30/4/18. MON. HOT
放埋今日假咪好囉，無端端又返一日咁幾無癮！朝早6點幾突然醒咗，唔見老公喺隔離，原來佢喺廳瞓咗瞓天光，真係比佢激死！不過好搞笑仲爺走咗出廳見daddy咁瞓咗喺到， 竟然係攞張被比佢， 你話係咪冧死人！揍仲爺返學啦，因為子元今日係教師偷懶日放假一天，所以派佢揍仲爺返學，大個仔冇問題啦！食埋個早餐就車我返工，再車子元去婆婆到，老公今日請咗假， 佢要去煤氣公司簽約，新開始啦，我都相信個天會有最好的安排！今日我返去都係做吓自己嘢又扮吓工咁啦！午飯後要睇電視，上星期五邊有時間睇！下午都係做吓自己嘢， 想找工都冇咩啱！放工老公嚟接我， 佢今晚又約咗人食飯，最終我地3個就同letty家去咗青衣戲棚食，其實好食又唔係，當去體廿驗吓囉！雖然都食咗百幾蚊嘢，但8成都係子元食！由於大家都唔係食咗好多嘢， 所以決定再去食其他嘢，最終決定咗去食壽司，子元坐頭位食得實在太多嘢，去759shopping埋先返屋企！
2018年4月29日 星期日
29/4/18
29/4/18 SUN WARM
今日係足球日, 子元盃賽由9點踢到6點, 跟住又到老公去踢,
我就唔多的得起個心肝做家務, 只係摺咗衫抺咗地咋, 簡直係咩都冇做過! 講番早上7點幾就出門口, 先去接番兩隻嘢去球場, 子元竟然帶錯黑色褲, 又心人鬧, 我地又要返去幫佢攞啦, 跟住睇咗佢第一場波, 子元就冇入波架啦, 但都踢得幾好, 仲影到個有個施丹轉身唔錯添! 睇完一場我地就去食早餐先, 然後我同仲爺就返屋企啦, 冇可能咁樣陪佢喺球場一日! 去美孚買埋餸, 返到去先叫仲爺沖個涼, 跟住咪任得佢玩囉, 我就抺番個地先, 等佢可以喺地任玩, 然後我就hea啦, 除咗摺埋衫, 同不停要執仲爺啲玩具外真係冇做過咩! 午飯整咗白菜雞肉上海麵, 真係幾好食架, 仲仲而家都會食哂! 老公佢地5點幾6點返咗嚟, 子元佢地贏咗冠軍呢! 咁老公又要去慈雲山踢, 子元又話唔想去, 仲爺又話要去, 咁又要我決定去唔去, 咁真係好難囉, 最終都係一齊過咗去, 咁老公就踢囉, 我就同咗佢地去遊樂場, 不過個場又細, 仲爺目標到個姐姐就跟住人地係咁玩, 子元本來打緊機, 後來嚟咗兩個男女差不多年紀, 同佢地玩本來都冇咩, 但我覺得個女GE態度麻麻, 就叫子元唔好同佢玩啦, 惹到麻煩就唔好, 見差不多完場就去搵番老公, 仲要趕泊車未過鐘前離開! 去咗鑽石山食埋嘢就回家啦, 子元就要買咗件衫囉, 又唔帶嘢換又玩到濕哂! 仲爺食完飯已經瞓咗, 搬鬼死我! 返去快手沖涼瞓覺啦, 老公要等11點才有夜泊, 我陪到1點幾都真係攰啦要瞓!
2018年4月28日 星期六
28/4/18
28/4/18 SAT
WARM
今朝子元要踢波,
咁8點前佢地已經起身出門口, 我唔理啦我要休息, 瞓到9點先起身, 仲爺睇緊youtube, 我咪梳洗然後整早餐囉,
都係啲即食嘢啫, 然後就同仲爺做功課啦, 今日又算生性喎, 肯做肯答好快做好, 佢真係一啖砂糖一啖屎! 做好功課咪可以玩囉, 子元踢完波返來又係要做功課, 仲仲就去學音樂, 我就繼續留守屋企, 差不多2點就炒起啲飯做午餐, 食完對吓功課咁, 都冇咩溫到書, 都要開始溫啦, 6月初又考試! 仲爺學完嘢返嚟喺車瞓咗, 等佢瞓醒才送佢地去嫲嫲到, 因為今晚我地要去睇演唱會, 今次到我要睇趙學而呢, 5點幾放低佢地就先去紅磡找標位泊好車再去黃埔行吓, 7點幾返去入標再食埋晚餐就行去紅館, 都8點9左右先正式開場, 99%的歌我都識唱架啦,
係得1首真係唔識, 仲有張智霖做嘉賓, 勁呀! 11:10就完場啦, 當然不能用克勤嗰種演唱會模式去比較, 入得場的一定係鍾意先會去, 唔似老公話有次去聽張學友, 前面條友都唔知邊個係學友咁, 同埋好多強國人囉! 睇學而local好多! 返到美孚泊咗去泳池,
夠平嘛安全啲!
2018年4月27日 星期五
27/4/18
27/4/18 FRI
WARM
今日一路都好期望有請我嗰個電話打嚟, 但最終都失望而回啦, 算啦, 可能個天覺得呢份工唔適合我呢, 老公又轉新工, 所有嘢都要適應過, 或者等佢嗰邊穩定咗先到我呢, 雖然對住呢個老細真係會顛, 但只要咩都唔上心就得啦, 反正你做咩佢都唔會覺得好, 對人唔對事之下你做咩都係冇意思! 講番今日啦, office hour都係無無聊咁有嘢就做,
冇嘢就hea啦, 都再send 咗幾份GE, 然後都係諗住晚上的活動算啦, 人生得意需盡歡呀! 放工去畫室接咗3個細路, 但我又未買嘢飲, 黑起上嚟連巴士都蝦我, 等咗3個字先有車, 最終同程生夾一夾, 子元帶佢地上去先, 我去買嘢飲, 不過咁搞得嚟我都7點先開始煮到晚餐, 個人都好亂! 老公回來叫做幫手睇住啲細, 我都盡力煮住先, 朋友仔們慢慢齊人, 我主力喺廚房, 但就知道出面好嘈囉, 梗係啦, 齊人時係13個細路, 7個大人喎, 我間屋有幾大啫! 8點幾終於開得飯, 要佢地唔好打機住啦, 不過又嘈又亂咁真係幾得人驚! 邊立食邊吹吓水啦, 到咁上吓我要處理吓仲仲間房, 因為佢地真係將間房反轉咗, 啲書一地都係玩具一床都係, 我都執咗一輪先執得掂! 子元就同大哥打機, 少男果然係做呢啲架啦, 女仔就喺佢間房搗亂, 我話你地玩還玩, 唔好掉佢啲公仔落地, 子元反面架! 安頓好兩間混亂的房間就可以吹吓水啦, 唔覺唔覺都玩到10點幾11點先開始走, 等佢地走哂馬上捉兩個細沖涼瞓覺, 我都攰到隻嘢咁!
2018年4月26日 星期四
26/4/18
26/4/18 THU
COOL
今日要開會, 所以搞掂哂佢地又要選衫返工啦! 揍咗仲仲返學就去食埋早餐先返工, 朝早都係處理埋律師樓單嘢, 11點幾先出門口過去商會同深哥食飯, 跟住返上去都係做吓嘢, 講吓人壞話啦, 唔係可以點呢, 去意已決只係欠一個新GE安身之所啫, 有錢我即刻閃咗啦, 真係要去買番條六合彩博一博先! 2點多開始有人到, 咁都唔可以講得咁多啦, 之後都好忙咁, 又要叫啲人簽嘢, 又要做記錄! 開到關於咩鬼博覽會時, 都估到實唔會參加架啦, 鬼叫得郁佢地去參加呢啲嘢咩, 係老細呢D先比人呃到覺得有數為GE啫! 最好笑係大家今日開會都非常暢所欲言, 因為我老細唔喺到喎, 即係真係唔關我事架, 唔係我地覺得佢有問題, 係好多人都唔like佢囉, 算啦….跟著個咁GE老細, 點都係要走架啦! 搞掂哂啲嘢4點多走得, 先去葵廣換番個mon貼先, 跟住去搵番個機套, 終於找到個純透明軟膠, $12咋, 咁樣換一換全部都係$70,
仲比我找到個5S的機套, 可以買埋比子元! 完成就返美孚買餸, 又要買定明晚啲餸, 又要買今晚餐餸, 咩都未諗囉, 幾經辛苦買齊嘢返屋企, 可以休息吓先, 整好今晚啲餸, 6點幾打比老公睇吓點接番子元, 最後選擇佢來車我再去接, 點知個衰仔又冇做功課罰留堂, 齊齊要等佢, 返得屋企都7點幾, 煮好飯食埋就各有各做好嘢啦, 睇埋仲爺功課溫書, 又到子元啦, 條友又做漏嘢, 中默今次又錯好多, 唉……我話你再係咁就要扣押所有遊戲機! 終於K.O.哂佢地可以摺衫睇電視啦!
2018年4月25日 星期三
25/4/18
25/4/18 WED
WARM
今日如常返學啦,
揍咗子元校車就要返上去同仲仲沖涼, 換埋靚仔衫就返學, 今日搞咩模擬面試, 其實對仲爺嚟講都冇咩意思, 因為佢都唔會面試架啦! 揍咗佢返學就買埋早餐返工啦, 都係做吓嘢咁啦, 朝早都冇咩, 但午飯後大陸打嚟話老闆間屋嗰D文件欠咩咩咩咁, 我睇番哂啲email, 其實我叫咗律師事務所做架喎, 但原來條友冇做到, 大陸又話要趕因為話6月又改政策, 總之而家要諗吓點拆掂佢啦, 講番轉頭咪又係老細煩, 問咗佢幾個月究竟仲做唔做, 若佢11月時搞掂就即刻比文件我, 我咪去處理囉, 攤咗3個幾月先, 仲有又求奇將啲文件比條PK send上大陸就算, 都唔係跟程序做嘢,
你叫我去跟進件事GE, 但我問你嘢你又唔答實我, 要的文件又唔比我, 我問你做定唔做你又唔比答覆我, 然後又可以話我做嘢唔附合你要求, 咁老實我唔識做囉! 一句講哂巧婦難為無米之炊! 真係好希望星期五有好消息, 份工請我啦, 我好想離開呢到呀! 點都要處理埋件事架啦, 希望好好收埋個尾啦! 放工去接笨元返屋企換衫, 等老公嚟接我地去AEON, 食飽去shopping,
細路去打卡機, 9點幾返到屋企, 沖好涼睇功課, 仲爺今日又好合作喎, 知到我攞格仔紙出嚟係要寫番今日教的中文字, 數學就用咗另一個方法叫做教咗佢減法囉, 原來都唔止佢唔識, 其他同學都係唔識架!
訂閱：
文章 (Atom)