31/1/14

31/1/14   FRI   WARM

恭喜發財, 大年初一都是和往年一樣啦, 蕃薯瞓到7點先叫食, 餵咗佢泵埋奶我都再瞓, 瞓到10點先起身, 本來唔諗住餵蕃薯食奶住, 過咗阿媽到先再餵, 點知佢就回奶搞到一身都係咁咪沖埋涼食埋奶先過去囉, 再影吓相咁, 就行過阿嫲到食飯, 老豆都喺到但大家都唔多理佢咁啦, 最理佢嗰個算係阿妹架啦, 開咗飯阿叔打嚟又傾咗陣咁啦, 由於時間關係, 冇帶奶比蕃薯, 趕住2點又要食, 所以撘的士返青衣啦, 點知嫲嫲去飲茶仲未返, 結果又要問隔離攞KEY先入到屋, 馬上餵蕃薯囉! 等嫲嫲返嚟睇住佢地, 我同老公落樓掃街, 但始終冇長發嗰時咁好食啦, 返上樓都係hea啦, 老公就瞓咗覺, 佢都得架啦! 食飽都係撘的士回家啦, 今日都幾攰, 但回家後都係要做嗰堆嘢, 泵奶沖涼餵奶啦, 不過我真係頂唔順要瞓先啦!

30/1/14

30/1/14   THU   WARM

今朝7點蕃薯先叫食, 原來12點前佢醒D嚟餵係好D! 餵咗佢我又瞓唔番, 咁就泵咗奶先, 本來諗住自己出去食早餐過公司, 點知笨元又醒咗, 咁咪叫佢一齊出去食早餐囉, 單對單出去佢都好合作, 好順利咁去攞咗票入埋錢就回家, 點知老公矇矇吓咁10點半聽到蕃薯喊以為過鐘就餵佢, 其實應該11點先至食, 咁梗係食唔哂啦, D男人真係睇少眼都唔掂! 但都冇辦法啦, 先要去嫲嫲屋企, 今晚喺青衣食團年飯嘛, 入到去都點幾, 所以先餵咗蕃薯食一餐我地先出街! 留低咗蕃薯比嫲嫲, 我地就出咗荃灣買嘢, 先去咗愉景新城, 但原來都冇咩啱買到, 只係比笨元去咗行反斗城同食錢樂園! 為咗要買到嘢, 最終去咗荃灣廣場, 喺H&M買到哂衫, 仲買咗件Snoopy比蕃薯, 不過出年先著得落! 之後再行埋一田同AEON, 叫做搞掂哂嘢可以返去, 但返得去已經6點幾, 好在嫲嫲都搞得掂! 整好哂就開得飯, 因為蕃薯8點幾又要食奶啦, 所以我地食咗先, 夠鐘就餵佢啦, 喺到hea到10點先回家, 返到去仲要泵奶先沖涼, 餵埋12點幾嗰餐又要入利是呀, 貼揮春呀嗰D, 老公食咗藥頂唔順瞓咗先, 我整好哂D嘢已經2點先有得瞓!

29/1/14

29/1/14   WED   WARM

今朝5點蕃薯就嘈, 計番我都係瞓得4個鐘咋, 要訓練佢戒夜奶真係好難, 其實佢可以隔到6-7個鐘唔食奶, 只係隔嗰個時間錯咗咁解啫! 餵完我梗係照瞓啦, 笨元今日唔洗返學我唔洗理佢, 老公自己返工搞得掂啦! 我就瞓到9點幾先起身, 梳洗完餵埋蕃薯就蒸蘿蔔糕做早餐, 之後陪笨元砌Lego, 到12點幾就準備同蕃薯沖涼食奶, 餵飽佢到餵我啦, 諗唔到煮咩食就同笨元出咗去食麥當勞, 順手去買埋洗頭水就回家了, 要做公事呀, 蕃薯又喊喎, 都唔得閒理佢住, 但佢喊喊吓又瞓番! 陪笨元砌多陣Lego就趕佢去做假期作業了! 聽到喊聲開咗奶比蕃薯點知佢又瞓番喎, 唯有等佢繼續瞓多陣再食囉! 下午笨元食咗藥又唔肯瞓, 佢炆搞到我都炆囉! 等老公返嚟就準備出門口去阿媽到食團年飯啦, 7點幾過到去, 初頭蕃薯都乖乖瞓喺房架, 到開飯時佢就喊啦, 但我地都係唔會理佢ge, 等我食完先抱吓佢啦, 之後夠鐘先餵奶, 都算佢醒目食得唔錯, 9點多走人啦去松記買糖水, 回程時笨元喺車瞓咗, 落車又扭囉, 搞到我勁火呀, 因為佢D態度太差! 起碼沖完涼冷靜哂我先好D! 食埋糖水我都瞓啦, 搞掂蕃薯比老公餵, 我一入房就瞓咗, 攰爆!

28/1/14

28/1/14   TUE   COOL

六點幾蕃薯叫食, 其實都唔係好願起身因為琴晚都瞓得唔好! 餵咗蕃薯就叫笨元起身, 仲整埋腿蛋治佢食, 佢兩個出咗門口我就泵奶然後食早餐, 見蕃薯瞓得咁冧就做埋清潔先, 明天笨元開始放假實冇時間做! 差不多11點蕃薯先有D聲, 咁就整埋嘢比佢沖涼, 佢而家習慣咗我幫佢沖涼, 個樣幾冧呀! 沖好涼食奶今次再比5安佢, 計番好時間要3點幾先再飲, 若可以4個鐘飲5安, 咁時間都好用D! 等老公買飯返嚟一齊食, 之後佢又返工啦, 我就用吓電腦再泵吓奶, 蕃薯應該3:30食, 但醒得嚟4點先食, 但原來個奶咀爛咗, 續咗佢兩次我先發現, 咁咪馬上同佢換咗個奶咀頭囉, 咁又食番好D啦, 不過之前都浪費咗, 仲要今餐係難得的人奶嘛, 唯有下餐早番少少食啦! 之後都係hea住咁等笨元放學返嚟囉! 今晚唔沖涼住, 因為老公話過長沙灣食米線順手攞埋敏瑩盤花比阿媽照顧住先, 不過老公放工返到嚟時兩隻仔都瞓哂, 等到佢地7點半, 叫醒笨元佢就發哂脾氣, 都唔知鬧唔鬧佢好! 終於出到門口去食米線啦, 真係好肚餓, 食飽去攞埋盤花上阿媽到, 影埋相就撘的士返去啦, 蕃薯又夠鐘食奶呢! 返到去老公有新玩兒, 就係寫揮春啦, 笨元寫得好開心呀, 寫完先沖涼, 我其實都幾攰架啦! K.O. 咗笨元就等12點幾餵蕃薯, 但換片佢都唔醒, 最終只係飲咗兩安咁大把, 十成頂唔到天光!

27/1/14

27/1/14   MON   COOL*

今朝蕃薯7點幾起身, 最尷尬的時間, 唯有叫醒老公去照顧笨元, 但笨元又慢吞吞咁, 我話完佢再唔自己換好衫就唔好返學, 條友返到學校同人講話明天唔洗返學喎, 唉…我真係唔知應該點好! 有咩方法令佢接受而家好多嘢係要自己做, 因為我真係唔可以同時照顧到蕃薯又照顧到佢呢! 佢地出咗門口我泵埋奶再煮早餐食然後梗係睇running man啦, 然後11點多又同蕃薯洗白白食奶啦, 佢食完就到我煮飯食! 諗住一路食一路睇VS嵐架嘛, 點知今日冇得做喎, 咁咪睇吓戲囉! 下午都唔算好忙, 蕃薯兩點幾又食奶啦, 之後等老公揍咗笨元返嚟就同佢沖涼, 然後又餵蕃薯, 笨元沖好涼我都沖埋, 老公亦返埋嚟啦, 沖好涼先食壽司, 蕃薯係咁喊我地都冇咩太理佢, 因為抱完玩完佢都仲係喊, 咁就唯有喺床等佢喊吓, 有時喊得太耐先比個奶咀佢靜吓, 9點幾餵咗佢, 點都要頂到12點幾嗰餐, 本來好地地諗住食埋呢餐到天光, 點知笨元半夜走咗過嚟兩次, 蕃薯4點幾又喊咗一次, 搞到我都係瞓得唔好!

26/1/14

26/1/14   SUN   COOL

今日都係要出街的一日, 朝早蕃薯8點食過奶, 但老公又唔多願起身, 於是我就顛咗咁一條友出去做哂所有嘢, 還書借書去超市買咗好多嘢, 仲要去麥記買埋早餐, 我都唔知自己點抬咁多嘢返嚟, 食完早餐老公就過咗去幫阿媽整洗手盤, 我又要1揍2, 不過笨元又唔多合作, 蕃薯又喊到我心都煩, 搞到我個人冇哂自控力, 忍唔住喊呢, 發洩完好D啦, 同蕃薯沖埋涼就食奶, 等老公回來就執好嘢準備出發, 先去嫲嫲到因為老公要幫佢整嘢, 咁蕃薯又食餐奶先, 本來笨元喺巴士瞓咗諗住等佢喺嫲嫲到再瞓吓, 點知佢又唔肯瞓, 咁食D嘢等老公搞掂咪出發去善孜生日會囉, 老公主力幫手泵波, 我就要照顧蕃薯, 佢唔係好肯瞓, 所以都要成日抱住, 搞到我都冇咩機會睇吓佢地班小朋友玩咩, 食嘢時笨元掛住講嘢又係冇咩食啦, 都唔理得咁多, 6點幾蕃薯又要再食奶, 但又係到食到噴哂咁, 比佢激死, 不過生日會主力都係小朋友玩大人吹水架啦, 我地呢班都算人多勢眾, 加埋D阿哥家姐細佬妹幾鬼熱鬧! 7時多散水啦, 程生又車我地返嚟, 真係快好多, 沖個涼執嘢再休息吓咁啦, 真係攰到死死吓! 老公9點就瞓鬼咗, 留低一隻喊喊蕃薯一隻麻煩笨比我, 笨元又要砌嘢, 好在9點幾佢已經話眼瞓要瞓, 不過我仲要搞掂隻蕃薯, 夜晚就係咁喊, 9點幾食咗奶都仲係喊, 我又已經勁攰, 老公10點幾醒過叫佢拍暈隻蕃薯, 最終我都頂唔到12點幾再餵要瞓啦, 咁就3點幾要餵囉, 唉…返工前一定要調好佢D時間先得!

25/1/14

25/1/14   SAT   COOL

星期六例牌朝早起身一齊揍笨元去畫班架啦, 今朝蕃薯6點幾食, 呢D時間就最FIT! 兩個小朋友喺麥記食咗早餐我地就去茶餐廳食, 然後上阿媽到再整埋廁所牆, 蕃薯又要食番餐奶, 到十點幾老公都未搞掂, 唯有我過去接笨元, 程生又接唔切我咪要一次接哂兩個囉, 去阿媽到同老公會合好就去藥房買埋嘢再去買埋午餐就回家, 嫲嫲已經嚟咗, 今日有好多活動, 嫲嫲會單拖照顧蕃薯到我地食埋團年飯返嚟! 執好嘢換好衫set埋個頭就出門口, 先要去油塘因為笨元考珠心算, 好在有程生載我地去咋, 所以2點左右已到達, 仲可以泊喺學校入面, 佢地夠鐘就去考啦, 我地幾個家長就喺到吹水囉, 3點幾考完返落嚟影張相就走啦, 因為敏瑩趕住返去學普通話, 載我地去到九龍城咁就可以撘巴士出尖咀, 瞓咗一程車叫做舒服番D! 去反斗城買咗盒模型比笨元, 等佢陣間去食團年飯時有嘢做! 不過行過去時就最慘, 咁耐冇著高踭鞋, 我對腳真係痛到顛, 過到去其實冇咩做, 但又唔可以太晏都唔出現嘛, 今年唔洗做MC其實真係超輕鬆! 係抽獎嗰時要幫手囉, 今年只係抽到基本的$800, 仲有笨元抽到$200嘉賓獎囉, 不過都冇咩強求, 之前抽咗2次金幣啦喎, 今次最高都係$5000現金咋! 未到一半D老板們已醉, 都真係幾煩幾嘈, 又係咁唱歌, 好在冇帶蕃薯嚟, 不過最開心係個個都話我瘦咗好多, 哈哈真係賺哂! 搞到10點幾散得水, 馬上撘的士回家了, 攰爆! 不過返到去沖好涼咪又係要揍仔, 因為蕃薯10點幾先餵過奶, 我地捱唔到1點半再餵佢了, 唯有等佢半夜嘈先餵…攰死!

24/1/14

24/1/14   FRI   COOL

今日笨元冇返學, 休息一日等佢可以食齊藥, 下星期過年啦嘛! 不過佢喺屋企我就辛苦多好多囉! 餵好蕃薯就要煮早餐我地兩個食啦, 然後休息一陣泵埋奶就監督住笨元做珠心算, 激到我死又要我鬧又要我迫先得, 咁啱公司又有事, 蕃薯又要沖涼食奶, 總之就係到挑戰我底線啦! 叫做完成哂D嘢又要煮午餐, 笨元又要我陪佢玩, 但蕃薯又喊又要煮嘢, 真係分唔到身, 唯有由得蕃薯喊吓, 煮好個午餐後就食埋休息吓, 比笨元玩多陣我又餵埋蕃薯, 就要佢午睡啦! 跟住老公返咗嚟又午睡, 我呢…邊有得瞓, 仲要摺埋D衫, 咁上吓時間隻蕃薯又喊又要哄吓佢! 老公瞓到咁上吓就返公司打卡, 再買壽司返嚟食, 因為要學合唱團嘛, 蕃薯6點幾食咗奶時間啱啱好, 不過佢近來回奶都回多咗, 成日都要小心唔好比佢噴中! 7點幾出門口, 會合埋程太仲有小B一齊去食晚飯, 小B搗蛋時蕃薯又回奶, 夠鐘返上去接佢地啦, 知道冰miss喺到就去搵佢比佢見吓蕃薯, 仲攞咗底蘿蔔糕呢! 回家後比笨元睇吓電視囉, 因為佢下午瞓咗好耐! 我地今次9點幾餵咗蕃薯老公再頂到1點餵, 咁就唔洗半夜餵, 不過真係要再調好D時間係12點前食, 因為要1點先餵其實都幾攰!

23/1/14

23/1/14   THU   COLD

蕃薯算係咁, 11點幾飲咗4安, 都頂到5點半先再嘈, 不過最好可以捱到6點, 咁我又可以瞓耐少少, 跟住D時間又啱之後返工返學! 飽飽後都6點多, 得番1個鐘我實瞓唔到, 於是泵埋奶再叫笨元起身, 等佢地可以早D出門口, 我就煮早餐食然後做吓公事啦! 11點幾奶奶過咗嚟, 咁我執埋嘢就出門口, 本來諗住先去公司攞票, 點知老公又早咗搞掂D嘢, 所以就同佢去食咗午餐先, 帶我去平時間食堂食, 真係花多眼亂! 食飽去新都會買衫, 目標為本買咗3件, 有裙有衫Annual Dinner同初一都有著落啦! 跟住去奧海城買鞋, 因為嗰到先有專門店嘛! 買完都兩點幾囉, 先返公司攞花紅, 我都知下午老細都會喺到架啦, 但又冇理由唔攞架嘛, 打個招呼咁囉, 跟住返屋企放低D嘢就再去接笨元放學, 勁黑仔遇正葵涌道撞車, 4:50先去到學校, 買埋花交返去, 同老師傾咗一輪, 又走咗架巴士, 不過都啱架啦, 撘地鐵穩陣D! 6點多去到法國睇葉醫生, 兩父子都要睇啦! 我就已經攰到冇哂能量, 老公話撘的士返去, 點知又遇正撞車又塞, 搞到7點幾先返到嚟, 已經勁餓, 蕃薯又係到嘈, 咁嫲嫲又緊張啦喎, 不過都夠鐘先餵佢架啦! 8點幾食完我就泵奶沖涼, 之後已經冇哂能量冇餵到12點嗰餐, 結果3點幾就要起身囉, 老公食咗藥唔叫佢啦, 我自己一個頂!

22/1/14

22/1/14   WED   COLD

琴晚瞓到矇咗, 冇理到蕃薯求救, 所以今朝差不多6點蕃薯再求救時就叫埋老公一齊搞掂佢, 大家再瞓到7點先起身, 幫笨元換好衫再叫老公起身, 今日著華服一定要幫佢手, 因為幫咗手快好多, 可以食埋早餐先出門口呢! 泵完奶食埋早餐, 蕃薯9點幾先叫食呢, 餵完佢佢又瞓過, 見佢瞓得咁冧不如就做咗打掃先, 因為佢朝早瞓得最冧! 到12點幾本來想煮飯, 其實已經煮咗但老公打嚟話買飯返嚟食, 我就留番個飯之後炒飯用都得! 跟住就到蕃薯沖涼食奶啦, 剛好佢食飽就到我地食啦, 放咗佢喺床都有D扭架, 但都係幾聲, 冇晚上咁誇喊足半個鐘! 然後我又要做公事啦, 唉…一諗起又要做公事又只收得4/5糧真係好唔順氣架, 只係比多兩個半月2000蚊就令個員工順氣, 係咪真係咁蝕呢, 完全唔明D老細點諗, 真係好想好想中番幾千萬六合彩然後炒番老細轉頭, 我諗每個打工仔都想有呢刻! 咁可以全職揍仔又有錢喺手, 係幾咁夢寐以求! 4點多又要餵蕃薯啦, 之後佢都嫲嫲地肯瞓咋, 要哄幾次先瞓冧, 5點幾笨元返到嚟就同佢沖涼先, 然後再到我自己沖咗先, 比佢睇埋電視, 快手食埋個飯因為蕃薯又差不多時間叫食, 拖到佢8點再食, 我地喺床係咁同佢玩…或者係玩佢! 食完奶佢就開始喊啦, 間中有哄吓佢, 但都係等佢喊攰係最好, 因為哄咗佢一陣最終又係再嘈, 反而喊攰咗就瞓冧! 到11點幾點都要捉佢食一餐先瞓, 好在老公都拍得暈隻蕃薯, 唔係真係冇覺好瞓!