開飯囉, 今日冇咩餸啱柏仲, 佢就食到衰衰咁啦, 兩個細路食到一地都係, 我咪順手抺埋地囉, 搞掂哂都係8點半啫, 算唔錯, 當係一個預演啦, 嚟緊又要揍仔又要煮飯洗碗, 不過到時就多樣睇功課, 希望大家都合作, 等我唔洗發顛! 比笨元玩到9點半就瞓啦, 兩隻都瞓哂就自由啦, 老公又係要睇電視, 我頂唔順11點半瞓先!