29/11/13

29/11/13   FRI   COLD

今朝都已經預早咗起身架啦, 唔知點解都係咁耐先返到學校, 去到巴士又睇住架巴士走追唔到, 小巴又要等, 最終7:55出門口, 但都8:35先返到去, 笨元勁擔心做唔到服務生, 冇哂表情咁, 我同老師講話我地撘唔到車所以遲, 咁老師都明比番佢做服務生, 隻笨先有番D笑容咋! 出番學校門口同幾個家長吹水, 講開若真係需要, 到時我生咗, Daddy可以早D揍返嚟先, 睇吓邊個家長係到就放低, 唉…我地D在職家庭都係唯有你幫吓我我幫吓你咁架啦! 返到公司咪吹水做吓自己嘢囉, 今日唔洗出去真係舒服好多! 午飯又要去買飯啦, 下午老細冇浦頭, 不過都搖控你做吓嘢咁啦, 放工等咗勁耐先有車, 返到去見笨元仲玩緊, 梗係叫佢快D開始做功課啦, 寫生字嗰D就留到最後先做, 食完飯又差不多時間就去合唱團, 啱啱樓下撞到敏瑩, 等佢地入咗去我地吹陣水就落茶餐廳陪程生佢地食嘢, 夠鐘又去揍番兩個小朋友! 回家後要佢做埋份中文先可以玩, 玩到10點半要瞓啦! 老公就掛住玩佢個新電話, 要setup好D嘢喎!

28/11/13

28/11/13   THU   COLD

今日又係要舟車勞頓的一天! 朝早如常揍咗笨元返學啦, 今日生日會主題感恩節, 著自己喜歡的服飾, 笨元咪變咗隻angry bird囉, 仲要戴埋上年K2帽子派對的angry bird帽, 返到去個個讚佢幾開心! 買埋早餐返工啦, 朝早都比較hea, 得半日又冇咩趕唔想急住做, 所以都係做吓自己嘢同prepare吓下午開會D嘢! 十二點幾叮起個lunch食咗先, 早D過商會嗰邊整嘢, 若果我知咁多嘢寫, 肯定再早D過嚟呀! 開會前只寫好哂一部份, 都未有機會開票! 咁開會都係4點前開完架啦, 但Nicho要返公司幫唔到手, 得我一個自己寫, 真係趕唔切去接笨元, 好在今日老公奶奶都去接咁就唯有算數囉, 做好哂先走得都已經四點幾啦, 老公打嚟話去愉景新城食晚飯, 咁我就諗緊撘咩過去啦, 其實當初都係諗撘荃灣線定東涌線, 但諗諗吓好似有架巴士去到愉景架喎, 於是馬上search喺邊到有得撘, 頭半段去到葵芳都好快, 因為行公路嘛, 之後要入邨就勁耐啦, 足足一個鐘先去到, 不過啱啱好有得食囉! 至於笨元呢…瞓咗…醒嗰吓又瞓爛覺係到炆, 好在有包朱古力餅引吓佢先好D! 食完閃人去咗反斗城, 嫲嫲話提早買聖誕禮物比佢喎, 佢一早睇中咗海盜嗰兩set Lego架啦, 諗都唔洗諗就買啦, 用埋優惠卷都$760幾, 不過又可以攞多兩張$50現金卷下星期可以用! 買好就回家啦, 今日學校活動多冇做功課, 返去沖完涼馬上做, 又要做珠心算呢! 明明可以做得好好架, 但就係到玩嘢, 係要我地鬧一餐, 咁咪做得好好囉, 真係比佢激死! 做好執好嘢就可以開盒Lego嚟玩, 切好後玩咗幾嘢就要瞓啦, 明天又要服務生, 唔可以夜瞓! 我都好攰, 睇到新聞已在梳化瞓咗!

<全身angry bird!>

 <兩大份Lego做聖誕禮物!>

 <壁報圖工....我覺得似唐三藏多過朝聖者!>

27/11/13

27/11/13   WED   COOL

今朝如常揍咗笨元返學, 跟住就去小學同佢註冊啦, 交哂文件後, 佢比咗一份print咗笨元個名的文件我, 先叫做安心哂, 因為完成哂所有項目啦嘛! 買埋早餐返公司慢慢食啦, 然後都係上吓網做吓自己嘢先啦, 午飯又要去買飯, 都係食大家樂最簡單! 下午老細又係冇返, 好事! 不過都有好多公事做, 一個下午都未停過, 忙到都唔記得自己做咗D咩囉! 放工返到去, 先到笨元沖涼啦, 搞掂就睇埋功課溫埋書可以食飯了, 初頭食得少少又話唔食, 食雞又淨係食皮, 梗係唔得啦, 最終又係要撈咗D雞汁先食哂囉! 食完飯要佢執書包同明天生日會著GE衫, 仲有做埋交隊張工作紙, 其實都係油顏色啫, 但佢又要油到好色彩繽紛咁, 都好GE唔洗掛住睇電視! 做好哂只係睇咗半個鐘又瞓覺啦! 我地都係hea吓咁十一點幾就瞓啦!

26/11/13

26/11/13   TUE   COOL

今日都係幾攰的一天, 朝早如常咁返學啦, 咁晏都仲有得排隊喎, 揍咗佢入去都閃人啦, 買埋早餐返公司, 之後都係做完自己嘢就做公事咁啦, 唔知點解咁忙呢! 午飯去咗買回郵信封順道買麥當當做午餐囉! 下午老細冇返, 不過都唔影響, 我三點九都出門口去工展會嗰邊攞嘢, 撘地鐵過去都OK, 最慘係行過去, 已經行得勁慢, 但都係好辛苦! 去到攞咗嘢, 睇咗一陣, 應該冇咩大問題, 加上嗰D簡介會年年都係簡介嗰D架啦, 所以襯未開始時就閃了, 搵番架905撘返屋企, 不過都要撘1個鐘, 坐到patpat都痛, 返到去已經好攰, 好在笨元已沖咗涼, 咁我沖完就食飯啦, 今晚只係食KFC, 真係快餐日呀! 然後開始同笨元溫書啦, 都冇默番琴日寫的字了, 因為又有兩張工作紙要做番, 仲要溫埋默書都大半個鐘啦! 因為老公去咗踢波, 咁笨元又幾合作喎, 臨尾佢做嗰張感恩節工作紙, 笨元感謝媽媽賜給他一個小弟弟, 畫咗佢心目中的蕃薯粒呢, 好可愛呀! 做好哂嘢就一齊睇電視, 9點半就入房瞓覺, 我就睇吓電視咁等老公返嚟囉, 都hea到12點多先瞓!

<子元作品!>

 

25/11/13

25/11/13   MON   COOL

今日係笨元一個重要日子, 不過佢都唔知咩事架啦, 都係我地家長們緊張啫! 今朝要做服務生, 所以一早就返到學校, 我亦早D閃人去小學嗰邊睇結果, 一路行緊去學校, 個人都好緊張, 一路叫自己唔好咁緊張, 終於行到去學校, 啱啱開始有得睇啫, 攞住個number係到對, 好在學校post出嚟呢張有埋名, 咁就搵埋名啦, 見到有子元個名呀, 都係對多幾次好, number同個名都啱, 先叫做放一放心, 同現場老師講係收咗GE, 佢就比咗兩張文件叫我填, 星期三連埋附件交番嚟就得! 好興奮咁又打比老公啦, 又whatsapps啦, 真係好忙, 買埋個早餐返去公司仲未平靜得哂, 都係唔多信, 再上網對多次個number, 影埋相放上facebook報喜! 一朝早公事私事都好忙好忙咁未停過, 做到午飯都唔知做咗幾多嘢囉, 食飽終於叫做停吓睇陣電視啦, 點知未夠2點又要開會, 真係忙開有條路架喎! 一開仲要開到三點幾四點, 仲有嘢要follow up, 真係做到5點有多先停落嚟, 馬上搞埋子元功課同文件D嘢, 要print埋嘛! 放工返到去同佢沖好涼諗住溫書啦, 點知開飯喎, 咪食完飯先囉, 點知條友仔去完個POPO完話唔想食飯好眼瞓喎! 咁都只可以由得佢瞓架啦, 之後我地出出入入好幾次佢都冇被嘈醒, 就知佢真係好攰啦! 咁咪由得佢瞓天光囉, 我地就好hea 咁過囉!

<對咗好多次...好怕對錯!>

24/11/13

24/11/13   SUN   COOL

今日以為好閒, 點知都唔係! 朝早老公去踢波, 又話10點返, 最終打極比佢都冇人聽, 咁我唯有帶佢去畫班囉, 趕到死死吓, 仲要麻煩程生買埋早餐比笨元邊行邊食! 老公就叫我去茶餐廳同佢會合, 叫定早餐等得佢嚟都已經差不多11點, 你話係咪過份?! 食完早餐冇咩地方好行, 突然醒起要找醫生同笨元打13價肺鏈針, 長沙灣嗰D都冇, 就打去美孚嗰間問, 竟然有喎, 但要親身登記, 咁就兵分兩路我去登記佢去揍笨, 等咗好耐先有車, 仲要係小巴, 唯有喺橋底行入去, 真係好心急, 去到佢要我比文件登記, 我邊有啫, 好在肯留咗名先我返去攞, 又要行返屋企攞完再去番診所, 老公佢地都差不多到, 但原來仲未有得打, 又話半個鐘, 咁咪去圖書館坐吓點知去到又話半個鐘, 咁就去美心坐住等夠鐘叫下午茶, 再過去都係未夠鐘, 但都留喺診所等啦, 等咗20分鐘都有得打啦, 笨元初頭都唔驚, 打嗰吓先知痛, 陰公真係喊出嚟有眼淚架! 最好笑佢出到診所話我知, 佢以為打落條“啦”到, 點知打落舊肉到, 真係忍唔住想笑! 佢肉痛之餘我都好肉痛呀, $900呀仲要現金! 過美心食埋個tea就回家, 要佢做埋珠心算, 老公走咗去瞓覺, 我就摺衫, 之後就火佢地兩個, 一個所謂打掃係都唔肯吸咗塵先, 另一個做珠心算做到一pat屎咁, 激到我係到喊囉, 真係好嬲好傷心呀! 咁喊完都係要做番架啦, 喊咗先算啦! 最終咪又係要做哂佢同做功課, 晚飯叫咗Pizza, 笨元肯定勁肚餓, 好在叫咗大批, 佢一條友都食咗3件, 再加3隻雞翼, 臨瞓仲食咗腐竹糖水! 攰到咩咁GE笨元9點已被捉咗入房瞓, 我地就睇埋大結果先瞓!