3/11/13

3/11/13   SUN   WARM

今朝八點幾就起身, 因為買咗10點飛喺青衣睇THOR嘛, 笨元好期待架, 不過佢入到去成日問嘢都幾煩, 又怕嘈到人呢, 好在都多小朋友去睇, 都唔係咁覺眼! 睇完只係12點左右, 去百佳買埋嘢食返屋企先至食, 跟住老公就搬衣櫃出嚟, 傢俬要移定位啦, 但真係好大工程呀, 要搬哂衣櫃D衫出嚟, 先發現個衣櫃放到咁多嘢! 兩點多老公就出去踢波啦, 我又要執嘢又要管住笨元做珠心算, 嗰兩頁做咗有兩個鐘囉, 因為要做一行休息5分鐘喎, 咁都由佢啦, 反正冇地方佢玩, 我都執咗好耐先完成, 老公回來五點幾六點我先剛剛抺緊地咋! 終於叫做完成咗一半, 今個星期慢慢將D BB衫分類攞去洗就大至完成! 沖個涼就出去食飯, 今晚阿嫲生日飯, 近近地喺桃苑食咋, 今次叫個份量都啱食得哂, 影番張相咁, 九點多閃啦, 一出酒樓就勁嘔, 我今次都醒架啦, 攞定膠袋裝住嚟嘔, 真係嘔到暈暈地呀! 撘車返到去快手沖涼, K.O笨元要睇電視嘛, 睇完walking dead後若果我知十級重案做咁耐我一定唔睇個頭, 開咗個頭又想睇埋先瞓, 老公琴晚睇咗波, 唔夠精神所以十二點都入咗房瞓, 我就睇到點幾先瞓囉!

<嫲嫲生日飯!>