30/11/17. THU. WARM
今日出去開會開咗一日， 仲要攞住一大堆嘢， 我真係攞到手都軟埋！朝早揍咗仲爺返學交收埋校服， 就同老公返美孚食個早餐先， 佢就要返大陸做嘢， 我就可以返屋企先， 因為11點先出去開會嘛， 開工展沒有得唔出席啦， 執吓嘢襯吓衫摺埋d衫先出門口啦， 過到去剛好攞齊文件開始， 關我事嗰d先聽啦， 不過都聽聽到12：45先走， 未夠鐘開製藥會啦， 所以去咗自己食個飯先， 唔想去餐廳食嘛， 所以都係去citysuper買嘢食上去望住個維港食囉， 幾好feel 呀！ 食完又去行咗陣街先過商會， 老細到咗啦， 但佢同李太吹緊水， 唔洗理佢， 就算佢坐咗過嚟， 其實都唔多想理佢架！今日又要開理事會又要開會員大會， 所以都搞到差不多4點先散， 又要等老細走咗我先走得， 捧住嗰堆嘢行堅喺攰， 去ZARA買埋腰包比老公， 衫比子元， 就入青衣接仲爺啦， 我最終都頂唔順要撘的士返嚟， 否則趕唔切5：30接番子元， 返到去收拾好就開始煮飯， 佢兩個喺廳玩到亂哂龍， 好在食飯時都順利， 8點捉佢地沖涼， 仲爺先搞笑， 佢玩緊抄牌呀等等就精神， 但我叫佢讀字卡時就話其實佢好眼瞓， 比佢玩死！K.O.咗佢就同子元睇練習， 9點幾沖完涼， 老公返咗， 都係做吓家務等收工啦。
2017年11月29日 星期三
2017年11月28日 星期二
28/11/17
28/11/17 TUE COOL
都係咁趕返工返學啦, 買埋早餐返公司食, 寫埋日記等都要開工啦, 今日要處理吓D請帖, 因為真係要開始寄, 但老闆請嗰D人仲係未比到姓名, 咁請問寫咩帖呢, 不過都要諗吓點搞架啦, 明天會仲忙呀! 午飯後樓上係咁鑽嘢好嘈, 咁咪落街行吓囉, 結果又洗錢啦, 不過抵GE反正都要買又有平! 下午繼續同D地址博搏鬥! 好在整極都開始唔到咁, 激死! 放工慢慢行去接埋笨元先回家, 一來佢踢波實遲放, 二來又唔洗買餸, 因為嫲嫲話想出嚟食粥! 咁返去笨元做D功課先啦, 今日太多功課做唔掂, 出去食完回來其實都係8點幾9點, 沖完涼做11點都未做得完, 因為真係好多數計, 又要寫文佢實死啦, 幫佢諗住都down哂機咁! 我今晚都攰啦, 12點多睇完電視都瞓啦!
2017年11月27日 星期一
27/11/17
27/11/17 MON COOL
今日都係要返工返學啦, 朝朝早都係咁趕架啦, 仲爺又要一齊落樓喎! 買埋奶返去沖朱古力波波, 食完快手出門口! 返緊工時程太話想我幫手去荔天睇吓小一派位, 一來網上未有出, 二來有媽媽話世襲都冇名, 咁見有時間咪幫佢去睇吓囉, 見到有呀冇問題, 後來先知係個媽媽睇錯號碼!
星期一又要開會, 但有咩嘢講呀, 所以我都冇寫記錄! 跟住全日就要努力寫星期四開會的講辭, 真係寫足一日囉, 要寫番3個人的講辭真係要用好多腦汁! 午飯食咗米線咋, 但好似唔多夠咁! 下午努力咗好耐, 差不多放工先搞得掂, 好在唔洗趕過去接子元, 程太幫我接埋喺惠康交收, 我就可以買住餸等! 返去叫笨元做好D嘢我就煮飯, 7點幾開得飯, 老公食完去踢波, 我洗好碗就趕佢地去沖涼, 又要我勞氣, 勞到我都唔記得抺地! 佢兩個沖涼時我就對功課, 仲爺沖好涼就溫咗陣書佢都眼瞓, 佢瞓咗就叫子元改正, 我沖涼時佢又要整視藝功課, 結果都係冇溫書! 邊睇電視邊等老公返嚟, 因為佢冇帶KEY喎! 我都勁眼瞓, 但等埋佢都12點幾先瞓呢!
2017年11月26日 星期日
26/11/17
26/11/17 SUN COOL
今朝笨元要足球比賽, 老公揍佢去, 我堅唔想起身住, hea到8點幾, 點都要起, 梳洗完整早餐食, 同仲爺煮丁麵煎蛋算, 食完我又要執拾洗碗打掃, 個地實在太多日冇抺, 仲有床單等等, 處理好攞落去洗衣鋪洗, 就同仲仲去玩遊樂場, 間中有D活動時間係為佢都幾重要, 唔係成日就係陪出陪入咁都好慘! 玩咗幾層公園我都要去買咖啡, 叫佢攞住影張相啫, 佢就起勢咁啜, 雖然重古力味重但都係咖啡嚟架嘛! 行返去時又去吓圖書館咁, 返到去佢繼續玩車, 我就換埋D床單, 仲有對子元D功課, 1點幾佢地返到嚟, 叫老公落去幫手攞番D洗好的床單, 跟住就叫子元改功課! 佢又問可唔可以睇吓有冇得睇雷神, 又比我地找到3點有場, 不過嫲嫲唔得閒揍住仲爺, 唯有帶埋佢去囉! 本來去青衣城睇, 但見到荷李活廣場有3:50, 時間鬆動D可以食埋嘢先, 戲院又大D添! 去到食咗間越南嘢又幾好食喎! 都係Mavial的戲好睇D, 前文後理合理D, 劇情又好笑D! 仲爺睇到一半又瞓咗, 都好GE喎洗成日問幾時做完! 睇完6點幾去長沙灣食晚飯, 老公話試吓嗰間漢堡包, 堅係好食喎! 去彈吓波波買埋糖水就回家啦,
K.O.咗仲爺9點半睇降魔的大結局, 跟住又要快趕子元去瞓!
2017年11月25日 星期六
25/11/17
25/11/17 SAT COOL
今日要返工呢, 兩個細GE係一早起咗身呀, 不過喺到玩囉, 到我8點起身時又要趕佢地梳洗出門口, 送咗子元去學英文, 又要返工啦, 今日深哥過嚟開票, 9點幾開始做做到11點幾先搞掂, 真係手都軟呀! 跟住做吓自己嘢都已經差不多放工, 子元又走咗上嚟POPO, 仲爺又喺車瞓咗! 今個下午可以去吓街, 其實今個星期都冇咩溫過書,
但我又真係想去吓街嘛! 最終去咗德福行, 本來想去埋Mega Box,
但淨係行德福都差不多, 先去食咗間東南亞嘢, 跟住去睇玩具, 老公再買生日禮物比仲仲, 因為上次嗰份係嫲嫲買架喎, 而家要襯番個車場景再買條高架路! 我就買咗snoopy袋, 再去Uni買咗3件Snoopy衫, 仲爺子元同我一樣款, 老公點都唔肯! 4點幾要閃啦, 子元游水游5點, 由於佢冇攞泳衣, 唯有佢先去泳池入咗去先, 我上樓攞衫比佢囉, 又要我跑一餐! 仲爺唔瞓覺, 咁就做功課啦, 都做到7點先做得完, 快手落去接子元再去攞Pizza, 返去食完睇吓電視砌吓條新馬路咁, 老公6點多已經出咗去踢波! 睇到9點幾時, 子元突然話佢冇攞番對波鞋, 漏咗喺泳池喎! 我真係即係冒火, 又要全部人同佢一齊落去攞,
已經差不多閂門, 冇工作人員喺到佢又唔敢入去喎, 都係要我同佢一齊入去, 好在搵得番啫, 咁工作人員可能遠遠已經見到我團怒火, 所以冇話我地咁走入嚟! 返上樓叫佢地執嘢沖涼瞓覺!
我仲有好多衫要摺呢, 老公10點幾返到啦, 不過佢又睇波咁, 我太攰啦, 冇理佢瞓先啦!
2017年11月24日 星期五
24/11/17
24/11/17 FRI COOL
今日落樓嗰吓都幾凍吓, 揍咗子元上校車就快手返去換衫, 仲爺今日要變紳士look, 叫老公快D起身幫手換衫, 整靚仔先出門口, 食埋個早餐就返學! 老公今日又請咗假油仲爺個房,
但我估佢都未必油得哂, 以佢D龜速係咁上吓! 返到公司都係做吓公事做吓自己嘢啦, 午飯同咗隔離寫字樓的人食飯, 其實我都冇諗住找佢食架啦, 不過咁啱返工時撘lift佢喺後面, 講開我今日冇帶飯嘛咪一齊囉, 但估唔到食嗰時除咗佢仲有6位男子啫, 查實佢有冇同D同事講我已經係阿太嚟架啦喎,
若果想識女仔我真係幫佢唔到呀! 原來做IT的男子都係幾悶吓, 所以餐飯都幾悶吓, 食過一次就算啦! 下午都係做吓嘢咁, 老細返過嚟比佢簽吓嘢咁啦, 等佢走咗又自在架啦, 放工返到去見到老公完成得好少部份…唉…都遇咗架啦, 又要揍子元去合唱團, 好在程生打嚟叫放嗰時揍敏瑩, 咁我去呢程就叫佢嚟車子元啦, 一人揍一程幾好! 返上樓本來想摺咗D衫, 但因為要整子元隻錶, 都係做唔切, 又要落樓交收咗D膠箱, 好忙呀! 去小童接咗佢地, 送敏瑩返去再入青衣, 揍埋佢地出去長沙灣食大牌檔,
老公成日想試警署對面嗰間, 又有佢想食GE羊腩煲喎, 啱哂啦! 地方就麻麻架啦, 但價錢相而又好食就得啦, 食完送嫲嫲返去時已經要開住部手機睇降魔的, 仲爺喺車瞓咗, 返去唔洗服侍佢, 睇埋最尾嗰part就沖涼, 還要做吓家務等等, 12點幾先瞓呢!
訂閱：
文章 (Atom)