2/10/14

2/10/14   THU   HOT

今日約咗康傑的同學仔去屯門玩充氣嘉年華加黃金海岸玩沙, 所以一朝早我就係到執嘢啦, 又要捉子元執好哂明天返學D嘢, 仲有再默吓書! 約咗程生10點多喺樓下等, 載我地入青衣約咗VIC飲茶, 11點前入到去開餐啦, 勁餓囉冇食早餐嘛! 柏仲食食吓瞓咗了, 直至出發前都叫做瞓左一個鐘! 分配好各人坐車後, 入到黃金海岸就搵埋希霖, 排隊的排隊, 買飛的買飛, 補給的去補給, 只玩咗兩個遊戲, 但都搞咗2個幾鐘, 仲要分頭排隊嚟玩架啦, 2點幾找地方餵咗柏仲先, 去咗麥記有冷氣嘛, 餵完佢地都過哂嚟會合, 大家都抖一抖補充吓能量先, 飲飽食醉就諗住出發去沙灘, 就喺出咗門口嗰幾級樓梯到, 婷婷唔知喺咩情況吓仆咗落樓梯, 大家聽到喊聲時已經見佢個頭喺最低嗰級, 隻腳喺最高嗰級咁掛咗喺到, 一抱起就知大件事啦, 額頭流血, 我馬上去買消毒紙巾同膠布, 又見VIC爸跑來買奶咀, 消好毒後程生就車婷婷去醫院, 老公跟埋去, 一來多個人等佢地冇咁荒, 二來都怕佢兩公婆會嘈, 咁餘下4個大人就帶住6個細路去沙灘啦, BB車變咗貨車, 我就揹住柏仲, 行緊去時佢已經瞓咗, 喺沙灘邊位安頓好就放D細路去玩, 我就主力看住D嘢, 都玩咗個幾鐘架, 醫院嗰邊似乎有排等, 咁向好嗰方面諗即係唔太嚴重! 玩到4點幾就輪住去沖身啦, 分咗兩批走, 因為得番1架車, 麻煩VIC爸爸車我同3個細路返屋企, 佢地其他撘的士! 返到去先同兩個大GE沖咗涼先, 唔理咁多啦一齊沖, 最緊要快! 跟住同柏仲沖埋我再沖, 馬上餵奶再餵飯, 大嗰兩個任得佢地喺房玩, 7點幾煮咗烏冬比佢食, 因為婷婷仲未睇到醫生仲等緊, 等到8點幾先睇到, 我已經餵好哂D細, 咁佢地最後10點先返到嚟, 婷婷要縫2針呀陰公, 等佢地返到嚟終於有得食, 叫咗元氣外賣自取嘛! 食完佢地都快閃了, 子元瞓覺, 老公沖涼, 我抖吓啦! 11點幾頂唔住我瞓先啦, 好攰好攰的一天!

<幼稚園同學仔!>

 <同希霖一齊玩!>

 <開始時仲好好!>

 <一班倉鼠!>

 <顛了!>

 <又玩另一個!>

 <玩沙中!>

 <玩到濕哂!>

 <玩到好dirty!>

 <柏仲瞓足全程!>