又係一個超凍的日子, 躲在家開哂暖風都仲係凍, 難為佢地返工返學, 今朝蕃薯7點叫食, 若返工時間就啱啦, 不過我就要自己早D起身做好哂梳洗嗰D囉, 餵餵吓又唔肯食, 咁我又幫笨元換埋校服先啦, 天氣太凍唔可以比佢自己慢換! 跟住再餵埋D奶再比佢坐陣啦, 條友食飽又疴屎啦, 清潔埋就瞓得, 我就煮早餐啦! 食完個豐富早餐就做吓家務咁囉, 再等夠鐘同蕃薯沖涼, 食埋奶又再瞓啦, 老公點幾買咗飯返嚟一齊食, 下午都係hea吓咁啦, 4點叫醒隻蕃薯食奶, 之後佢又再瞓喎, 5點幾老公揍咗笨元返嚟, 都有D奇怪架啦, 原來笨元漏咗個書包喺巴士站,
嫲嫲要返轉頭幫佢攞番, 好在執得番咋, 真係冇鬼用! 幫笨元沖咗涼, 本來我諗住沖架啦, 但老公話打邊爐冇可樂, 我見自己幾日冇落過街咪落去買囉, 另外仲買咗少少日用品! 返嚟都照沖埋涼先食晚飯, 然後餵蕃薯飲奶啦, 諗住放番佢入房就嘈, 意想不到地佢又唔嘈又唔係瞓喎, 到差不多10點先嘈, 抱佢出嚟玩到11點多, 老公頂唔住瞓咗先, 咁我咪要頂埋佢囉, 到11點幾蕃薯好似真係好餓咁喎, 咪早半個鐘餵佢囉, 佢又食到喎, 莫非天氣凍真係快餓D! 餵完佢睇埋建元風雲就瞓啦, 蕃薯今晚都算合作喎, 放番落床肯瞓, 係喊咗一陣啦, 不過老公D鼻寒聲真係好勁, 我好辛苦先瞓得著!
沒有留言:
張貼留言