31/8/15

31/8/15   MON   WARM

暑假的最後一天, daddy剛可放假一天, 所以留咗柏仲比嫲嫲, 佢下午同咗子元出街! 我就如常咁返工啦, 難得最後一日可以瞓晏D, 柏仲又一早爬咗上嚟, 7點幾起咗身就梳洗返工啦! 返到去都係做吓嘢, 朝早都係寫吓日記做吓公事! 午飯去埋銀行, 買埋午餐返嚟食得都2點, 下午老細返咗嚟, 又要寄嘢返澳洲, 突然間又好多嘢忙咁! 放工去曼克頓山食晚飯, 買埋尿片就返屋企啦, 沖好涼都8點幾, 打暈咗柏仲我就沖涼, 叫子元執好返學D嘢, 其實我一早幫佢執咗架啦, 但都等佢自己諗吓有咩要帶, 二年級啦仲係一舊飯咁! 因為去睇完高達又買咗一盒返嚟砌, 所以好心急要砌, 比佢砌到9點幾就要瞓啦, 我就做家務摺衫咁, 邊摺邊睇埋美人心計個大結局呢! 其實今晚應該要早D瞓, 但都拖到12點, 明明瞓咗又比柏仲d喊聲嘈醒!

 

 

 

 

30/8/15

30/8/15   SUN   HOT

今日都有點忙碌咁啦, 朝早起身又要出門口去畫班啦, 敏瑩去迪士尼唔畫班, 咁子元買個包就得啦, 揍咗佢去我地就去食早餐, 然後就上咗阿媽屋企hea到夠鐘一齊出門口去接子元再撘巴士入沙田, 約咗阿婆飲茶, 柏仲未上車都瞓咗架啦, 不過唔知發咩夢, 未到獅隧又醒咗, 瞓得嗰大半個鐘! 去到仲要等位, 已經叫工人早一個鐘攞定飛架啦, 終於有位就settle好叫嘢食, 餵咗柏仲食碗粥, 再比自己食腸粉等, 真係食得幾叻仔, 食到點幾都差不多啦, 叫工人接番阿婆, 子元話要去大眾睇書咪比佢睇囉, 差不多兩點就撘巴士返去啦, 柏仲又瞓過, 我都瞓咗陣, 由於想去睇吓美心有冇pooh同tiger的cupcake, 於是又行返去, 但結果都係冇! 返到去柏仲已唔肯瞓, 咁子元有得睇電視就得, 柏仲咪搞家囉, 我又唔想無所事事, 咁摺番好D床單呀衫呀想擺時, 見老公個櫃筒勁亂, 就試吓用新學到嗰個方法去摺同執, 效果又幾好喎, 真係整齊好多, 希望佢keep到啦, 不過都係我摺衫咋嘛, 點會keep唔到! 跟手執埋子元個櫃筒都用呢個方法, 呢個真係要train佢自己識keep整齊啦! 執完就出門口去荃灣, 奶奶話去食客家嘢, 老公去咗踢波, 打比佢問佢係咪去, 喺地鐵會合一齊過去, 柏仲而家戊日要自己食, 唯有放手比佢試但一枱一地都係囉! 食完去咗荃新天地行, 又玩車仔又食糖水, 開心哂啦! 而家柏仲大個仔, 可以行去撘西鐵再行返屋企, 佢真係好行得! 返去沖涼瞓覺啦, 子元就唔肯瞓, 見後日返學啦比佢放肆埋今日啦, 10點幾先瞓!

29/8/15

29/8/15   SAT   HOT

今日如常咁返工啦, 都搞掂咗兩隻嘢先架啦, 差不多放工老公就揍埋兩隻嘢嚟, 因為子元要踢波, 不過未踢咁早, 就一齊食埋午餐先, 然後我就同仲仲返屋企, 由於仲仲未瞓晏覺, 所以喺車已經想瞓咁, 返到去好快暈咗, 我就可以做吓屋企嘢, 主力係執子元間房, 過幾日開學啦, 我成個暑假都冇咩理過佢間房, 唔執到開學都唔知點, 咁又執咗一輪啦, 出番廳休息一陣打吓機柏仲就醒咗, 我扮睇佢唔到佢又扮睇我唔到喎, 自己睇電視, 見佢悶悶地咪比支奶佢囉, 跟住我就換床單, 柏仲又要參與, 就叫佢攞D dirty床單去廚房囉, 有得幫手佢好開心架啦! 到子元踢完波就約咗去愉景新城, 知道反斗城新裝修好嘛, 食間平平地的$200有找, 跟住行反斗城啦, 見到有條公主裙咪比柏仲著吓囉, 又幾靚靚喎, 佢都比我玩得好開心! 跟住都夜啦就返屋企, 沖涼瞓覺!

 

 

 

28/8/15

28/8/15   FRI   HOT

今日都是如常的星期五, 奶奶出嚟揍住佢兩個, 我就返工啦! 買埋早餐返去食吓hea吓, 都有嘢做吓架! 午飯時過去叮飯, 原來大老闆娘返咗嚟, 又唔開燈, 比佢嚇到我彈咗埋牆! 食完飯睇吓電視咁, 下午老細冇返, 所以都係做吓自己嘢, 吹吓水咁啦! 時間都過得快, 又要諗諗今晚煮咩, 放工就即閃去惠康買少少餸, 然後去小童接番仲仲, 嫲嫲都唔係咁搞得掂仲仲, 因為佢會周圍走, 不過我都係放佢周圍走架啦, 總之唔受傷就OK啦! 但程生出咗去講電話時婷婷同仲仲一人一個方向, 我真係唔知捉得邊個! 等到6點8先放人, 老公都放咗工過嚟, 咪一齊過體育館換衫游水! 然後返上樓就煮飯啦, 仲仲襯老公執緊枱面搬枱時, 竟然偷咗包細維他奶自己篤咗嚟飲, 係瀉咗D但又OK喎, 估佢唔到呀呢個賊仔! 又成日爬上枱扮乳豬! D餸整得七七八八就去快沖個涼, 剛好沖完佢地就返到上嚟, 預備開飯啦! 仲仲眼瞓冇咩心機食, 於是開支奶比佢打暈佢就算啦, 跟手洗碗抺地等等, 敏瑩玩到唔願走, 但婷婷又眼瞓啦, 所以10點幾都係要佢走, 我叫佢係到瞓佢又話唔好, 好搞笑! 佢地閃咗子元都要瞓啦, 我地就12點左右啦! 柏仲明明好攰架啦, 都仲可以帶埋跳跳走佬瞓咗老公個位, 晚晚都要搬番佢落床仔囉!

27/8/15

27/8/15   THU   HOT**

今日要出去開會, 我換完衫出嚟, 仲仲都話靚靚, 因為同平時唔同嘛! 執好嘢我就出門口返工啦! 買埋早餐返去食啦, 朝早都係快手做好自己嘢, 因為12點幾又要出門口, 著住對高跟鞋真係好辛苦, 但為咗好睇冇法, 反正只要唔係波鞋我對腳都會損! 過到去去翠華攞位先, Nicho佢地都差不多到, 食完就返上會做嘢, 真係超多嘢寫, 今日仲要好熱鬧, 李太上咗嚟, 又有新會員上嚟, 所以我今日咁著都啱架啦! 開完正題又吹一輪水, 差不多4點先走哂, Nicho又要執一輪嘢先走, 不過最終我都冇同佢一齊撘地鐵, 因為好多嘢攞住又唔趕, 撘巴士返去仲可以hea吓, 5點幾返到去同佢兩個玩吓同係咁執嘢, 因為真係好亂, 又執吓子元個房啦, 條友仔搞到間房就嚟臭咁滯, 點解可以又亂又dirty! 跟住又執玩具啦, 老公回來沖好涼就食飯啦, 食飽再執埋D玩具就抺地, 8點幾9點K.O.埋柏仲就沖涼, 然後都係再繼續執嘢, 又執吓飯枱矮櫃咁, 執完個人就好舒服, 最鐘意掉嘢, 哈哈! 趕埋子元去瞓我就霸番個位睇電視, 睇陣新聞就瞓!

26/8/15

26/8/15   WED   HOT

今日要揍仲仲同子元入青衣, 7點幾要起身啦, 叫醒埋子元快手起身梳洗就出門口, 落去都仲要等陣車, 去到食埋早餐先返工, 朝早都係做吓自己嘢, 午飯後睇吓電視咁, 下午又要開會啦, 老細係到所以全個下午都係做公事, 放工先返青衣同埋奶奶一齊出去荃灣食沙樂美, 老公放工就直接過去! 嫲嫲投訴子元冇做功課呀, 我又要片佢一餐, 真係好攰! 過到去食嘢, 柏仲梗係又搞搞震啦, 比我鬧又喊, 但冇眼淚GE! 點都叫做順利食完餐飯就返屋企啦, 行去撘地鐵, 柏仲又係好行得, 去到商場安全D位就比佢自己行, 但一定要佢拖住囉! 返去沖涼食奶瞓, 跟住先到我沖囉, 子元就要做番佢未做的功課, 都做咗個幾鐘呀, 條友又有少少放軟啦, 加上D嘢係深GE, 都啱架啦! 做到10點, 比佢睇多陣電視10點半瞓囉! 我都攰啦, 11點幾睇完新聞就瞓囉!