25/3/15

25/3/15   WED   COOL

都係如常咁揍子元返學啦, 叫佢返去找清楚佢個杯袋去咗邊囉! 跟住都係出去食早餐然後返工啦, 柏仲已經好叻仔, 去到地鐵口就會等住同我鍚鍚BYEBYE, 可愛得太緊要! 朝早返到去, 10點幾就要開會, 真係魂魄都未返! 中午食完飯都係睇吓電視啦, 冇咩嘢做! 下午都算hea過, 老細有返嚟但都早走咗出去開會! 放工就閃了, 去惠康入貨咁抬到自己死死吓, 老公揍咗子元去做職業治療, 要帶埋柏仲去呢, 我返到屋企就煮飯先, 不過見到間屋真係亂到顛, 佢一日喺屋企究竟忙D咩呢, 定係佢根本都係冇系統, 冇辦法維持間屋整齊! 邊煮飯執屋睇子元D卷, 原來主力錯哂喺D閱讀理解到, 咁真係冇得講, 唯有以後做番多D閱讀階梯! 8點幾先返得到嚟, 終於開得飯, 柏仲又傻喊, 都唔知佢喊咩, 最終比湯佢飲又收聲! 終於完成哂所有嘢可以餵柏仲都9點幾, 跟住又要跟進子元D功課, 原來咁遲先做功課真係唔掂, 加上又要做作文, 佢做到英文生字時完全冇電, 好辛苦先捉掂佢做好瞓覺! 我都10點幾11點先沖好涼, 睇完繼承者都眼瞓架啦!