15/11/13

15/11/13   FRI   COOL

今日要做服務生, 搞到我7點都要起身, 7:45就要出門口, 我今日仲要負責講故事, 所以見去到學校都係8:10, 咁梗係去買個早餐先啦, 我同笨元講我一路排隊一路食, 佢竟然話D小朋友可能會笑我! 咁買得早餐行返過去啱啱好入得學, 等佢入咗課室我就交埋錢等等然後就出番去校門外等, 睇吓笨元帶N組入課室, 到D學生返得七七八八, 就可以睇早會啦, 真係好耐冇睇過早會操, 其實笨元跳得都幾大動作吓怪怪得, 但就幾好笑囉! 早會完要等佢地去埋廁所先開始講故事, 影埋相走得都9:15! 好在等得車買埋早餐返公司都係9:45, 唔算太晏啦! 如常咁做嘢skype吓啦, 午飯後睇吓電視咁, 下午老細返咗嚟, 照樣攞嘢比佢簽等等, 仲攞埋嗰日佢叫我睇嗰份CV, 跟住佢唔知講笑定講真咁話“係呀, 我請秘書嘛!”, 我就回咗佢一句:“係你就早D出聲喎!”, 我自己都覺得自己答得平淡, 所以佢都冇咩好講! 返番嚟同D同事講, 佢咁樣講得反而唔係囉! 係隻曲毛狗作怪, 知道老細唔諗住請temp, 就馬上找個人sell比老細, 等我放完假可以替咗我! 不過都係嗰句啦, 我呢D被動的, 冇咩可以做, 最緊要你補足比我就得啦! 查實我不知幾想喺屋企揍仔, 只係老公搵唔夠養家啫! 放工返到去馬上幫笨元睇功課啦, 因為星期五係要做哂D功課架嘛! 但見到笨元個樣好唔妥, 又係咁咳喎, 原來嫲嫲已經餵咗咳藥水比佢, 唔怪得冇哂精神啦, 佢個樣都做唔到D咩架啦, 見佢又已經沖咗涼, 就叫佢上床瞓囉! 勁快已瞓著咗, 我咪繼續做佢D功課囉, 今日個人已經冇咩mood, 都唔係好想講咁多嘢! 食完飯唔洗去學合唱團啦, 因為笨元瞓到隻豬咁, 於是咪hea囉, 咩都冇做過, 到十一點幾就瞓啦, 點知未夠12點, 聽到笨元房有聲, 原來條友醒咗話肚餓, 瞓咗一覺個樣好咗好多! 咁老公整公仔麵佢食, 我地咪一家齊齊宵夜囉, 食完個麵等佢食埋藥抖陣先再瞓!

<我的兩個最愛!>

 <鬥靚仔中!>