31/10/17

31/10/17   TUE   COOL

今日涼咗好多呀, 所以子元要加多兩件外套, 仲爺換埋冬季添, 揍哂佢地返學就買少少早餐返工啦, 今日唔洗開會咁, 自由自在! 午飯後去埋銀行入埋錢又睇吓電視咁啦! 下午老細真係冇返啦, 佢要過海開會嘛, 所以又好自由, 大家喺睇吓衫, free到不得了! 放工返去接笨元就返去煮飯, 老公要踢波所以快手D煮好食, 佢兩父子一個又要咸蛋蒸肉餅, 一個又要梅菜蒸, 好在而家有蒸焗爐可以同步蒸到! 食完飯執埋碗老公就閃, 嗰兩隻嘢梗係唔合作架, 總之都係要出武器啦! 仲爺今日寫字有進步喎, 肯自己寫唔洗我陪, 刷佢又冇嘈, 笨元就叫咗佢自己溫吓中文小考的生字, 我都係搵吓卷比佢明天去婆婆到做架咋! 9點幾比佢地玩咗陣就瞓覺, 連笨元都咁早瞓, 佢應該真係好眼瞓囉! 我就睇陣電視沖涼, 老公10點幾都買埋糖水返嚟, 我衫都未摺好呢! 12點幾我頂唔住瞓先, 老公要打埋機先瞓呢!

30/10/17

30/10/17   MON   COOL

今日都係如常返學啦, 仲爺起咗身要跟埋落嚟! 食埋朱古力波波就出門口, 不過今日都遲咗D囉! 返到公司都係要開會咁啦, 跟住做吓自己嘢, 等食午飯睇吓電視啦, 老細一路都冇返, 安安樂樂咁等收工, 點知4點幾老細走咗返嚟, 真係估佢唔到, 放工前仲打過嚟, 我話我閃了!! 同阿媽約咗喺地鐵口交收笨元, 返屋企等煤氣公司嚟整乾衣機, 好在我地又早咗喺屋企, 咁佢就早D上嚟整, 又整得番喎, 咁我就唔洗攞衫落去洗囉! 老公今晚話想食叉燒煎蛋飯, 加埋嫲嫲話整咗蘿蔔牛腩, 咁真係唔洗整餸, 等師傅整好乾衣機就可以煮飯啦, 冇咩整7點多就可以食飯, 仲爺好比面喎食得好快, 因為想玩槍, 但個個食緊飯唔可以玩住嘛! 之後都係多爭吵架, 不過係咁架啦! 笨元今日又係唔生性GE, 我同仲爺做緊功課時諗住佢做英文卷, 點知我出嚟就見到佢喺房玩緊, 真係激到爆, 係咁鬧鬧鬧! 最終佢都有做, 但我真係火佢浪費時間囉! 沖好涼邊睇電視邊摺衫, 今日新劇但有嚇人位, 所以睇睇吓都轉番台睇主君算啦, 老公又一早瞓咗, 搞到我睇睇吓電視瞓咗都冇人叫醒!

29/10/17

29/10/17   SUN   COOL

今朝子元都係要學嘢, 9點畫班完又打鼓, 跟住又要去沙田參加數學比賽, 所以一朝都好忙碌! 數學比賽原來敏瑩晴晴佢地都有參加, 我地把握一小時去咗新城市, 其實都係想搞番掂張電話卡, 但原來又唔關喺門市事, 等老公處理啦! 同晴媽會合就行返去泊車位攞車, 咁之前晴媽比咗條番薯仲爺食, 上咗車時, 仲爺知道仲有一條就想再問攞嚟食, 但佢係咁問囉: 「媽媽我仲想食倉鼠呀」真係比佢笑死, 係老公先明原來佢想食蕃薯! 去接咗佢地就返咗長沙灣食米線, 跟住返屋企溫書, 其實中文都唔知點溫, 好空泛咁! 所以叫佢一路講要考D咩, 再找堆練習比佢做囉, 咁我就摺衫囉, 期間係咁趕仲爺瞓覺, 老公反而自己入房瞓鬼咗, 可惡! 做完中文做英文, 又係錯埋哂D無謂嘢, 都鬧唔到咁多, 唯有教多幾次技巧囉, 唉! 7點多真係要捉佢地起身, 出咗去海運食KFC然後行反斗城, 老公買咗支NERF比仲爺, 等佢兩個有得打咁解! 反到去玩埋先瞓都11點多!

 

28/10/17

28/10/17   SAT   COOL

今日紅日唔洗返工, 不過子元照要上英文, 起身出得門口又遲, 揍咗佢去我地又要攞衫去洗, 因為琴晚個乾衣機壞咗我地又真係冇位晾衫, 唯有攞去洗囉! 接番子元就返去做功課, 仲爺都4樣功課要跟呢, 到咁上吓2點多就出去食飯, 近近地去香港地食咋, 因為返去繼續努力! 老公搞掂仲爺瞓覺, 我就同笨元溫書到4點幾, 佢又去游水, 我就邊睇電視邊摺衫啦, 差不多7點仲爺又醒咗, 找就執緊嘢喎, 於是叫老公落去接子元, 返上嚟沖好涼又去捉圍棋啦, 我地就去咗實惠睇傢俬, 諗緊個電視櫃, 本身嗰個因為真係已經舊, 二來而家個儲物空間真係不足, 始終冇咗個飾櫃! 咁睇到有個電視櫃幾好, 只係有D貴啦, 8千幾蚊, 但真係好夠儲物位又襯到色, 睇落又唔算大個喎, 幾好! 夠鐘接番子元就去食粥然後返屋企啦!

27/10/17

27/10/17   FRI   WARM

今日要過商會開會, 朝早揍咗笨元校車就搞掂仲爺出門口啦, 食埋個早餐入學校都遲遲地啦, 返到公司快手整好D嘢, 都開一開會先閃人, 過去約咗Nicho佢地食lunch嘛, 今次試新嘢喎, 都行得遠, 不過之後又可以shopping吓零食咁都幾開心! 返上去都冇咩要寫, 所以都係打吓機HEA吓, 等夠鐘齊人開會, 其實開到3點幾GE啫, 但老細又係到我又唔走得, 之後仲要因為避佢, 要深哥同我配合扮仲有嘢做, 等佢地閃咗我先行人! 因為今日放咗子元喺鄰居到咋, 唔可以太遲返去! 本來諗住返去慢慢執吓屋, 點知老公話佢又早放, 所以佢同我差不多時間返到嚟, 冇咩做到就出去, 因為今日係諗住出吓街, 去咗荃灣間IKEA睇吓, 本來想去嗰到食, 但實在太多人, 唯有轉去愉景新城食咗嘢先, 再去行囉, 不過都麻麻地好行, 因為不是順住路行而是有回頭路, 我主要買咗我要買GE嘢, 睇完就回程了! 都已經好夜, 返去快手搞掂沖涼瞓覺!

26/10/17

26/10/17   THU   COOL

今朝仲爺都係冇一齊起身落樓, 而家真係好怕佢會喺嗰段時間醒咗走出街! 食埋早餐返學啦, 但仲爺就係襯我落咗樓起身時, 又去食物櫃偷嘢食, 所以食朱古力波波時又放慢, 著鞋著襪又唔願自己著, 咪比我丙囉, 落到樓又到我發現唔記得帶電話, 又要返上去攞, 結果好遲先返到學校呢! 返到公司食埋早餐咁, 都冇咩嘢做, 吹吓水做吓自己嘢, 午飯後睇吓電視囉! 下午都係自由時間, 老細冇返嚟真好! 放工揍笨元啦, 老公要OT, 所以我買簡單餸返去煮意粉咋, 佢地兩個反而食得好開心呢! 食完沖涼做功課, 今日要放棄仲爺, 因為哥哥的除數錯到九彩, 明天又中進, 點都找D練習佢加操, 雖則婆婆話已經溫好! 9點半捉仲爺去瞓, 佢今日又真係合作喎, 咁就再教笨元一輪, 找好練習比佢我就可以沖涼, 睇住主君咁幫佢對練習啦, 都OK GE, 希望唔好又失手啦, 好鬼驚! 等老公等到12點都仲未返, 等到佢12點幾回來都未食飯, 原來佢OT係舊老細找佢, 想佢過檔幫手搞海水化淡廠, 咁事業呢家嘢我都盡力支持GE!

25/10/17

25/10/17   WED   COOL

今日仲爺知道又送唔到哥哥校車, 都有D想扭架, 快手搞掂出門口啦, 揍咗仲爺入學校就食早餐, 返到公司要開會囉, 跟住今日都好勤力做嘢, 都冇咩做自己嘢呢! 午飯後睇吓電視, 下午又開工, 老細返咗嚟, 唔知係咪冇人理佢, 係咁走過嚟講嘢, 煩到死, 好在我都有嘢做, 唔係要搵嘢出嚟做就慘! 放工閃人返去買嘢煮晚餐, 因為有條札肉, 所以今晚煮麵, 本來想再襯多樣, 但買唔到料就放棄了, 返去接得子元, 去藥房買D嘢又走咗班巴士, 返得去都6:45, 老公不一會都返, 佢幾積極幫手煮, 因為要出去踢波嘛, 原來就咁雞胸肉白菜仔札肉滾起做湯煮麵好好味! 食完收拾吸塵抺地, 子元同仲爺沖涼, 還要做功課對功課, 10點幾先沖到涼, 老公12點到先返到嚟, 我都摺好哂衫囉!