16/11/17

16/11/17   THU   WARM

今朝都係如常咁揍仔返學啦, 買埋早餐返公司食hea吓咁啦, 朝早都係做吓自己嘢, 今日都係冇咩mood又未去到咁趕, 所以可以自在吓先! 午飯後都係睇吓電視啦, 下午本來都係可以輕鬆吓, 點知marketing同事約咗D人上來傾嘢, 咁我又要幫手啦喎, 咪要一齊開囉, 不過冇老細唔一齊開已經係最好, 佢只會出醜囉, 不過咁開都講咗個幾鐘呀, 真係攞命! 之後仲有D後續要處理, 做到差不多放工, 有嘢明天繼續! 快手去美孚接番子元, 因為佢過咗去補英文, 星期六日太忙啦完全砌唔到時間出嚟補! 接咗佢就去街市買埋餸, 子元成日想食魚, 但平日買餸的地方又唔經又貴, 所以難得去街市買就買魚啦, 倉魚都係$20咋嘛, 惠康買差不多$70喎! 返到去整少少嘢又要落樓接仲爺, 因為老公要車嫲嫲出去先再回來食飯, 所以我慢慢煮, 本來想早D同佢地睇功課, 但兩個又攤哂D車出嚟玩, 見又唔係急得咁緊要就由得佢地玩啦先啦! 老公8點前返到嚟, 開飯食得嚟都8:30, 忙忙亂亂咁洗碗抺地, 佢地就沖涼啦, 搞掂就趕佢地做埋D功課, 溫埋書仲爺就自己玩Lego, 玩一陣就捉佢瞓啦, 我就對子元功課, 不過我實在太想睇 “降魔的”, 所以開住電視對功課, 唔太專心架啦! 最後笨元10點幾11點食埋雪條先肯瞓!