1/11/13

1/11/13   FRI   WARM

今朝笨元係唔洗我叫起身呀, 但之後慢呢, 明明係可以好快ge, 總係要拖慢嚟做, 個包都係要邊行邊食, 去到小巴站等左15分鐘先有車, 搞到又晏啦, 以後逢一五要早返真係唔知應該預幾點出門口先啱! 我剛好趕到撘41A, 買埋早餐返去食啦, 老公打嚟問開明天去老細屋企BBQ嗰到點過去, 咁我咪找吓車囉, D Sales在時同事又宣佈埋明天咩時間左右開始, 咁咪一齊傾吓點入去囉, 好正常啫! 點知同事琴日已同老細商量好會載我地幾個入去, 咁你地又冇提過我係咪唔會知有呢個安排先, 我知係唔可以比sales知怕煩, 但我完全唔知情係一齊商量係咪都好啱啦, 咁我有幾心急呢, 可能係言者無心, 但聽者有意囉! 不過我而家都算啦, 無謂嘈, 冇意思! 午飯買咗大家樂, 又有新嘢食, 唔錯! 下午老細返咗一陣又即閃了, 可以做吓自己嘢, 不過邊有咁多自己嘢做呢, 都會做吓公事ge! 放工前老公揍咗笨元上嚟, 因為佢接放學嘛, 跟住就去踢波, 咪帶笨元嚟, 咁之後我可以同笨元返去佢就踢波! 老師話笨元今日又推撞, 罰佢埋一邊坐都唔認錯, 要過咗陣先走去同林老師講知錯, 唉! 另外自己放書包時又仆親個嘴, 早一日仆嘛, 拔牙錢都慳番! 咁我同笨元去撘巴士啦, 條友上車即瞓, 搞到我要拖住個醉酒佬返屋企, 搬到佢上床佢醒一醒又話唔瞓, 我咪一句你眼瞓到咁仲唔瞓陣, 我話夠鐘我叫你起身啦! 於是我就襯嗰段時間睇哂佢D功課等等, 預備好D嘢, 因為七點幾又要出門口去合唱團, 叫得佢起身出到門口都七點半, 行到出去食麥當當, 好在都趕得切啱啱開始不久! 我就攞咗本親子王慢慢睇住等佢囉! 九點多先放人, 撘得小巴返去叫佢自己沖涼足足沖咗15分鐘叫都唔出嚟, 關佢燈仲係到話我, 好在之後自己做功課好合作做哂啫! 咪比埋糖水佢食玩咗5分鐘先瞓, 已經11點啦!