31/7/17

31/7/17   MON   HOT

今日子元8:30荔天田徑, 所以7點幾要起身啦, 出得門口行得過去都過咗8點半, 佢又驚死遲到冇得入咁, 咁早揍到佢過去我返工又早喎, 蝕咗添! 朝早除咗開咗陣會都係做自己嘢, 午飯後都係hea吓, 大老闆娘返咗嚟, 但佢早日跌親, 老細仲講到佢阿媽扮嘢咁, 但睇個樣就唔似囉陰公! 下午老細全程喺到, 好在只係伴住佢D愛將, 冇過嚟煩住啫! 放工佢唔走我地走啦, 老公過咗嚟車我, 因為佢下午請咗假去揍子元踢波比賽嘛, 咁接咗我先去book咗冷氣星期六睇位報價, 跟住去咗大角咀叫鐵閘嚟度埋位, 然後再揍子元去打nerf, 咁我地又去睇吓間屋啦, 同師傅講吓D嘢點改等等啦, 一做到木器就多嘢錯! 等夠鐘就去接番笨元返青衣晚飯, 食完9點幾先走, 返到去都係沖涼瞓覺啦, 笨元11點幾都頂唔住瞓咗, 我就hea到1點先瞓呢!

30/7/17

30/7/17  SUN   SUPER HOT

今日full schedule, 朝早子元畫班, 揍完佢過去就接埋程生食早餐, 然後分工合作揍仔啦, 仲爺去小童上文盲班, 子元去打鼓, 跟住到接番婷婷回家, 再接番子元回程家快食個午餐, 我就跟程生車先接番仲仲, 老公就帶子元去足球選拔, 程生接埋程太佢地去浸信會的暑期聖經班畢業禮, 都係睇吓表演咁啫, 不過就先食咗嘢, 但食物就真係又唔夠又一般, 攞得一轉第二轉已經得番D餸尾, 食完嘢就睇表演, 仲爺嗰組佢原來叫做跳得幾好, 不過一開始入到hall時, 佢唔肯比我走要我抱住嗲仔囉, 最終都有老師嚟哄掂咗佢自己坐! 睇完表演同老公會合, 食少少嘢就入元朗, 康傑聚會嘛, 去咗個屋苑會所董事屋池畔派對, 幾經辛苦搬哂D貨同人上哂去, 笨元已經落咗水玩, 我就同仲仲換好衫, 睇到個池有D後悔冇帶泳衣嚟, 不過要著泳衣又唔想, 好矛盾! 最終都係喺岸睇住佢地啦, 忙忙亂亂咁, 仲爺又係咁跳水, 子元又係咁打架, 係好煩好勞氣架, 但大家都玩得好開心GE, 7點幾全部要上水啦, 仲爺最尾一個先上水, 係唔肯架喎, 要救生員話閂啦先肯! 沖好涼入番室內都係食同唱卡同打機囉, 一路到9點幾影埋大合照就攞車回程啦, 我已經攰到顛, 但返去仲要洗衫執嘢等等, 明天仲要早起呢!

29/7/17

29/7/17   SAT   SUPER HOT

今日活動都好多, 加上好熱好焗的天氣, 所以都好攰吓! 朝早子元9-11學田徑, 老公嚟車我地過去, 跟住我地就同仲爺去食早餐啦, 夠鐘就揍番笨元, 等佢沖好涼換好衫就入沙田, 約咗Carlie聚一聚, 先找地方泊好車再去商場行住等佢, 知佢差不多到就酒樓攞定住, 吹吓水食吓咁都點幾先上佢到, 又要撘的士先上得到去, 話哂九肚山喎, 上到去都係參觀吓先, 因為蝦米下個月要返愉景灣的學校, 所以佢地要舉家搬入去, 咁襯佢搬入去前咪嚟一次囉, 喺屋企玩咗陣工人姐姐就揍哂佢地落會所玩, 我地可以吹吓水, 不過4點多都要call番佢地上嚟, 因為子元5點要游水, 返得過去都5點有多, 好在都趕得切! 仲爺就瞓咗啦, 咁我地去咗買定明天康傑聚會的飲品, 再入青衣接咗嫲嫲先, 返泳池揍番笨元, 去咗樂富食嘢, 叫做去吓新商場, 但過去時又塞車咁都搞咗好耐, 所以食完嘢玩咗陣就回程啦, 返到去又係執嘢囉, 星期六日活動真係好多!

 

 

28/7/17

28/7/17   FRI   HOT

今日都係如常咁返工啦, 子元冇咁早學嘢, 我唔洗理佢! 返到去都係做吓公事做吓自己嘢啦, 今朝唔洗開會, 可以休息吓啦, 午飯時老細又一早返咗嚟, 完全冇義氣地快食快閃, 快手落咗樓, 本來都係預咗要去睇冷氣資料, 問咗有間淨機價算係最平! 問完就上埋759入吓貨, 下午老細喺到, 但冇阻住我地都算係咁啦! 放工馬上返去接咗笨元再接埋敏瑩就去小童合唱團, 我就等老公嚟接我, 原來佢先接咗嫲嫲同仲仲先, 因為出嚟美孚食上海嘢, 我地去攞咗住先, 仲要等到子元放咗合唱團, 車埋敏瑩返屋企先過嚟, 所以覺得食咗好耐咁, 食完就先車咗我地返屋企, 沖咗涼就休息吓囉, 仲要執明天出街的家當都有排忙!

27/7/17

27/7/17  THU   HOT

今日要開會, 朝早梳洗完就出門口啦, 買埋早餐返去食, 本來諗住過去之前都可以閒吓, 但老公又問油漆顏色, 深哥又叫我print嘢等等, 忙忙亂亂咁, 見老細11點幾準備出去, 梗係痴車坐啦, 慳番十幾蚊都好架! 不過落車位就佢地, 我又要行番轉頭都腳軟呀, 著住高踭鞋真係唔適合行咁多路! 食完就返去做嘢啦, 跟住都係D人嚟到吹吓水開吓會, 快D開完快D閃啦! 散場後去咗睇吓之前搵到嗰間晚裝鋪, 但又要上樓條sales又冇咩反應咁, 加上有碼啱就啱, 冇就冇, 所以都係廢話! 走人去咗IFC望吓, 但D鋪頭實在太高級, 入都唔敢入去啦! 所以都係得個吉, 返屋企揍仔算啦! 返去換衫換鞋換袋再過小童接子元, 等老公嚟到都6:30左右啦, 直過Mega Box, 先去提咗貨, 再食埋晚餐先跟住行埋IKEA, 因為轉緊新裝所以都冇咩睇, 最終連窗簾都買唔到, 因為已經賣哂, 所以只係買到勾同放門口塊板! 上大眾攞埋張會員卡就走啦, 老公要踢波, 快手車咗我地返去就去踢波, 我地沖好涼就睇電視打機到12點幾先瞓!

26/7/17

26/7/17   WED   HOT

今朝8點多先慢慢起身出門口, 因為太慢所以都趕趕地! 返到去食早餐開會咁啦, 午飯同事話出去食, 咁是但啦咪出去食囉, 個飯留多兩日應該OK GE! 去咗食嗰間東南亞嘢, 等得位食埋行一陣已經夠鐘! 下午都係做吓自己嘢, 忙忙亂亂咁又一個下午! 老公打嚟話佢今日要OT到8點, 所以我叫咗嫲嫲揍咗仲爺去小童就可以返屋企, 等我到時去接佢, 所以我放工返咗阿媽到接咗笨元先, 然後7點就去小童接仲爺, 要找個地方有冷氣有得hea又唔洗洗錢, 所以近近地就去咗愉景新城, 撘得巴士過去都7點幾, 比佢地喺反斗城行吓, 玩足大半個鐘老公到啦, 去咗食嗰間好好味的西餐, 襯佢仲好食時就食多幾次先啦, 食完都9點幾, 先揍咗仲仲返屋企先, 跟住再返荔欣睇一睇, 子元掛住要返去睇繼承者們, 最終佢留喺車用我手機睇住先, 我地上去望一望間屋囉, 順手放低埋張票就走! 返到去都係沖涼瞓覺啦, 襯埋明天套衫咁啦!

25/7/17

25/7/17   TUE   HOT

今朝子元要田徑, 所以7點幾就起身, 因為8點半集合, 快買個包比佢食就算, 點知去到等好耐齊人我先走得, 因為要等佢地講嘢呀等等, 9點多交到佢比miss我就即閃, 買個早餐返去食就算! 今朝都冇咩嘢趕, 都係做吓自己嘢啦, 午飯後睇吓電視咁, 下午老細返咗嚟, 不過梗係同D高層開會啦, 唔會煩住GE, 係間中過嚟吹吓水咁, 好在我都有D嘢做吓! 放工就直接過石硤尾接番子元放足球, 等佢放得嚟換好衫, 等多幾個字老公就來到接我地直接返青衣食飯, 返到去仲爺又瞓緊, 叫醒佢食飯, 又食到衰衰咁, 我唔餵架, 要餵你阿嫲餵! 但一落地玩我就攞衣架架啦, 叫做食咗小半餵咗大半囉! 跟住去咗麥當當食雪糕先返屋企, 仲爺聽到我要返婆婆到時, 拖住我嗰隻手即刻捉緊我, 不過安撫吓佢都OK GE, 雖則佢成日話要去婆婆到瞓! 返到去都係沖涼睇電視瞓覺囉!