5/10/14

5/10/14   SUN   HOT

今日好忙呀, 起碼我覺得自己冇咩停過, 但陸生就成日攞個手機打, 真係睇到我眼火爆! 柏仲4點幾醒過兩次, 搞到我又瞓得唔好, 但8點一定要起身啦, 因為子元要去畫班, 叫醒子元餵埋柏仲, 但個衰仔唔食喎, 叫老公執埋手尾, 咁我就揍笨元出去啦, 時間關係揍咗佢我就返美孚買餸, 行返屋企因為唔想sai車錢, 不過真係幾攰吓! 返到去都已經10:15, 又要出返去接笨元, 但我早餐都未食呢, 諗住等6號時喺OK買D嘢食, 點知條友做嘢勁慢, 最終撘唔到班車啦, 咪又要再等下一班囉! 去到畫室程生都未到, 睇住佢兩個先, 齊人就走啦, 又要行去上珠心算, 呢個阿sir都幾進取型, 好在笨元接受到人地讚佢呢種做法, 上咗都大半個鐘架, 都學得好快, 可能有少少底啦! 落堂後老公過咗嚟, 因為又要交收嘛, 同程生佢地一齊食埋晏, 就交換我帶柏仲回家, 老公帶子元去踢波! 回家後我開始處理買番嚟嗰D餸, 要整GE就整好先, 柏仲喺學行車上不斷跟住我出出入入, 整起哂D嘢就陪吓佢, 食咗支奶又食咗碗飯仔, 就係唔肯瞓, 咪陪我摺吓衫囉, 老公佢地3點幾返到嚟, 柏仲本來靜靜地自己玩架, 但就馬上走去找daddy, 睇哂Running man我就同子元溫習啦, 老公哄咗柏仲瞓, 然後佢自己瞓埋, 我地溫習咗1個鐘左右啦, 柏仲醒埋就執嘢出門口, 又約咗程生佢地晚飯嘛, 試新嘢! 叫咗5個餸都唔洗$300, 抵啦! 不過要捉住兩個細嚟食飯真係幾攞命! 食完都回家啦, 沖好涼可以睇電視, 子元睇到10點先瞓, 柏仲9點幾食完奶都扭咗一輪, 叫老公去哄佢佢又掛住睇電視, 搞到我火起啦, 因為今日已谷咗一日好多怨氣, 真係嬲囉, 我有做唔完ge家務, 點解唔可以幫輕吓, 叫你洗個奶樽都要三催四請, 有時等得你嚟我都做好十世, 就係咁佢就愈來愈唔做, 好似平日咁, 煮飯洗碗抺地睇功課直落未停過, 但眼見佢真係返嚟沖好個涼就hea, 真係好慶架! 叫佢幫手就hea做, 擺明係話「我係做到咁架啦, 睇唔過眼唔好叫我做囉」, 咁即係冇計傾啫! 同佢講佢就話 “得啦得啦”, 仲要配以一個極嫌棄GE表情, 我真係爆啦! 但又唔可以發顛, 嗰道火真係唔知點發好! 笨元入咗房瞓我都入去佢房摺埋D衫同子元呻, 佢都好叻仔架啦, 肯聽又肯調停, 話我唔喺屋企時daddy都會做吓嘢, 聽完都幾好笑! 之後出番廳我都冇啋老公, 點都要佢氹番我先得! 12點多真係要瞓啦, 日日瞓得6個鐘真係唔掂!

<食冰>

 <正!>

 <補番10個月的蛋糕!>