8/11/13

8/11/13   FRI   WARM

今朝笨元要做服務生, 所以我地早D起身, 7:50就出門口啦, 終於8:15已返到去, 遇咗佢會周圍走架啦, 不過今次起碼叫得住, 揍咗佢入去又要等其他學生入去時先可以睇佢點帶小朋友入課室, 佢唔係淨係拖手仔架喎, 仲要撘住人地, 好得意呀! 睇完就返工啦, 朝早做自己嘢同skype吓, 午飯今日買新鮮, 都係食意粉啫! 下午做吓嘢咁好忙, 因為突然想起11月商會要開會員大會, 但因為會計師樓比唔到數我地, 有可能開唔成, 其實都仲有幾日時間, 我迫佢地星期一要覆到我幾時比到數, 因為下星期四出通知都仲得, 反正今個月開下個月開我都要prepare哂D嘢先, 都係要做架啦! 咁又放工啦, 返到lift口, 喺門外見到笨元喎, 咁啱又有lift, 條友仔唔等我不特止, 仲要即刻走入lift叫嫲嫲關門, 嫲嫲問番笨元先答話見到咪咪, 正衰仔! 返到去佢又係到周屋走又掟鞋, 仲唔比我成機打手仔呀, 換好衫就馬上做功課啦, 食完飯又已經要去合唱團, 叫做只欠英文, 剪報同閱讀記錄冊, 咁食完飯就比佢抖陣囉, 佢去合唱團時我地就去759, 今日行咗好耐呀, 都唔洗去麥當勞坐都OK, 由於晚飯時冇咩食嘢, 所以都買咗個包呢! 接咗笨元回家沖涼就要佢寫埋英文生字, 可以自由活動一陣, 佢選擇咗畫畫, 不過都唔可以比佢畫太夜, 明早又要學畫畫囉, 所以10點幾捉咗佢瞓啦, 晚上都係有咳, 可能天氣轉啦, 飲咗化痰粉其實已經少咗痰聲, 但都係咳, 半夜樓下個細路仲係到狂喊, 個老豆又鬧, 比佢嘈醒咗囉, 可惡!

<成日唔肯比我影相囉!>

 <做服務生中!>

<帶緊小朋友入課室!>