3/11/17

3/11/17   FRI   WARM

今朝叫醒子元, 比番D甜頭佢呵番吓囉, 希望佢今日醒醒定定啦! 仲爺一齊揍哥哥上校車, 跟住就快手搞掂出門口, happy Friday出去食早餐先返學, 不過比仲爺食咗我半份早餐, 真係唔多夠要買多少少嘢食! 星期五一定係開會日架啦, 朝早開sales啫, 都冇咩可以做吓自己嘢, 係午飯後最慘, 老細返咗嚟, 話要傾100周年D嘢, 淨係講清楚咩公司請咩人都已經講十世, 因為每講一個人都要講佢D歷史咁嘛, 點會開得快, 定埋rundown, 差不多5點先放番我過去, 真係已經咩都唔想做囉! 放工可以去shopping, 本來只係想去萬寧架咋, 但經過759記得有66折嘛, 咪上去八吓囉, 結果又買咗百幾二百蚊嘢, 但真係比平時買開平好多嘛, 我已經買得好忍手, 我要自己揹住行返去喎, 唔可以大手入貨呢! 行到返樓下老公佢地就出到嚟, 所以我都冇得返上樓, 直接過咗實惠睇櫃買埋添, 跟住就去潮爆攞定位叫定嘢食, 老公去小童揍番子元同敏瑩, 問吓佢地英文考試點, 又聽到佢地喺到討論班入面嗰幾個有問題同學點搔擾佢地上堂等等! 呢間雞煲真係好食, 仲爺有嫲嫲全程餵食, 仲要邊睇手機食, 我真係冇眼瞓, 當佢睇咗一個鐘要佢收機, 好在有紙有筆佢就畫公仔囉, 畫咗機械人話要送比蔣老師喎, 仲要寫咗D英文字喺到, 文盲仲終於識字啦, 哈哈! 食完送嫲嫲返去時仲爺已經瞓咗, 又唔沖涼就放佢落床, 我地就可以舒服地睇吓電視, 笨元要睇嘛就要幫手摺衫囉!