7/10/14

7/10/14   TUE   WARM

今日賣甩咗柏仲落樓送子元校車, 不過返到上去見佢已醒咗, 食完奶就出門口啦, 同埋柏仲一齊去食早餐, 因為嫲嫲今日覆診, 老公請咗假揍柏仲, 食完早餐佢就返屋企, 我就返工啦, 朝早都係hea吓啦, 老細冇返最開心! 午飯後都係睇吓電視睇吓雜誌咁啦, 下午老細都係唔返, 於是做埋份小一家長日list, 然後都係吹吓水咁啦, 放工即閃返去揍笨元, 阿媽話子元喊呀, 因為又攰又要做功課, 咁叫佢執好嘢走人, 帶佢去買串燒賣食番又冇事囉! 返到去老公叫柏仲表演番點爬上子元張床, 我都係今朝教咗佢一次啫, 冇諗過佢咁快掌握到隻腳點上, 試咗一次老公拍咗佢片, 佢而家一有機會就爬上去, 真係睇少眼都唔掂! 沖好涼就煮飯, 但又要顧住子元功課, 已經叫自己慢慢嚟架啦, 8點開到飯, 又要餵柏仲又要自己食, 有時真係唔知自己食咗D咩! 洗碗時叫子元吸埋塵, 咁抺好地就可以睇佢功課, 都未夠9點, 已經好好, 叫佢改好做番好又溫默書啦, 跟住柏仲要食奶瞓啦, 佢又唔肯比daddy餵要我餵喎, 咁餵好就放佢入房, 好在已攰即瞓! 又出番嚟要跟埋笨元D網上功課, 睇埋佢有冇執錯書同校服, 終於10點多瞓得, 我都自由啦! 打吓機睇吓電視咁又12點幾, 本來都攰架, 但執吓嘢咁又醒番, 陪老公睇埋隋唐先瞓, 住入戲肉啦嘛!

<現場直擊柏仲爬樓梯!>

 <得得意意咁樣!>

 <攰到瞓得咁衰!>

 <又偷嘢玩!>

<自己同自己玩!>