31/3/15

31/3/15   TUE   WARM

今日都係要揍埋仲仲落樓啦, 佢又一早起咗身, 仲識問食緊早餐GE哥哥攞蛋糕食, 真係叻仔! 又識見到校車EE就叫上車, 又識byebye, 真係氹到人呢! 返上樓咪食奶囉, 之後開始搗亂, 佢真係咩都搞咩都爬, 睇住佢好辛苦! 搞掂就出門口去食早餐, 然後我就返工啦, 朝早都係做吓自己嘢, 午飯後都OK, 但老細返咗嚟之後就慘啦, 完全冇諗住走咁, 之後仲要過嚟講到放工都唔走, 我都身先士卒照走先啦, 咁佢就走啦! 返去接咗笨元再去YMCA嗰到報名交錢4月尾要託功輔班! 返得屋企都7點, 快手煮飯, 佢地3個就沖好涼, 食完飯叫笨元執好功課, 等我做好家務就可以安排佢明天要帶咩去嫲嫲到做, 要襯呢幾日做好D功課, 唔係去旅行點算! 執好哂就比佢睇吓電視, 反正放假唔洗早起身! 我都10點幾先去沖涼, 沖完醒哂, 可以睇埋繼承者先瞓!

30/3/15

30/3/15   MON   WARM

今日柏仲又係早早就起身啦, 明明起身時佢仲瞓緊, 出咗廳唔夠一陣就聽到佢喊, 可惡! 揍咗子元就同柏仲返上去食奶啦, 條友仔都仲係有鼻水同咳, 所以食完早餐老公就帶佢去睇醫生囉, 我就返工囉, 今日老細冇返, 但都有嘢做吓咁啦, 時間都過得好快! 午飯後睇吓電視咁囉, 下午都係做吓公事又做吓私事, 放工去接笨元後就去咗買拖鞋比佢, 成日話著唔掂人字拖, 真係好麻煩! 回家後嫲嫲今日過咗嚟煮飯, 咁我就去沖涼囉, 不過飯後我都要洗碗抺地, 如常咁搞掂就睇功課K.O.兩隻仔囉! 10點多可以自由都算係咁架啦! 因為柏仲又嘔咗少少奶, 子元又要食藥聞氣溫英默等! 11點未夠我就已經眼瞓, 但老公又未想瞓住, 咁我就喺梳化瞓住陪佢囉, 瞓咗個幾鐘先入番房瞓呢!

29/3/15

29/3/15   SUN   WARM

今日都有點忙碌, 朝早8點幾起身, 笨元就係咁睇電視, 但佢做哂功課我又未對, 都冇咩叫佢做住! 梳洗好去食早餐, 然後老公就帶笨元去睇醫生, 但因為趕唔切去珠心算, 但又聯絡唔到阿sir, 總之就亂哂龍啦, 搞到阿sir又等真係唔好意思! 我就同柏仲去咗shopping, 惠康買餸買日用品等, 又去萬寧買吓洗頭水同濕紙巾, 好多優惠咁好抵囉! 回家後柏仲都係唔瞓, 但我又要整吓嘢食, 煮飯仔比佢等, 好在老公12點幾都返, 叫做睇得吓佢我可以放心煮! 食埋嘢就叫老公K.O.佢, 笨元食咗藥都瞓咗! 我就可以靜靜睇功課執吓嘢, 2點多叫醒笨元, 改番功課錯處, 老公就帶佢過去敏瑩屋企會所嗰邊玩復活節活動, 我就等柏仲醒咗再過去, 真係好寧靜, 我都要hea吓! 柏仲醒咗食咗奶, 但咳兩吓又嘔, 好在都易處理, 5點多過到去, 我又好無聊咁行過去囉, 因為又冇小巴, 地鐵又係要行, 不過直接行過去! 但過到去佢地已玩完上咗屋企繼續, 咁我又上去囉! 夠鐘就出發去食日式放題, 不過柏仲又好曵咁, 真係食得好辛苦! 老公7點多就走, 因為休嗰邊做兄弟的要去開會, 所以食完就我揍兩個返去, 好忙亂咁先同兩個沖哂涼後, 叫子元睇住柏仲, 我就快沖個涼, 跟住就陪吓佢地, 柏仲玩嘢地疴屎唔出, 想同佢換片時睇住舊屎喺個門口, 最終用咗個最核突的方面處理咗佢, 再放佢入廁所疴吓, 子元就好合作, 咁一做廣告入房做埋D嘢, 所以9點半後差不多已可以瞓, 柏仲都好乖, 係食藥麻煩D, 用咗飲管呃佢飲到囉, 我話瞓覺同哥哥講goodnight佢就識行入房, 放佢落床就瞓啦! 哄埋笨元我都可以休息了, 老公11點幾返到, 我都已經瞓瞓地, 所以等佢沖好涼一陣都話瞓!

28/3/15

28/3/15   SAT   WARM*

今日都幾節目豐富! 朝早返工啦, 留低兩隻仔比老公, 子元都算醒目, 起身識做功課, 但又話冇抄手冊, 叫醒我比手機佢睇住抄番! 又係返工等放工啦, 12點幾老公揍咗柏仲上嚟玩, 然後就同子元去踢波! 夠鐘放工我都走啦, 約咗Mavix同朗然上嚟我嗰到, 真係好多年冇見朗然囉, 咪就係佢結婚嗰時囉! 幾快大家齊齊玩仔啦! 買咗KFC返去食, 柏仲朝早未瞓, 所以我買緊嘢食時佢就瞓咗! 返到去佢都照瞓, 咁我地食住嘢先啦, 瞓到咁上吓喊醒啦, 諗住整番熱D粥佢食, 放佢同朗然個仔玩啦, 點知可能啱啱瞓醒, 竟然喊喎, 係要痴住我, 佢怕生個樣都好可愛! 食完粥再一齊玩啦, 玩咗陣mavix要走啦, 咁我就同朗然帶埋兩隻細落樓下遊樂場玩, 真係攰過咩, 玩咗大半個鐘我已經好攰, 加上收拾吓又差不多出門口去同老公佢地會合, 今晚契爺婚禮跳舞嗰到又要彩排, 先去譚仔食米線, 然後再行過去, 柏仲又係好唔聽話啦, 子元就係咁咳, 都係條氣唔順啦! 排舞都排到差不多9點, 快手回家K.O.兩隻仔, 笨元食咗藥聞咗氣等叫做好D, 但明天都係要去睇醫生架啦!

27/3/15

27/3/15   FRI   COOL

今日又要帶埋仲仲去送校車, 呢排早天光佢都早咗醒, 广樓都係餵奶摺衫啦, 都唔明點解咁多衫要摺! 由於要執今晚游水D嘢晏咗出去, 所以在大快活食早餐之餘, 我只可外賣返公司食! 朝早都係做吓自己嘢, 都幾輕鬆! 午飯後老細佢地返咗嚟, 竟然又要開會, 有冇咁多會開呀! 咁又冇咗一個下午啦, 我都唔理佢幾點走啦, 星期五時間緊張呀, 返去執好嘢, 老公交帶好點煮D咩佢就出門口, 約咗同舊同事食晚飯喎! 跟住我都攞齊嘢出去接佢地合唱團, 再去換衫游水! 返到去奶奶煮起個苦瓜就閃了, 怕陣間4條細路喺到嘈喎, 我就慢慢煮晚餐啦! 差不多8點程生揍咗婷婷上嚟, 點知程太又話揍唔切佢地放游水, 程生又要仆落去, 最終我由得柏仲同婷豬喺廳玩, 好在冇咩打架事件發生! 終於返哂來啦, 沖好涼食嘢, 今晚食烏冬餐, 真係幾好食, 不過量多超飽! 食完子元敏瑩喺房玩, 柏仲婷婷喺廳玩, 我就洗好碗抺好地, 佢地先走, K.O.哂兩隻仔我就可以沖涼休息了! 老公11點多返來買埋糖水, 食埋睇埋電視先瞓呢!