31/10/14

31/10/14   FRI   WARM

今日柏仲都係6點多就起身, 真係唔知佢想點, 帶埋佢揍子元上校車啦, 之後都係餵奶執嘢入嫲嫲到, 勁好彩地落去有巴士, 馬上叫老公追車, 入去食埋早餐就返工啦, 今朝要開會, 所以朝早D時間都好快過, 淨係聽佢地講嘢都有排煩! 午飯時老細都未走, 好在佢心情唔太差都OK! 下午做吓正經嘢啦, 又冇人吹水咪繼續hea囉, 放工去買餸快手返去整咗肉先, 再去番接佢兩個啦, 因為萬聖節有間鬼屋玩, 咁佢地又係都要玩, 好在可以讓我地玩先, 但點知一入去敏瑩就喊, 子元又唔識拖住佢行, 好在有個工作人員陪佢地行埋啫, 時間關係要馬上快步行過去換衫游水, 撞到另一個游水的才發現原來係要交學費喎, 之前真係原全冇收過囉, 諗住接嗰時先問啦, 點知又等唔到喎, 好在之後都問到啫! 講番之前, 返上樓快d煮飯啦, 等佢地沖完涼就食啦, 因為掛住睇大結果, 廣告時間先去洗碗, 除咗中場抽時間K.O.咗柏仲外, 之後都好混亂咁, 到10點幾佢地走咗我先沖涼啦, 快手捉埋笨元去瞓就可以自由啦!

30/10/14

30/10/14   THU   WARM

柏仲6:10就醒咗, 真係攞我命, 比我瞓埋嗰半個鐘都好呀! 但我都頂到鬧鐘響先起身, 最慘係大嗰個唔願起身, 出得門口都晏啦, 佢又要咳喎, 睇嚟今晚都係要同佢睇醫生! 送咗上校車回家摺埋D衫就餵奶, 去到茶水站食埋早餐我就返工啦, 今日柏仲都幾扭, 可能太早起身, 不過佢伏喺枱面用手臂墊住咗個下巴時, 老積到呢! 今日返去冇人吹水啦, 就search吓新加坡D酒店, 原來佢地都唔興有早餐, 有的話又好貴, 都幾煩! 午餐後老細已返, 佢返咗嚟真係令所有人都有壓力, 大老闆娘個樣同上星期都唔同, 比個仔迫到咁真係陰公! 好在之後都冇咩嚟煩我啫, 咁我咪繼續找資料囉! 放工早半個鐘走, 同子元元去睇醫生, 葉醫生話一聽佢咳就知佢條氣唔順喎, 都係比佢聞一次醫院D氣, 然後去攞藥啦, 本來都好早搞掂, 但因為撘咗架2A返去, 原來勁遊花園搞到7點幾先返得到去, 同老公約喺米線鋪門口等, 今晚唔煮啦食米線, 等GE時候去咗759買嘢飲, 回家後男的沖好涼先, 我就煮烏冬比兩隻細GE食, 快吃完沖涼就同子元溫書睇功課做網上功課, 我淨係想快快快做好, 但都要搞到10點多先瞓得! 我都勁攰, 唔知幾時已經喺梳化瞓咗, 再醒番就入房瞓先啦!

<早早起身個衰樣>

 <有嘢玩靜一陣!>

 <早餐中!>

 <姑姐偷影洗白白!>

29/10/14

29/10/14   WED   WARM

今日都係如常咁起身揍返學啦, 不過真係好攰, 琴晚又夜瞓啦, 拖得笨元起身又食唔切早餐, 咬咗啖包又飲唔切奶咁, 叫佢快就完全唔快, 好在落到去校車才剛好到咋! 返上樓搞掂柏仲就出門口啦, 等咗陣都冇車都係出去撘42A, 食埋早餐返公啦! 朝早都係吹吓水咁, 但講某D topic唔多啱講, 搞到有D火藥味, 咁最後唔再講嗰個topic後咪冇事囉! 中午因為要去曬相, 所以食完飯後就落去行吓, 喺759冇買到嘢呀, 但就喺麥記買咗雪糕食! 下午都係做吓自己嘢啦, 之後就做埋商會D講辭! 放工後就返去接笨元, 條友都咳得密咗, 功課做到尾聲就比佢做埋先啦, 因為晏咗就行到出去長沙灣道等巴士, 多幾架嘛, 返到去笨元先沖涼, 我就整住餸先, 之後叫佢執好嘢比我對啦, 呢D混亂時間幾時先過, 佢而家仲係好冇規律! 老公話柏仲未瞓醒, 會晏D先返到, 不過我地開得飯嚟佢都返到, 啱啱好! 柏仲本來又係唔肯坐好食飯, 最終比包嘢佢玩住都叫做食哂啦, 大魚撈飯喎咁甜梗係食! 之後洗好碗就再幫笨元溫默書, 算佢OK啦, 做埋網上功課瞓得, 我話我好攰唔講故事, 叫佢講番比我聽佢都肯喎! 跟住就入番D相啦, 之前買嗰D相簿終於用哂, 近來真係曬少咗好多相!

28/10/14

28/10/14   TUE   WARM

如常一早起身揍返學啦, 落到去剛剛好車到, 今日架車早咗, 好多人都未到, 搞掂返上樓餵完奶可以慢慢摺吓衫咁, 因為今日嫲嫲出嚟, 等佢嚟咗就可以出門口啦, 買埋早餐返工, 食完都係hea吓做吓公事吹吓水咁, 午飯後睇吓電視打吓機咁, 跟住都冇咩可以做, 就找吓機票酒店D嘢, 發現新航冇哂8千的機票啦, 可惡, 但冇錢比住嘛, 唉…時不與我! 咁最後就book咗Lego land hotel先, 因為可以free cancel, 老公就打咗去國泰假期問, 要12月之後先出新plan, 咁唯有到時再睇, 話唔定有著數嘢呢! 放工後返去接笨元啦, 但等車等咗勁耐, 返到去都6:45, 快扒個飯就閃, 落去睇Watoto, 約咗嵐嵐一齊, 都睇到9點幾先返去, 好在嫲嫲幫我地洗埋碗先走, 咁我地就齊齊落去睇, 柏仲都睇咗個1個鐘到先閃, 最後用$100買咗隻長頸鹿, 咁都真係值得幫助GE! 返到屋企先大穫, K.O.咗柏仲, 要同子元溫吓書, 諗住叫佢做吓卷就算, 點知條友同琴日一樣錯埋同一樣嘢, 我就開始火起啦, 之後老公見我顛啦都入咗嚟幫拖, 做埋網上功課11點多先瞓, 真係佢唔攰我都攰! 希望明天唔好都係錯嗰D嘢啦! 我終於可以沖涼, 過哂眼瞓時間, 睇哂隋唐都唔眼瞓, 點幾先瞓囉, 明天就知死!

27/10/14

27/10/14   MON   WARM

鬧鐘柏仲7點準時起身, 子元都係要拖落床, 送咗佢上校車我地就返上去食奶, 叫daddy起身梳洗出門口, 今日早咗咁啱又等到架42, 舒舒服服入到去就食埋早餐就返工啦! 返到去都係hea, 上吓網吹吓水咁, 仲有做吓公事GE! 午飯後都係打吓機咁啦, 下午主力將Rachel比我隻GH的相碟, 找番有子元樣的相copy番落電腦啦, 有D生日相都真係cut咗冇獨照, 睇到又真係有D火火地! 都未過得哂就放工了, 返去揍子元時都執好哂嘢等我啦, 返到屋企沖好涼, 佢話溫好書喎, 咁老公又返咗嚟啦, 開始混亂時間, 煮好飯食啦, 但柏仲係都唔肯食, 只食咗一半就死喊唔食, 完全令我著哂火, 好在今日早搞掂, 唔係真係唔夠時間發火! D火勢仲漫延到去子元到, 洗碗時完全冇心機去理子元的功課, 話唔同佢對功課, 咁最終當然有同佢對啦! 警告咗幾次要對清楚, 今次終於冇錯冇漏! 但默書都係有字唔識, 好在星期五先默, 都仲有時間, 但到溫英文進評時, 叫佢做mock卷2頁啦錯到呢! 唯有慢慢教清楚佢錯咩啦, 做好呢份進評同小考應該都不大問題! 做埋網上功課10點左右終於瞓得! 我睇咗陣電視都頂唔住瞓咗, 瞓到做完隋唐先醒喎!

26/10/14

26/10/14  SUN   WARM

今朝7點幾起身, 又要趕住出門口去畫班啦, 然後我就返去買餸, 返屋企放低又準備出去接笨元再去珠心算啦, 星期日朝真係好充實! 放學就同老公及程生佢地會合一齊食晏, 然後就返屋企啦, 完全未溫過書呀, 開頭係到黑我面架, 溫到2點幾就放佢抖吓, 因為我都要睇Running man, 咁睇完咪又再溫過囉, 之後進度開始好少少啦, 溫到差不多6點叫做溫完, 叫佢執埋書包校服可以休息啦! 我嗰時先醒起要煲粥比柏仲食, 好在都煲得切, 煲完粥就煮飯, 今晚老公整咖哩飯, 我就餵柏仲食飯, 放佢地周圍玩! 食完飯洗好碗就沖涼啦, 然後都係食奶K.O. 柏仲, 比子元睇電視到9點半就瞓啦! 本來我都想睇埋十級重案先瞓, 但實在太夜了, 睇咗大半個鐘都要瞓, 但老公就睇哂!

<扮BB?>

 <其實佢都真係仲係BB!>

 <不過係大BB!>

 <扮死ing>

25/10/14

25/10/14   SAT   WARM

今朝柏仲又係7點就醒, 點解佢可以咁準時! 拖到7點半先起身, 慢慢整好D出門口都8點幾9點, 同埋佢地一齊出去, 不過佢地就去食早餐我就返公司先食啦! Hea 咗一朝連要print嘢都唔記得, 係咁吹水吹到放工, 今日柏仲唔上嚟, 因為諗住過宣美開放日睇吓, 加上笨元2點半返荔天打乒乓波, 咁喺美孚食完嘢, 行過去八吓玩吓攤位遊戲, 再行返過學校打波, 我地就去咗Aeon行吓, 買咗星期日晚D餸, 只係煮咖哩啫! 跟住就我返屋企先, 老公等到夠鐘就揍番子元, 撘巴士返到去餵咗奶就K.O.佢瞓, 但時間可能已比平時遲咗, 條友喺到扭, 咁啱嫲嫲過嚟, 好在喺房都仲可以K.O.到佢, 叫做瞓咗一個鐘, 老公佢地返嚟後收拾好就出去食晚餐, 因為想去打邊爐嘛, 同埋嫲嫲去咗長沙灣試新嘢, 抵食喎$158任食仲要有好多熟食嘢, 不過我唔知係咪啱啱先好番, 所以食到尾肚痛, 咁咪馬上衝上去阿媽到辦大事囉, 佢地埋咗單先上嚟找我, 除媽喺佢地上咗嚟之後不久就返, 有得玩柏仲都冇咩所, 奶奶又話想睇吓親家屋企係點, 最後8點幾就走啦, 落到去八緊D租盤時, 竟然又撞到程生喎, 咪吹咗陣先走囉, 仲上去接敏瑩添! 返到去快手沖涼就K.O. 咗柏仲, 叫子元溫默書佢又伏喺書枱瞓咗, 咪叫佢上床瞓, 明天再溫囉! 沖完涼hea吓咁又瞓覺啦!

24/10/14

24/10/14   FRI   WARM

今朝柏仲竟然唔知醒, 可以賣甩佢, 而子元就一早起咗身, 所以好早就出到門口! 返上樓柏仲就醒咗啦, 餵奶玩陣就出門口, 今日撘車勁順利喎, 8點半多D已入到去, 見到柏仲架新車, 真係好輕身, 之後揍放學都可以用! 食埋早餐返工啦, 都係冇咩特別嘢忙, hea吓吹吓水咁又一朝啦! 午飯後都係打吓機睇吓電視咁, 下午又係做吓公事做吓自己嘢啦, 冇食tea就放工, 有D後悔因為今晚好夜先有飯食! 一放工即閃去買餸, 仆返屋企後就調味咗D排骨又要仆出去接佢地去游水! 老公早咗揍柏仲, 喺體育館會合揍咗佢地去, 就返屋企忙啦, 又要煮飯又要餵柏仲, 叫老公餵飯又做到衰衰咁, 迫我去餵番! 好在程太今日可以去接佢地放游水, 咁可以專心煮埋個飯, 八點幾開得飯, 冇等程生就食住等啦, 今晚佢地都唔係好夜走, 佢地走咗子元先話佢好似未做哂功課, 咪捉佢做埋先囉, 但做做吓就瞓咗, 咪叫佢瞓醒先明天做囉, 咁我先安心去沖涼, 12點前我都瞓啦, 冇精神陪老公睇電視!

23/10/14

23/10/14   THU   WARM**

今朝柏仲早過鬧鐘醒, 但笨元就要我拖佢落床, 兩個調番轉嘛! 快手梳洗完出門口啦, 又係比柏仲著鞋行吓, 而家未識行就想落地, 遲D識行又要人抱架啦! 返上樓又係摺埋衫再食奶啦, 然後過嫲嫲到, 今日等車唔多順利, 所以入到去都晏, 嫲嫲仲要唔知醒喎, 咁就揍咗佢落去囉, 冇早餐食要自己買早餐先返去食, 朝早都係做吓自己嘢啦, 午飯後大老闆娘返咗嚟, 冇老細喺到佢都輕鬆D, 好搞笑! 不一會佢又走咗, 我就好努力咁出卷比子元下星期進評啦, 又完成埋11月個餐單, 都幾充實吓! 放工唔洗去阿媽到接笨元, 因為佢見笨元有兩本作業都喺美孚冇得做, 於是咪揍佢過去等佢做囉, 咁我放工慢慢行返去, 仲喺地鐵口買咗個新杯袋比佢, 可以打直放到水樽方便D! 返到去阿媽就走啦, 咁沖好涼就叫笨元預備好功課, 我預備吓D晚餐咁, 然後開電腦佢做網上功課, 我就對佢D實體的功課, 錯漏梗有架啦, 邊做邊改, 食飯前都叫做做好哂! 今晚食西餐, 某程度上都易煮D, 白汁意粉配牛扒, 有嗰個專煎嘢用的穫, 幾分鐘就煎好, 估唔到呢隻廿蚊塊的薄牛扒又OK喎! 餵埋柏仲食少少飯就洗碗抺地叫子元執埋D手尾同溫吓中默, 我就餵柏仲食埋奶再交比老公, 子元就講埋故事瞓覺, 今日快手好多, 可能行少咗一轉加上煮西餐! 咁睇吓電視hea吓咁, 睇埋隋唐就瞓啦!

<等車等到吽>

 <引佢笑吓先!>

 

22/10/14

22/10/14   WED   WARM

今朝比咗對鞋柏仲著, 等佢揍哥哥撘校巴時可以行吓, 我又唔洗抱得咁辛苦! 最得意係出lift後放佢落地行, 佢識得路返屋企, 完全冇行錯, 真係好叻仔! 返到去食奶hea吓等老公起身搞掂就出門口, 今日完全唔等42啦, 出去又好順利等到車, 好快入到去食埋早餐返工啦! 因為朝早要開會, 所以都忙忙地, 會後最好消息係下個月有自助餐食, 雖然係星期五最忙日子, 但我都會好好安排人手架啦! 午飯後再睇多次九轉迴香, 但都係唔明, 所以之後上網係咁找番相關資料後終於明, 舒服哂! 之後做吓LF的會議記錄咁好快又放工, 都要找時間做吓商會大選D嘢! 放工返去揍笨元, 今日都做哂功課等我, 算叻仔啦! 撘車返去時順手攞番個算盤, 返去沖好涼又係邊煮飯邊處理小笨D嘢啦, 今日老公晏返, 但我地8:30搞掂哂D嘢後佢原來仲喺青衣, 咁唔等佢食飯啦, 我地兩個食咗先, 由於已經搞掂哂笨元D嘢, 所以可以放心做埋D家務, 餵柏仲時就叫老公K.O. 笨元! 終於可以休息啦, 陪老公睇咗大半集隋唐先瞓!

21/10/14

21/10/14   TUE   WARM

今朝又係拖笨元落床咁滯, 落到去一陣就校車到, 抱柏仲抱到手軟, 明天比佢著對鞋自己行先! 返上樓摺埋衫先餵奶, 柏仲就係到叫哂救命, 冇得食先叫阿媽, 正衰仔! 落樓等車啦, 比多次機會架42, 但都係8點半先到, 明天我唔等啦, 浪費我時間! 入到去快手食個早餐就閃了, 返到公司都係做吓自己嘢啦, 冇咩特別又冇人吹水都幾悶, 午飯後都係睇吓電視啦, 下午又冇老細喺到, 完全free做自己嘢, 食埋個tea又放工啦, 返到媽到見笨元又係到扭計, 冇法啦琴晚太夜瞓, 走嗰時比咗包紫菜佢, 有得食就冇咩事, 好在好快有車返到去都係6:30, 諗住今日可以on schedule架, 蒸嘢時想同笨元睇哂D功課, 發現有未做但佢又睇唔出又睇唔明點解, 咁本作業又設計得衰GE, 但教唔掂我又開始火, 好在老公已返及沖好涼, 咁佢咪去教佢, 我就煮埋少少嘢開飯囉! 柏仲最慘冇人理, 喺學行車勁叫救命! 終於開飯啦, 柏仲又食得衰, 原來冇瞓晏覺唔怪得之發顛! Turbo手洗碗抺地後就同笨元做埋下半場, 英文下星期不是默書是小測, 都要喺公司做定卷同佢練, 數學又係, 真係做卷都做到我顛! 終於搞掂埋網上功課就瞓得, 10點前瞓到已好好啦! 我可以hea 吓睇電視咁, 睇咗九轉迴香大結局, 但都係諗唔明, 可惡! 陪老公睇咗一part隋唐頂唔住瞓咗!

20/10/14

20/10/14   MON   WARM

今日把聲叫做開番好多, 起碼都聽到自己講咩, 雖然仲係沙但都好過冇! 朝早柏仲準過鬧鐘7點就起身, 子元就要拖佢落床咁滯, 好在都趕得切校車, 返上樓餵埋奶就執好嘢出門口啦, 陪老公等咗陣巴士咁就等埋落去啦, 但都等到8點半先有42, 真係估佢唔到咩時間有車! 過到去食埋早餐就閃啦, 返到公司都係做吓公事做吓私事咁啦, 有番聲做嘢都方便D! 中午偷走出去睇多次醫生, 買埋lunch返嚟, 午飯後都係睇吓電視打吓機咁啦, 下午就plan下個月個menu, 真係plan到頭都大埋! 放工去接笨元, 其實好早去到巴士站, 但等咗勁耐車都冇, 搞到6:50先返到去, 快手沖涼煮飯都要8點先有得食, 老公7點多就返到, 佢睇住兩隻子元又掛住玩唔溫書啦! 食完飯洗完碗已經8點幾, 老公見我都炆炆地, 就主動話佢拖地, 我可以幫子元睇功課溫書, 仲要做埋奧數同網上功課, 做到尾佢又攰我又攰, 搞到大家都冇哂心機, 叫老公埋埋個尾, 快D上床瞓啦都就嚟11點! 我睇埋九轉都瞓, 勁攰!

19/10/14

19/10/14   SUN   WARM

今日都係hea過, 朝早7點就比才仲嘈醒, 到7點幾起身, 因為要揍笨元畫班嘛, 好在笨元都自己起身, 餵埋柏仲就出門口了, 剛好趕得切8:30班車, 去到敏瑩都未到, 買埋食住等, 揍咗佢地上去我就返美孚買餸, 今日好似唔多嘢買咁, 咪買埋尿片囉! 返到去仲有時間繼續做嘢, 但之後又開始趕趕地, 咪叫老公去接笨元順手今日佢去陪笨元上珠心算囉, 我咁ge聲嚇親人嘛! 加上佢喺屋企又冇咩建樹咩都唔會做, 襯小仲瞓咗我可以做好多嘢, 煲好粥洗好摺好衫抹埋地添啦, 柏仲醒咗就同佢玩陣再餵佢食飯, 之後再玩, 其實都冇咩玩, 由佢爬吓捉吓佢咁啫, 不過佢都好多搞笑嘢, 例如成日要爬上梳化攞個玩拍嚟咬! 2點多整支奶打暈佢我就可以舒舒服服咁睇Running man, 子元佢地3點幾4點返咗嚟, 不一會柏仲都醒埋, 等我睇哂Running man就同笨元溫埋書先, 老公所謂看住柏仲, 只係放佢喺BB床自己瞓鬼咗, 有冇咁鐘意瞓呀! 溫完書叫醒佢, 出去大家樂食晚餐, 我真係好肚餓啦因為午餐只係求奇食咗, 但火鍋又要等喎, 好在都唔係等好耐, 安頓好有得食啦, 開頭柏仲都算合作, 之後開始扭啦, 但都叫做尾聲, 老公就比咗塊檸檬佢食, 柏仲個樣呀好笑到呢, 馬上拍佢片呀! 食完回家沖涼, 柏仲馬上食奶瞓得, 子元就睇電視到10點先瞓! 我地睇到好夜呀, 1點左右先瞓!

<見我玩波佢又學!>

 <最鐘意咁瞓喺梳化!>

 <但都唔及呢個樣傻, 係咁咬球拍!>

 <又chok可愛了!>

 < 用口玩積木你見過未, 當杯飲水咁!>

 <試吓咩嚟先!>

 <被玩啦, 檸檬嚟架!>

18/10/14

18/10/14   SAT   WARM

食咗兩次藥感覺好似好D, 但把聲都仲係未開得太好! 唔洗早起但柏仲都仲係要一早嘈醒你, 我只係要求瞓到7點半啫, 最終差不多8點先起身, 梳洗完餵奶執嘢返工, 返去都係hea吓啦, 差不多時間老公揍兩隻仔嚟啦, 柏仲又比佢地玩一輪, 1點閃人返屋企整番熱之前個飯齊齊食, 然後2點幾3點就比支奶打暈佢, 我就可以抖吓, 雖然都要執吓屋, 一朝早就可以反轉間屋! 5點幾全部返哂嚟, 連嫲嫲都嚟埋, 因為佢同老公一齊去睇BB車, 想買架新GE嗰邊用! 買咗壽司外賣今晚食, 柏仲醒咗交比老公搞掂, 我要同笨元溫咗中文先, 然後又要同佢做卷等等, 其實佢都係錯唔小心, 呢樣真係唔知點教, 自問我都係咁上吓, 唯有叫佢翻check多幾次啦! 食完嘢放佢玩吓啦, 我都要抖吓! 老公出咗去踢波, 奶奶又返屋企啦, 交低柏仲比子元睇住我就去沖涼, 之後都係陪佢地玩吓啦, 9點餵咗柏仲就瞓, 9點半趕埋笨元入房瞓我都喺廳hea! 完全喺模糊狀態, 知道老公返嚟但都照瞓, 再唔知幾時走咗入房瞓啦!

<成日扶住嘢周屋走!>

 <比子元推緊...>

 <坐入去扮Lego!>

17/10/14

17/10/14   FRI   WARM+

今日仍然係失聲人, 朝早諗住同笨元請假架啦, 柏仲準時7點嘈醒我, 諗住hea 到7點半先起身啦, 但最終都比柏仲煩到起身, 笨元又跟住起身啦喎, 但已經7:20, 佢話冇事要返學, 咁睇佢又真係冇咩事, 咪比佢返囉, 但就要快啦, 叫老公起身幫一幫手, 我仲要餵埋柏仲先出門口, 好在個衰仔都合作, 7:40已出到門口, 飛的過到學校都係7:50, 佢頭也不回咁入咗學校, 我就行返去巴士站揍柏仲入嫲嫲到, 為咗開聲, 我去咗買咸竹蜂返去沖水飲, 希望work啦! 返到公司都係做吓嘢啦, 琴日出咗去一日, 今日都有嘢忙, 午飯後都係hea 吓啦, 老細唔喺香港最輕鬆! 下午就好努力做笨元的小測卷, 既然有個sample點都要做比佢練吓先! 4點左右投降了去咗睇中醫, 我而家真係咩都要試, 求奇一個醫師都OK啦, 反正都有我D資料, 原來我係兩年前失聲的, 佢一按電腦就睇番哂! 開咗3日藥我試, 我唔求食一劑就好, 總之呢兩日好番已經心滿意足, 因為冇咗把聲真係好唔方便! 放工去買餸仆返屋企放低餸再攞游水嘢又去揍兩個, 跟住又返屋企煮飯, 煮到咁上吓又揍埋柏仲去接番子元敏瑩, 老公喺屋企繼續煮嘢嘛, 返到上去佢地沖好涼就食飯, 由於程生8點幾先喺大陸走, 過到嚟都10點幾, 我地都冇理, 照做自己嘢, 柏仲照樣9點幾瞓覺! 我沖好涼就捉笨元對埋功課, 都玩咗咁多個鐘啦! 等佢地走哂就要笨元瞓覺, 我睇埋九轉回香再陪老公睇多陣隋唐都瞓先啦, 因為我知柏仲明早一定唔會放過我!

<比姑姐玩的柏仲!>

16/10/14

16/10/14   THU   WARM

今日繼續做啞人, 但仲要過去開會, 真係陰公! 朝早柏仲又係晨早醒咗, 想賣甩佢都唔得, 返上樓食奶又食到衰衰咁, 都唔理咁多啦要出門口, 又撘唔到42睇住佢喺對面線過, 入到去都係食埋早餐先返工啦, 返到公司一陣又要閃了, 同Nicho喺美孚會合再一齊過去, 不過我都講唔到嘢, 冇咩傾到! 去到商會做咗一陣嘢, 深哥又話夠鐘去食晏否則冇位, 去咗翠苑食貴嘢, 真係幾貴吓, 不過真係幾好食, 返去後繼續做嘢啦, 突然間李太上咗嚟喎, 真係估佢唔到, 收咗封細細GE利是仔, 好過冇啦, 開會都算順利, 開到3點幾終於走得, 若再早D我直情可以接埋笨元校車添, 但時間關係只可在巴士站等, 去到見到隻冇哂精神的笨元, 原來放學時嘔咗一次, 揍到佢返屋企, 喺樓下又嘔多次, 嘔完佢又好似冇咩事喎, 返去一路沖涼都冇事, 之後開始做功課又話攰啦, 做咗一大半啦又話要瞓, 比佢瞓到6點叫醒佢繼續做埋先, 叫做死掂咗, 但冇溫書, 都由得佢攤吓算! 我仲要繼續煮飯, 老公七點幾返到嚟, 柏仲食咗飯, 子元又唔想食, 得我兩條友食囉, 柏仲間中走埋嚟要食D! 洗好碗抺好地都要K.O.哂佢兩個, 子元自動波話要瞓, 但我都要幫佢執咗書包同校服先, 以防佢明天想返學都可馬上行! 柏仲都早瞓咗, 我地九點多就Free了, 但子元瞓瞓吓又嘔喎, 又做我地一餐死, 之後係咁睇吓旅行D資料, 12點多我就瞓先啦!

15/10/14

15/10/14   WED   WARM

今日起身終於出唔到聲啦, 只能發出氣聲, 又係咁, 真係好陰公! 照樣都要送笨元上校車架啦, 跟住餵埋奶就出門口入嫲嫲到, 攞咗D羅漢果返去飲, 但都係冇咩用! 返到去都係咁做嘢啦, 係唔洗聽電話囉, 照樣做到嘢冇問題GE! 午飯後老細返咗嚟, 佢又真係照打電話比我照要我喺個電話用氣聲答佢嘢架喎! 佢成個下午都係到, 真攞命! 不過睇在佢今個月都唔喺香港份上就算啦! 終於捱到放工啦, 返去接笨元, 又係要比婆婆鬧啦, 十足十我鬧子元嗰時個樣, 證明我都係喺呢到學番嚟啦! 返到去一陣老公都揍咗柏仲返嚟, 本來佢係想我喺美孚接咗柏仲佢就同同事出去食飯, 但我攞住咁多嘢, 冇理由專登早落車嚟接架, 你又唔係趕到咁, 梗係你揍入嚟啦! 之後開始作戰啦, 我頭又痛個人又攰, 但必需做番哂平時做GE嘢仲要一對二, 真係顛咗, 終於沖好涼煮好飯食啦, 柏仲又食得衰, 我真係忍唔住打咗佢, 總之個人就顛咗咁啦! 幾經辛苦先食完餐飯食好碗, 抺好個地就要抱埋柏仲嚟幫笨元對功課, 佢依然係唔記得寫名寫日期嗰D囉! 終於執齊嘢啦就叫佢執書包執校服, 我就餵柏仲食埋奶放入房瞓, 然後同佢做埋網上功課, 搞到10點前終於K.O.埋佢上床瞓! 我可以hea啦, 攤喺梳化死咗咁, 老公11點前都返咗嚟啦, 不過我應該瞓咗, 11點幾都入番房瞓啦!

14/10/14

14/10/14   TUE   WARM

今日奶奶出嚟揍柏仲, 因為佢晚去飲, 唔等老公嚟揍咁晏! 咁我送咗子元校車後返上去就餵柏仲啦, 個衰豬飲咗1安唔再飲喎, 梗係唔得啦, 座住先, 同佢洗吓鼻之後通番啦再飲, 咁都係飲淨1安可以接受啦! 等嫲嫲嚟到我就去睇醫生啦, 都係例牌嗰D藥, 睇完就返工, 都唔敢請假, 咁多嘢做! 不過食咗藥其實個人都幾飄吓, 但都要照做嘢架, 午飯後好D囉, 老細唔返可以輕鬆吓, 下午都好平靜, 但我把聲就愈來愈差, 放工時已經失咗一半聲, 去揍咗笨元就回家啦, 婆婆話子元今日都唔多聽話呀, 返到去其實都係, 叫佢做嘢個心都唔知飛咗去邊, 可能因為老公都返咗嚟, 柏仲又係到! 今日其實係結婚8周年紀念, 但我又病了, 重點係大家都唔多記得, 所以只係老公買咗D正嘢返嚟食咋, 只要齊齊整整, 就已經是最好了! 食完嘢點埋老公洗碗, 我又要睇住柏仲又要幫笨元睇功課溫書等, 待老公洗好碗就交番柏仲比佢, 子元麻麻地合作, 見我愈來愈出唔到聲就放肆, 最終做好哂所有嘢已經10點多才瞓! 我地就睇埋九轉迴香先瞓!

13/10/14

13/10/14   MON   WARM

天都未光5點多就見兩個人影棟咗喺你床邊, 你都咪話唔驚, 大嗰個只係叫你加水易打發好多, 細嗰個完全唔理你有幾攰, 係都要嘈, 噯極都唔瞓, 真係想一拳打暈佢, 叫老公K.O.咗佢…但唔夠一陣我鬧鐘又響, 好殘忍呀! 拖住疲勞的身軀開展一天的工作, 叫醒笨元送佢撘校車, 返上樓柏仲醒咗, 搞掂埋佢摺埋衫就出門口了, 入得去都9點, 照食埋餐先返工! 上午都唔算忙, 都係做吓自己嘢, 下午老細返咗嚟之後根本未停過, 我真係好耐未試過全個下午都未埋過電腦, 出出入入忙到都唔知咩時間, 放得工即閃了, 返去揍笨元即回家快手煮飯啦, 今日煮哂兩個肉添, 明天都唔知點算! 飯後都差不多9點先同到子元溫習做網上功課, 仲要餵埋柏仲飲奶! 10點幾先自由呀, 今晚個喉嚨痛到死死吓, 睇怕明天都係要睇醫生啦!

12/10/14

12/10/14   SUN  WARM*

今朝比柏仲玩死, 4點幾開始係到嘈, 佢又唔係喊, 但就係唔瞓囉, 好耐都K.O.唔番佢, 老公噯佢瞓得番啦, 比佢搞到醒哂瞓唔番! 我就到6點幾終於覺得攰, 瞓番, 唔知老公喺廳有冇再瞓啦, 但到我再醒時已8:15, 出面兩條友完全冇諗過叫我起身架喎, 子元學畫畫嘛, 光速搞掂15分鐘就出門口, 飛落去撘巴士, 好在趕得切, 去到麥記程生已幫我地買埋早餐, 揍咗佢地去畫班就返美孚買餸, 有上次經驗, 今次識控制時間D, 一來又食咗早餐點都好D! 買好嘢返去放好就過番去揍子元放學再去上珠心算, 其實有時覺得要同埋佢上都幾慘, 不過為咗佢要學好嘢都冇法啦! 放學馬上返去啦, 因為老公要去踢波, 我要返去接更呢! 先安頓好柏仲食飯仔, 然後先再煮午餐我同子元食, 跟住玩陣啦3點多又K.O.咗柏仲, 我地就可以睇Running Man啦, 又要佢做埋少少冇講我知GE功課, 真係好在有個group咋, 唔係都唔知仲有幾多嘢甩漏! 柏仲5點幾醒咗, 老公都返咗嚟啦, 仲買咗D嘢食, 柏仲又要食埋一份喎, 6點幾食埋奶啦, 就叫Pizza Hut& KFC外賣啦, 今日小圈子聚會嘛, 之後出咗去自取Pizza有折嘛, 約埋明記叫佢幫手攞囉! 返到去一陣開始人齊, 兒童組要食咗飯仔先, 跟住先到大人食, 大家都係吹吓水啦, 又玩吓你個囝你個囡咁, 時間都過得好快, 9點多同柏仲沖涼後食埋支奶佢就瞓咗啦, 我地繼續喺出面吹水, 不過未夠10點佢地都散哂, 於是叫子元快D刷牙瞓覺, 不過佢又要睇多陣電視, 我沖埋涼後老公都話攰瞓先, 但我都11點幾就瞓啦!

<坐住架學行車橫衝直撞!>

 <玩到鞋都甩埋!>

 <與細柏仲4個月的朗B!>

11/10/14

11/10/14   SAT   WARM

今日都係hea過啦, 朝早都係7點就比柏仲嘈醒, 真係好慘! 但佢之後又瞓番喎, 過份! 咁我如常返工啦, 買早餐返去食之後都係做吓自己嘢, 12點幾老公揍柏仲嚟交收, 佢例牌比人玩一輪啦, 1點閃人買咗個飯返去食, 因為我唔會有時間煮, 一返去整熱埋柏仲D飯, 我一邊食一邊餵佢, 又work喎好快食哂! 咁之後都係玩吓抱吓咁, 我又打掃吓囉, 佢喺學行車跟住我出出入入咁, 3點多食咗藥再食埋奶就瞓咗, 我可以休息吓啦, 5點多佢就醒啦, 子元佢地都返咗嚟, hea 到6點出去食晚餐, 老公係都想試新開嗰間米線, BB辣都勁辣呀我覺得! 食完去759掃埋貨就回家啦, 沖好涼就同笨元溫書, 做埋網上功課先比佢瞓! 老公今日好早就話攰, 仲早過我瞓咗!

<又走去偷嘢玩!>

 <兩隻牙仔好得意!>

 <chok到呢!>

10/10/14

10/10/14   FRI   WARM

今日請咗日假, 因為嫲嫲仲未好得番哂, 又唔想阿媽再頂多日, 因為單拖揍佢都幾係嘢, 不過我今日揍都唔少嘢, 見佢都咳咗一排, 咪同佢去睇醫生囉, 邊行邊食咗個魚柳包餐, 上咗小巴佢都算合作, 去到諗住一早都好快同人少, 點知葉醫生上咗病房, 又要等咗一輪先有得睇, 好在係第一個啫! 睇完攞埋藥返去, 條友仔一係就早D瞓啦, 落車先嚟瞓, 咁我落地鐵幫笨元買過張八通再行返屋企, 諗住佢可以繼續瞓啦, 點知一入屋就醒, 想執吓嘢都唔得, 12點左右比佢食咗支奶, 好似嫌唔夠咁喺到喊, 噯咗好耐先瞓到, 一瞓就瞓咗3個幾鐘, 但我都冇咩做過, 只係煮咗個午餐食咋, 完全提唔起勁去郁! 老公返過嚟一陣, 放低嘢又走啦, 我寫吓日記上吓網咁, 想瞓又未瞓得著! 3點幾柏仲醒咗先餵餐飯佢食, 之後都係玩吓hea吓咁啦, 但我就好似愈來愈病咁, 喺梳化hea咗喺到仲瞓埋, 好在柏仲都合作, 自己玩吓咁啦, 之後阿媽話上嚟睇吓柏仲, 咁都好, 等我安心執好嘢出門口, 去揍佢兩隻嘢游水! 好在老公放咗工會合, 可以睇住柏仲, 否則要揍埋佢入去同兩個換衫真係人都顛! 搞掂就返屋企, 餵柏仲食咗飯仔先再去揍佢地, 程太趕得切過嚟同敏瑩沖埋涼先去食嘢, 本來想試嗰間米線竟然冇貨賣喎, 可惡! 變咗要去食板板囉, 時間關係老公帶柏仲早走, 但都趕唔切返去沖涼食奶就瞓咗, 叫醒佢最多沖咗個涼, 就係都唔肯飲奶, 搞到我都撞哂火, 我個人已經攰啦, 試咗好多次都唔食就鬧鬼佢囉, 於是係咁喊! 要老公抱番佢先唔喊, 真係激死我! 之後到子元做咗炮灰, 咩都鬧一餐, 最後我頂唔住攞埋D回收嘢走咗落樓冷靜吓, 返上嚟沖咗涼好D啦, 大家都好似冇事發生過咁啦! 不過我就真係超攰, 絕對係作感冒呀, 食咗藥瞓到死咗咁!

<睇完醫生等攞藥!>

9/10/14

9/10/14   THU   WARM
今朝柏仲準時起身, 揍埋佢去送笨元校車,  餵埋奶就同老公一齊揍柏仲去婆婆到, 因為嫲嫲仲未好番哂, 今日阿媽又話可以再揍, 咁就過去啦, 之後同老公食埋早餐各自返工啦, 返到去又要幫老細取消會議等等, 最慘係佢11點幾就返咗嚟, 把口冇停過咁, lunch又係到食, 簡直係折磨! 下午佢仲要冇活動, 大老闆娘又返埋嚟, 今次真係困獸之鬥, 好辛苦咁捱咗個下午終於放工, 返去揍番兩隻豬仔, 仲要一揍二, 笨元都算合作, 柏仲就辦咗大事, 所以返去都要即刻沖涼, 老公一會就返, 都好GE可以幫手, 我就可以煮好餐飯, 今晚飯三文魚意粉, 仲買咗平GE比目魚加餸, 煎咗好好味, 洗碗抺地後就捉笨元溫書, 條友仔講大話話溫咗, 但入得房1分鐘都冇, 點會叫溫咗, 咪比我丙囉, 最後都完成哂, 10點前已做好埋網上功課, 我都可以休息了, 但都好眼瞓呀, 12點多就瞓了, 老公又要睇埋隋唐呢!

8/10/14

8/10/14   WED   WARM

今朝6點多柏仲發夢喊醒咗, 真係比我瞓多半個鐘都唔得GE! 叫老公哄番佢後我都瞓番到鬧鐘響先起身, 諗住都賣得甩柏仲啦, 點知佢準時7點又醒! 揍咗子元校車上樓, 嫲嫲打嚟話佢肚疴, 今日揍唔到柏仲, 咁就大穫啦, 我同老公今日都有嘢做唔請得假, 唯有向阿媽求救, 佢推咗約會都揍柏仲, 可能都一排冇見柏仲啦, 不過都好感恩, 唔係真係要揍埋佢返工都似! 不過過到去阿媽落咗樓仲未返又唔帶電話, 搞到我地要寫紙仔叫佢找我地, 最終都順利交收, 我地食住早餐等佢! 搞掂就各自返工啦, 朝早真係忙到顛, 又開會又搞商會會計D嘢, 搞得嚟都12點幾, 飯後可以休息吓啦, 下午都係hea過, 放工去接番兩隻豬仔啦! 同老公一齊去揍, 撘巴士返到去就沖好涼啦, 我就煮埋飯先沖涼, 食完抺好地都8點幾, 搞掂埋笨元溫書同網上功課, 期間又餵埋柏仲食奶啦, 佢今日喺婆婆到可能冇咩瞓, 7點幾瞓咗大半個鐘但9點多又已經眼瞓! 終於10點前K.O.哂兩個可以休息, 但我睇緊九轉迴香已頂唔住瞓咗啦, 不過入番房瞓又瞓唔著, 同老公吹咗一輪水諗住瞓時柏仲又發夢醒喎!