23/11/13

23/11/13   SAT   COOL

今日係旅行日, 七點半多D已出門口, 因為要早D去到食咗早餐先, 剛好八點半搞掂集合, 點知又話1號車冇位放我地3個要我地去2號車, 搞到笨元勁sad, 加上D資料又全部喺哂1號車, 我地答唔到問題喎, 好在之後有D我都答到, 幫笨元攞番D禮物佢先笑番咋! 車程都算快, 半個鐘左右已到, 落車咪會合番佢D同學囉, 即刻開心番哂, 影完大合照去買套票, 好有計劃咁先去馬場嗰邊等騎馬啦, 所以排咗一陣就已經有得騎, 笨元梗係勁驚啦, 但都叫做驚住咁去騎完啦! 下一站就去大草地, 程生佢地有帶蓆, 馬上搵咗個樹蔭位仲有大石頭坐, set好架部可以休息吓囉, 放咗笨元出去玩攤位, 玩玩吓佢又會返嚟, 又吹吓泡泡咁, 之後話攰返咗嚟休息囉, 到十一點幾可以攞飯盒, 咁最終喺飯堂霸到位就拉大隊搬嘢過去食, 都係混混亂亂咁食架啦, 不過大家互相幫助咁食都OK, 有時又要幫手揍吓敏婷呢, 佢真係好為食, 連炒麵都唔放過, 我比得慢仲抆我手臂添呀! 食完午餐仲有得買雪糕食, 食住咁行去玩繩網, 笨元例牌又係驚到死死吓, 又要人救架啦, 真係比佢笑死! 玩咗有半個鐘又轉場去餵動物啦, 餵羊時笨元好驚, 餵兔仔就開心好多啦, 不過最後都肯餵, 叻咗架啦! 下一站撈金魚, 望見D金魚就慘, 快手撈吓就走人, 行番去換魚糧餵魚, 仲可以用餘下的套票換吓popcorn同棉花糖食! 集隊時又話1號車冇位架, 但最終咪又係上到, 笨元可以同敏瑩嘉桓坐, 完全冇瞓! 散水後撘巴士時都仲好精神, 反而我地真係已經超攰啦, 不過都去圖書館借埋書先, 怕明天冇時間借! 返到去沖涼後最終三個都瞓哂, 要撘的士出尖咀食阿婆餐生日飯! 咁笨元都食得幾合作, 不過又回吐啦, 我地做好哂準備架嘛, 完全冇人為意到! 食完撘番巴士返去沖涼瞓覺啦, 超攰呀!

<等上車時同詠彤合照!>

 <CHOK男又有三美相伴!>

 <等騎馬中!>

 <你睇佢縮埋就知驚啦!>

 <強顏歡笑中!>

 <吹泡泡最開心!>

 <成班喺到玩敏婷!>

 <飯後甜品中!>

 <咪睇佢咁勁...查實要後面位男士救咋!>

 <佢本來又係肯爬架!>

 <幫緊嘉桓手!>

 

 <睇兔仔, 最開心!>

 <嘗試餵羊中!>

 <準備撈魚!>

 <Daddy幫佢撈到兩條!>

 <擺POST!>

 <三個終於可以一齊坐!>

 <洗唔洗咁痴身!>

<食壽包!>

 <有燈飾睇啦!>