20/2/14

20/2/14   THU   VERY COLD 9度

今朝如常一早起身梳洗完捉三位起身, 搞掂笨元起身我就可以餵柏仲, 都食得唔係好合作架啦, 但都叫做食哂啦, 叫老公掃住風先, 我可以去換衫嘛! 都準時出到門口, 今日老公一齊揍笨元入去, 佢先再揍柏仲去嫲嫲到, 我就返工啦! 買埋早餐返到去都仲好早, 今日除咗做私事, 都要做商會D嘢啦, 仲有唔夠一個月就係, 但好似好多嘢都未做咁, 雖然年年都係咁上吓, 都做到慣哂, 但始終d人未覆嚟唔嚟係咩都做唔到囉! 午飯後都係睇吓電視啦, 下午做公事做到差不多5點就hea吓先啦! 放工閃人返去睇吓我兩位少爺, 笨元要做珠心算但做錯哂, 要係咁督住佢做, 所以都未得閒理柏仲, 等食完飯先睇吓佢, 由於4點先食過奶, 又怕夾唔啱班車的時間返屋企, 最終餵埋奶先返去, 但食得衰衰咁! 返到去沖好涼先, 柏仲冇咩嘈喎, 於是我就同笨元溫書搞掂D嘢瞓覺先啦, 跟住我好眼瞓咁喺梳化瞓咗, 11點幾老公話餵奶我先醒, 但柏仲食得衰不得止, 終於食哂時, 佢全部獲利回吐番哂出嚟, 佢嘔完又再瞓啦, 但我地就做餐死囉, 好在我經過教訓後已經醒, 唔會有機會比佢吐到喺梳化, 只係抺地簡單好多! 到我地睇完建元風雲後入房, 聞到佢連屎都疴埋, 咪換埋片先瞓囉, 佢有發出d周身唔自在咁GE聲, 但好快都瞓咗, 冇理佢啦!