8/12/16

8/12/16   THU   COOL

今日要出去開會, 又要去工展會做張extra證, 所以都好忙好忙咁! 朝早返到學校先唔見婷婷, 原來佢再請多日假, 咁我同仲仲咪排隊囉! 返到公司做少少嘢, 10點多又要出門口, 先去銀行幫老公整D嘢, 跟住就過工展做證, 然後撘巴士過上環, 落車停正喺書局面前, 醒起要買中英文的閱讀理解比子元做, 咁梗係買咗先, 跟住就去太興食飯, 食得飽飽的, 返去又好多嘢要寫啦! 本來李太話唔嚟但又嚟喎, 深哥最開心啦, 同佢溝通好加人工事宜, 果然開場後講到加人工, 我老細的白痴嘴臉出哂嚟, 首先話加深哥人工嗰到本來李太話加到16K架, 但比強話加5%算, 所以變咗只加到15K! 到我同Nicho時, 佢竟然話上年都冇加, 今年都唔洗加啦! 好在人多勢眾, 兩位副理事長話加$500啦, 我老細都仲要對住我話: 你呢到加咗$500, 嗰邊扣番$500啦, 連陳老二都忍唔住出聲, 叫我老細唔好咁蝦我! 可想而知佢係幾咁乞人憎! 終於開完會4點幾走得, 返去先接咗笨元再返屋企, 本來諗住買餸架, 但大包打嚟話想出去食, 咁又唔洗買餸, 返去做好D嘢先囉, 食完飯回家, 仲爺其實已經瞓咗, 咁叫子元做埋D改正, 點知執書包時先話未做視藝, 結果做到11點多先瞓, 我就做埋D每日例牌工夫先有得瞓啦!