30/3/17

30/3/17   THU   WARM**

今朝仲爺聽到鬧鐘係都要一齊起身, 忙忙亂亂咁出門口啦, 揍咗子元上校車就返去叫daddy起身啦, 今日都早去到學校, 但又不足以比仲爺食埋早餐, 不如早D上去玩吓啦, 好笑事發生啦, 因為仲仲上到學校門口一見到同學仔, 就叫佢個名, 然後兩個向對方跑過去, 再互相擁抱, 真係好似做戲囉! 返到公司都冇咩忙啦, 都係做吓自己嘢吹吓水睇吓書咁, 午飯買咗米線, 諗住食完過去幫子元交鼓錢, 點知拉咗閘喎, 明明寫住1點開架嘛, 我就照打電話入去, 睇吓會唔會飛去手機啦, 結果都係冇, 等到1:50冇得等啦, 咪返公司囉, 到我返到去樓下就打番比我, 激死! 佢話佢去咗買嘢食喎, 頂呀! 明天才交啦, 我唔理啦! 返到公司都係hea吓啦, 又找唔到咩新書好睇喎! 放工接咗笨元就返去煮飯啦, 老公去踢波, 咁得我地3個簡單地焗雞飯炒個菜就算, 老公揍咗仲爺回來就閃人, 7點幾食得飯, 仲爺又食到衰衰咁啦, 佢要餓得好透先得! 食完洗完碗要抺地啦, 叫仲爺執嘢佢唔理我嘛, 又要我發顛, 究竟呢條友要點教先得, 吓吓我好聲好氣佢係唔理架, 係要我大大聲先得! 終於搞掂哂, 比佢地玩到8點半就沖涼, 跟住我睇子元功課, 都叫佢同仲爺玩陣先, 反正仲仲明天學校生日會, 唔洗理功課住啦! 等仲仲瞓咗, 教埋子元處理佢篇中作, 你話好差又唔係, 但總係唔知點咁, 佢仲未識作文時拿重點囉! 沖好涼就摺衫啦, 3機衫都摺咗差不多1個鐘, 老公肯定吹水吹到唔知時候啦, 又買錯糖水比我喎, 可惡呀!